1 Peturo 1:1-25
1 Ini Peturo, wakutumika waku Yesu Khristu, ndilembe yimwi alendu akumbininikiya mu Pontu, Galatiya, Kapadokiya, Asia ndi mu Bituniya, akusankhika
2 mwakukoliyana ndi kuziŵiya limu vinthu kwaku Chiuta, Ada, mwakutoweseka ndi mzimu kuti muje akuvwiya kweniso akuwazika ndi ndopa zaku Yesu Khristu, kuti:
Wezi ukulu kweniso chimangu visazgikiyeku kwaku yimwi.
3 Walumbiki Chiuta ndi Wisewu wa Ambuyafwi Yesu Khristu, pakuti chifukwa cha lisungu laki likulu wakutibala so kuti tije ndi chilindizga chamoyu kuporote mu chiyuka chaku Yesu Khristu kutuliya ku nyifwa,
4 kuluta ku chihara cho chingavunda cha, chingafipiskika cha kweniso chingatchujuka cha. Chihara ichi chikusungikiya yimwi kuchanya,
5 yimwi mwavikilirika ndi nthazi yaku Chiuta kuporote mu chivwanu cha utaski wo wazamuvumbulika mu nyengu yakumaliya.
6 Chifukwa cha venivi mukondwa ukongwa, chinanga kuti kwa kanyengu kamanavi mphakwenere kuti musuzgiki ndi mayeseru ngakupambanapambana,
7 ndi chilatu chakuti chivwanu chinu cho chayeseka, chenicho ntchakuzirwa ukongwa kuluska golidi yo wanangika chinanga kuti wayeseka* ndi motu, chikuchitiskeni kuti muthamikiki, mukankhuskiki kweniso mupaskiki ulemu pa nyengu ya kuvumbulika kwaku Yesu Khristu.
8 Chinanga kuti mukumuwonapu cha, mutimuyanja. Chinanga kuti mutimuwona cha sonu, kweni muvwana mwaku iyu ndipu mukondwa ukongwa ndi likondwa lambula makambika ndipuso launkhankhu,
9 muchilonde utaski wo ntchilatu cha chivwanu chinu.
10 Mwakukoliyana ndi utaski wenuwu, achimi wo angukambiya limu vakukwaskana ndi wezi ukulu wo ulipu chifukwa chaku yimwi, angufufuza mwaphamphu ndipuso mwakuphwere.
11 Yiwu angulutirizga kufufuza nyengu pamwenga mazuŵa ngo mzimu wo wenga mwaku yiwu unguŵalongo vakukwaskana ndi Khristu. Venga viyo chifukwa cha ukaboni wakuperekeke limu wakukwaskana ndi kusuzgika kwaku Khristu ndipuso wakukwaskana ndi unkhankhu wo wangusaniya pavuli paki.
12 Vinguvumbulika kwaku yiwu kuti ajiteŵetiyanga ŵija cha, kweni ateŵetiyanga yimwi, mwakukoliyana ndi vo sonu vapharazgika kwaku yimwi ndi ŵanthu wo angukupharazgiyani uthenga wamampha mwakugwiriskiya ntchitu mzimu wakupaturika wakutuwa kuchanya. Mu vinthu venivi, angelu akhumbisiska kulingizgamu.
13 Mwaviyo, nozgekereskani maŵanaŵanu nginu kuti mugwiri ntchitu; lutirizgani kuja masu; jani ndi chilindizga mu wezi ukulu wo mwazamulongoleka pa nyengu yakuvumbulika kwaku Yesu Khristu.
14 Nge ŵana akuvwiya, lekani kuwumbika ndi* makhumbiru ngo mwenga nangu kali po mwenga ambula kuziŵa,
15 kweni nge mo Wakupaturika yo wakukudanani waliri, namwi jani akupaturika mu vakuchita vinu vosi,
16 pakuti kukulembeka kuti: “Muje akupaturika, chifukwa ini nde wakupaturika.”
17 Ndipu asani mupempha vinthu kwa Ada wo ayeruzga mwambula kwanjiya mwakukoliyana ndi ntchitu yaku weyosi, muchitengi vinthu mwamantha pa nyengu yo mweche alendu.
18 Chifukwa muziŵa kuti vo vikukufwatuwani* ku umoyu winu wabwekabweka wo mukupaskika ndi apapi ŵinu akali,* ndi vinthu vakuti vingavunda cha, nge siliva pamwenga golidi.
19 Kweni mukufwatulika ndi ndopa zakuzirwa zaku Khristu nge za mwana wambereri wambula kalema pamwenga donthu.
20 Kukamba uneneska, iyu wanguziŵikiya limu charu chechendajalikiskiki, kweni wanguziwoneke kukumaliya kwa nyengu chifukwa chaku yimwi.
21 Kuporote mwaku iyu, mwaŵa akugomezga Chiuta yo wakumuyuska ku nyifwa ndi kumupaska unkhankhu, kuti chivwanu ndi chilindizga chinu vije mwaku Chiuta.
22 Sonu pakuti mwajitowesa chifukwa cha kuvwiya uneneska, vo vachitiska kuti muyanjengi abali kwambula chinyengu, muyanjanengi ukongwa ndipuso ndi mtima wosi.
23 Pakuti mbewu yo yingavunda ndiyu yakubalani cha, kweni mwabalika ndi mbewu yakuti yingavunda cha* kuporote mu mazu ngaku Chiuta wamoyu kweniso wamuyaya.
24 Pakuti “ŵanthu wosi ŵe nge uteka, ndipu unkhankhu wawu we nge luŵa lakudondu; uteka ufota ndipu luŵa lithothoka,
25 kweni mazu ngaku Yehova ngajengepu mpaka muyaya.” Ndipu uthenga wamampha wo ukupharazgika kwaku yimwi ndiwu “mazu” ngenanga.
Mazu Ngam'mphata
^ Pamwenga kuti, “wayengetulika.”
^ Pamwenga kuti, “lekani kulondo.”
^ Mazu ngaki chayingu, “vo vikukuwomboni.”
^ Pamwenga kuti, “mukupaskika mwa mudawuku.”
^ Kung’anamuwa mbewu yo yingapasa vipasu.
