Pa 5 October 2013 po penga pa Chisulu, Akaboni akukwana 257,294 mu vigaŵa 21 anguvwisiya unganu wapachaka wa nambala 129 wa wupu wa Watch Tower Bible and Tract Society of Pennsylvania. Anyaki mwa ŵanthu yaŵa ŵenga pa malu ngo pachitikiyanga unganu uwu penipo anyaki anguvwisiya kuziya pa Intaneti. Pavuli paki, Akaboni anyaki anguwonere pulogilamu iyi yo yingujambulika. Ŵanthu wosi pamoza wo anguvwisiya unganu uwu ŵenga 1,413,676 mu vigaŵa 31. Paunganu uwu panguwungana Akaboni aku Yehova anandi ndipu chiŵerengeru ichi chingujumpha chiŵerengeru cha ŵanthu wo anguvwisiya unganu wapade wo unguchitika ku Mexico ndi ku Central America. Unganu uwu unguchitika pa 28 April 2013 ndipu penga akaboni akukwana 1,327,704.

Kwambiya mu vyaka va m’ma 1920, Akaboni aku Yehova aja achilumikiza malu ngakupambanapambana kuti ŵanthu avwisiyengi unganu kuziya pa telefoni pamwenga pa wayilesi. Chifukwa cha kuza kwa Intaneti, sonu ŵanthu wo alumikizika aja ndi mwaŵi wakuvwa kweniso kuwona vo vichitika nyengu yeniyo pamwenga asani pajumpha kanyengu. William, yo ndi Kaboni waku Yehova ndipu waja ku United States, wengapu paunganu wo unguchitikiya ku Richmond, Virginia, mu 1942 ndipu avwisiyanga unganu uwu kuziya pa telefoni. Pakuyeruzgiya vo vinguchitika pa nyengu iyi ndi vo vachitika chaka chinu, iyu wanguti: “Uyanduwa ukongwa ndi unganu asani uwona vo vichitika. Ndiwona kuti vipambana ukongwa ndi mo vachitikiyanga kali.”

Abali a m’maofesi nga Akaboni aku Yehova nga vyaru vakupambanapambana angugwira ntchitu kwa chaka ndi myezi kuti ajalikisi nthowa yakulumikiziyana kuziya pa Intaneti. Pa zuŵa lo unganu wachitikiyanga abali awonesesanga kuti vosi vitenda umampha ndipu achitanga venivi pa malu po penga makina ngakulu ku Brooklyn, New York. Yiwu angugona cha chifukwa malu nganyaki ngo ŵanthu anguwonere unganu uwu nyengu yapambananga ndi ya ku America ndi maola 15. Ryan yo yo wangugwiraku ntchitu pa malu ngenanga wangukamba kuti, “Tingufuŵizga tulu, kweni kuwona unandi wa ŵanthu wo anguyanduwa ndi pulogilamu iyi, kungutichitisa kuwona kuti tachita vinthu vakukhumbika ukongwa.”