Filimoni 1:1-25
1 Ini Paulo, mkayidi chifukwa chaku Khristu Yesu, nde limoza ndi Timote mubali widu, ndipu ndilembe Filimoni wantchitu munyidu wakwanjiwa,
2 ndipuso mzichi widu Apufiya, Arikipo msilikali munyidu ndipuso mpingu wo uwungana munyumba yaku, kuti:
3 Wezi ukulu kweniso chimangu, vakutuliya kwaku Chiuta Awusefwi ndi Yesu Khristu Ambuya viŵi namwi.
4 Ndiwonga Chiuta wangu nyengu zosi asani nditikuzumbuwa mu mapempheru ngangu,
5 po ndilutirizga kuvwa vakukwaskana ndi chivwanu chaku ndi chanju cho we nachu kwa Ambuya Yesu ndi akupaturika wosi.
6 Ndipemphera kuti chivwanu cho ulongo anyaku, chikuwovyi kuziŵa vinthu vamampha vo te navu kuporote mwaku Khristu.
7 Pakuti ndingukondwa ukongwa kweniso ndingupembuzgika ndati ndavwa vakukwaskana ndi chanju chaku, chifukwa mitima ya akupaturika yasisipulika* kuporote mwaku yiwi, mubali.
8 Pa chifukwa chenichi, chinanga kuti nde ndi wanangwa ukulu wakulongoro mwakukoliyana ndi Khristu wakukulamula kuti uchitengi cho ntchakwenere,
9 nditikupempha chifukwa cha chanju pakuwona kuti ini Paulo, nde munthu mura, kweniso nde mkayidi chifukwa chaku Khristu Yesu.
10 Nditikupempha chifukwa cha mwana wangu Onesimo, yo ndinguja wisi nde mujeri.*
11 Kali wenga wambula ntchitu kwaku yiwi kweni sonu ngwakukhumbika kwaku yiwi ndipuso kwaku ini.
12 Nditimuweze so kwaku yiwi, iyu ndi munthu wapamtima pangu.*
13 Ndakhumbanga kumusunga kunu kuti waje nani ndi chilatu chakuti wasere mumalu mwaku, pakunditeŵete pa nyengu yo nde mujeri chifukwa cha uthenga wamampha.
14 Kweni ndakhumba cha kuchita chechosi kwambula yiwi kuzomereza, kuti ntchitu zaku zamampha zichitiki mwambula kuchichizgika kweni mwakukhumba wija.
15 Panyaki ndichu chifukwa chaki wangukuthaŵa kwa kanyengu kamanavi,* kuti po waziyengi uzije nayu kwamuyaya,
16 nge kapolu so cha kweni nge wakuluska kapolu, nge mubali yo ini nditimuyanja, kweniso yo yiwi utimuyanja ukongwa, posi paŵi mwakuliŵavu kweniso mwa Ambuya.
17 Sonu asani utindiwona nge nde munyaku,* umulonde mwachanju nge mo watingi ulondeliyengi ini.
18 Kweniso asani wakukunangiya chechosi pamwenga we nawi ndi ngongoli yeyosi, mulandu wo uje wangu.
19 Ini Paulo ndilemba ndi janja langu kuti: Ndazamuweziyapu. Ndikhumbika cha kuzumbuwa venivi, pakuti nawi we nani ndi ngongoli ya umoyu waku.
20 Mubali wangu, ndikhumba kuti undiwovyi pa nkhani yeniyi mwakukoliyana ndi Ambuya; usisipuwi mtima wangu* mwakukoliyana ndi Khristu.
21 Nde ndi chigomezgu kuti uchitengi mwakukoliyana ndi venivi, mwaviyo nditikulembe chifukwa ndiziŵa kuti uchitengi vakuluska vo ndikamba.
22 Kweniso kusazgiyapu pa venivi, nozga malu ngakuti ndizijeku, chifukwa ndikhaza kuti kuporote mu mapempheru nginu, ndizengi so kwaku yimwi.*
23 Epafura kapolu munyangu mwakukoliyana ndi Khristu Yesu, watikutawuzga,
24 Mariko, Arisitako, Demasi ndi Luka wo mbantchitu anyangu, nawu atikutawuzga.
25 Wezi ukulu wa Ambuya Yesu Khristu uŵi namwi chifukwa cha mzimu wo mulongo.
Mazu Ngam'mphata
^ Pamwenga kuti, “chifukwa chanju cha akupaturika chasisipulika.”
^ Mazu ngaki chayingu, “nde musimbi.”
^ Pamwenga kuti, “iyu nditimuyanja ukongwa.”
^ Mazu ngaki chayingu, “kwa ora limoza.”
^ Mazu ngaki chayingu, “nde wakusangana nawi.”
^ Pamwenga kuti, “usisipuwi chanju changu.”
^ Pamwenga kuti, “ndifwatulikiyengi yimwi.”
