Nthowa ya kusere ku nyumba ya ofesi yasonu atiyisalaza kuti a yiŵiki simenti pasi. Nthowa yo yijumpha mumphepeti mwa ofesi yeniyi yo ye ku mazge, akhumba kuti yijengi yakufunda ukongwa kuchitiya kuti ŵanthu wo atenda mwenumu aleki kutelemuka asani ndi nyengu yakuzizila. Nyumba yeniyi, ye ndi Ofesi yo yiphwere Banja la Beteli, Ofesi ya Komiti ya Nthambi ndi Ofesi ya Dipatimenti yo yiwonere Uteŵeti.

Munthulumi wagwira ntchitu yakunozga mukati mwa nyumba ndipu wagwiriskiya ntchitu chipangizu chakuchekete muchipinda cho ŵe che ndamalizi kuŵika simenti pasi. Chipangizu chakuchekete chenichi atichilumikiza ku chipangizu cho chipeya fuvu ndi viswaswa kuti muchipinda muleki kuja fuvu linandi.

Abali akujumpha 200 wo ateŵete pa ofesi ya nthambi wo aja mu nyumba ya Kugonamu E ndipuso alendu wo atuza kuziwona malu, afikiya mu Chipinda cho chidanika kuti rotunda. Ntchitu ya kunozga so nyumba yeniyi yasazgangapu kuŵika mawindu ngo ngachitiska kuti munyumba mufundengi pamwenga muzizirengi ndipuso kuŵika ma alamu kuti ngaliyengi asani kwabuka motu.

Munthu wagwira ntchitu ya kuŵika nthambu ndipu watizilumikiza ku chipangizu chinyaki mu nyumba ya kusambiriyamu. Malu yanga atingagwiriskiya ntchitu pa kusambiza wo agwira ntchitu kuti aje ndi lusu la kuŵika ma payipi nga maji, lakunozga vinthu va magesi, ndipuso mo angachitiya kuti aleki kuchita ngozi.

Munthu wagwira ntchitu ya magesi ndipu waŵika babu la LED mu chipinda chasonu cha dipatimenti ya kusambiza ntchitu.

Munthukazi wayezga ndi tepi utali wa malu ngo pakhumbika kuja mapayipi nga magesi. Malu yanga ngakunozgeka kuti muje madipatimenti ngakupambanapambana ngo ngenga ku Brooklyn.

Munthu wawotchere mapayipi kuti mujumphengi maji ngakotcha.

Ŵanthu agwira ntchitu ya kuŵika mawindu. Nyumba yeniyi ye ndi ma windu ngakukwana 298 ndipu ma windu ngenanga ngatovya kuti ndalama za magesi zileki kusakazika munyengu ya kufunda ndipuso ya kuzizira.

Ŵanthu agwira ntchitu ya kuzenga ndipu agwiriskiya ntchitu mya yo anguzenge mpanda mu 1970. Munthu yo we ndi lusu la kuzenge mya wazenga so mpanda pafupi ndi malu ngakumikapu galimotu ngo nge pakati pa Nyumba yakwamba ya Ofesi ndi Nyumba ya Kugonamu E.

Munthulumi wapala chimati kuti wapakepu penti. Ofesi iyi, ye ndi dipatimenti ya Maakaunti, Makompyuta ndipuso dipatimenti ya Kugula Vinthu.

Munthu yo wagwira ntchitu ya magesi waguza waya pachanya pa nyumba kuti wawulumikizi ku chisulu cho chichitiska kuti malimphezi ngaleki kuwotcha vinthu. Asani limphezi laŵalika, chisulu chenichi chito nthazi ya magesi ndi kuluta nayu pasi pa dongu kuti limphezi lileki kuwotcha nyumba.

Panyengu yo agwiranga ntchitu yakusazgiyaku ma ofesi ku Wallkill, achitanga vinthu mwakuphwere pa kusalaza malu ndipuso pa kuvikiliya vimiti kusazgapu vo titiviwona pa chithuzi ichi. Thanki ya maji yo ye pa chithuzi ichi ye ndi malita 150,000 ndipu yitovya ŵanthu wosi wo aja pa malu ngenanga kuti agwiriskiyengi ntchitu. Maji ngenanga ndingu agwiriskiya so ntchitu asani kwabuka motu ku Wallkill.

Kalipentala waŵika mathabwa ngakukwana 1,800 kusina kwa chimati cha holu. Mathabwa ngenanga ngapambana kukuwa kwaki ndipu ngatovya kuti mazu ngalekengi kuvwika mwakuwerezawereza.

M’bali Charles Reed waja wachiteŵete pa Beteli kwambiya mu 1958. Iyu wawovyapu kulemba mapulanu kweniso kuŵika simenti munyumba ya kusindikiziya mabuku panyengu yo Nthambi ya ku Brooklyn yafwatuliyanga mabuku ngaku United States ndi mu vyaru vinyaki vinandi. Panyengu yo asazgiyangaku nthambi ya ku Wallkill, M’bali Reed wagwiranga ntchitu ndi timu yo yawonesesanga kuti ntchitu yo ŵanthu agwira ye umampha.

Ŵanthu agwira ntchitu ya kusiska mipandu yo yaŵikika mu makatoni ndipu aluta nayu mu holu yinyaki. Mu holu yeniyi muja ŵanthu akukwana 812.

Ntchitu ya kunozga holu yeniyi yasazgangapu kuŵika siling’i ndipuso ma, TV.

Anozga chipatala kuti madokotala nga chizgiyengemu ŵanthu akutama. Kuti madokotala ngaperekengi chovyu chakukwana ku ŵanthu akutama, angukuzga nthowa yakwendamu ndipuso mabafa ngakusambiyamu.

Chithuzi cho chilongo mo ku Wallkill kwawonekiyanga. Malu yanga, nge ndi nyumba zakugonamu abali 2,000 wo ateŵete pa Beteli. Ntchitu ya kunozga so ofesi ya nthambi ya Wallkil yo ye ndi malu ngakujumpha mamita 102,000 muvigaŵa vosi vinayi, yingumala mu November 30, 2015.