Ŵanthu wo agwira ntchitu yakunozga malu asisa vimiti. Vimiti vakujumpha 1,400 vikupandika ku Warwick.

Abali wo agwira ntchitu ku Warwick achita mwambu wa Chakurya Chamazulu cha Ambuya. Ŵanthu akukwana 384 anguza pa mwambu wo Akaboni aku Yehova achita kamoza pa chaka kuzunguliya pacharu chosi.

Makalipentala ngaŵika mawindu pa kanyumba ka pa geti. Ŵanthu wo azamujanga mu kanyumba yaka azamulondiyanga alendu, azamuvikiriya malu ndipuso azamujuliyanga magalimotu kuti ngaselengi ndi kutuwa pa Geti.

Da ndi mwana waki aŵika vigamba va kapeti mukolido, mu nyumba yachiŵi ya ofesi. Vigamba va kapeti ivi, ndivu avigwiriskikiyanga ntchitu ukongwa chifukwa asani vamala, visuzga cha kuŵikapu vinyaki.

Makalipentala ngagaŵa vipinda va maofesi ndi mathabwa. Ivi vitovya kuti aleki kusuzgika asani akhumba kusazgiyaku madipatimenti nganyaki nga maofesi.

Munthu wagwira ntchitu ya kunozga malu ngo kwazamuja vimbuzi vo ve kufupi ndi ko kufikiya alendu.

Gulu la ŵanthu wo azimwisa motu kweniso lo litovya asani kwachitika ngozi zamabuchibuchi linozgeke kuzimwisa motu. Kunozgeke vinthu venivi mwaliŵi kutovya kuti wo agwira ntchitu ya kuzimwisa motu avikiriyengi ŵanthu wo agwira ntchitu ku Warwick kweniso nyumba zo ze pa malu ngenanga.

Munthu yo wapereke chakurya ku Warwick watovya ŵanthu kuti asaniyi malu munyumba yakuryiyamu ŵechendayambi pulogilamu ya Kusopa kwa Mulenji.

Kalipentala waŵika chimoza mwa vikwangwani vakujumpha 2,500 vo vitovya alendu ndipuso ŵanthu wo aja pa malu ngenanga kuziŵa ko angaluta.

Munthu wawotchere visulu pamasitepusi. Nthowa iyi yituliya ku malu ngo kufikiya alendu ndipu yiluta ku holu yo kuchitikiya vinthu vakupambanapambana. Bulangeti lo liwoneka yapa likupangika munthowa yakuti lingafyanga cha ndi motu ndipu atiligwiriskiya ntchitu pa kubenekere visulu vo aviwotchere kali kuti vileki kunangika ndi motu wo uŵalika.

Munthu yo wagwira ntchitu ku Dipatimenti ya kunozga Vimati pamwenga Siling’i, wamalizga kunozga chimati cho chilutiliya mpaka kuchifika ko awonesiyaku malu ngo kwe vithuzi vo “Akaboni aku Yehova angulongore chivwanu.” Malu yanga ngamoza mwa malu ngatatu ngo akungapanga kuti alendu angawonengi kwambula munthu kuŵalongozga. Chigaŵa chechosi cha vinthu vo ve kwenuku chikonkhoska mutu wewosi wa chithuzi.

Ŵanthu agwira ntchitu ya kunozga pa simenti kuti paje pakulama ukongwa. Ntchitu iyi yitovya kuti simenti yileki kusunga fuvu, yijengi nyengu yitali kwambula kunangika ndipuso kuti asani magalimotu ngatendapu ngalekengi kusiyapu vidindu va matayala. Venivi vitovya kuti kunozga malu ngenanga kujengi kupusu.

Gulu la ma kalipentala liŵika magilasi pachanya pa nyumba yakufikiya alendu. Magilasi ngenanga ngatovya kuti ukweru uŵalengi mukati mwa nyumba yeniyi yo kufikiya alendu.

Munthulumi ndi muwolu waki atovyana kuŵika matayilosi. Nthowa iyi ndiyu mutenda alendu wo aluta ku malu ngo awonesiyaku ma Bayibolu ngo akulembapu zina lakuti, “Bayibolu Kweniso Zina laku Chiuta.”

Kalipentala waŵika mipandu yakujumpha 1,018 mu holu. Holu yeniyi ndiyu banja la Beteli lazamuchitiyangamu sambiru la Chigongwi cha Alinda ndipuso ma pulogilamu nganyaki ngauzimu.

Pa malu ngakufikiya alendu, makalipentala, wo agwira ntchitu za magesi kweniso wo agwira ntchitu zinyaki, aŵika chikwangwani chakuziŵisa alendu za likulu la Akaboni aku Yehova.

Ŵanthu ŵaŵi wo agwira ntchitu yakovya ŵanthu wo azenga apereka maji ku ŵanthu wo agwira ntchitu pa malu ngo pafikiya alendu. Ukongwa nyengu ya kufunda, ŵanthu wo agwiranga ntchitu yakuzenga, achiskikanga kuti amwengi maji ngakuzizira kaŵikaŵi.

Kalipentala wanozga malu ngo azamuwonesiyaku ma Bayibolu ngakali ngo ngasanirika bweka cha. Pa malu ngenanga akulembapu kuti “Bayibolu Kweniso Zina laku Chiuta.” Vinthu vinyaki vo ve pa malu yanga ativisintha asani pajumpha nyengu. Vinyaki mwa vinthu venivi ndi Mabayibolu ngo ngaleka kusanirika bweka kweniso vinthu vinyaki vakukwaskana ndi Bayibolu.

Kalipentala wagwiriskiya ntchitu pulojekita pakujambula mapu ngo ngalongo charu cha Australia ndipuso vilwa vo ve kumwera cha kuvuma kwa Asia pa malu nga kufikiya alendu. Zina la Akaboni aku Yehova lisanirika pafufupi mu vineneru vakujumpha 700 pa chimati.

Banja la Beteli lisambira mo lingagwiliskiya ntchitu vinthu vakupambapambana. Masambiru ngenanga akungajalikiska ndi chilatu chakuti alondiyengi alendu kweniso kuti ngawovyengi ŵanthu wo ayamba ŵaka sonu kuteŵete pa Beteli ya ku Warwick. Ndipu ngatcheŵeska so za vinthu vo vingachitiska ngozi.

Ŵanthu akweza chinthu chakuzunguliya cho chitovya kuti ukweru uŵalengi ukongwa ndipu aŵika visulu pachanya paki. Pasi paki pazamuja thebulu laku yo wazamuchitisanga pulogilamu ya JW Broadcasting. Visulu vosi vo ve mu situdiyo yeniyi akuchita kuvisamusa kutuwa ku ma ofesi ngakali nga ku Brooklyn.

Munthu yo wagwira ntchitu yamagesi waŵika babu la LED pa chikwangwani cha sonu cho che pa geti likulu lakuselere. Kwambiya pa 1 September, ma dipatimenti nganandi ngo ngenga ku likulu lidu ngangwamba kugwira ntchitu ku Warwick.