Machitidu 12:1-25
12 Pa nyengu yeniyo, fumu Herodi yingwamba kutombozga ŵanthu anyaki a mu mpingu.
2 Herodi wangubaya Yakobe mku waku Yohane ndi lipanga.
3 Wati wawona kuti venivi vakondwesa Ayuda, wangumanga so Peturo. (Ivi vinguchitika mu mazuŵa nga Viŵandi Vambula Chakutupisa.)
4 Wangumuko ndi kumuponya mujeri kweniso wangumuŵikiya magulu nganayi nga asilikali wo ŵenga alonda, ndipu gulu lelosi lenga ndi asilikali anayi. Iyu wakhumbanga kuti wazimulongo ku ŵanthu* asani Pasika wajumphapu.
5 Sonu Peturo wanguŵikika mujeri, kweni mpingu wamupempheriyanga ndi mtima wosi kwaku Chiuta.
6 Usiku wakuti mawa laki, Herodi wamulongongi ku ŵanthu, Peturo wangugona pakati pa asilikali ŵaŵi, angumumanga ndi simbi ziŵi, kweniso pakhomu penga alonda wo avikiliyanga jeri lo.
7 Kweni awonani! mungelu waku Yehova wanguma penipo, ndipu ukweru unguŵala mujeri. Mungelu yo wangugunyuwa Peturo mumbaŵala ndi kumuyuska ndipu wangumukambiya kuti: “Soka liŵi!” Ndipu simbi zo zenga mumanja mwaki zinguwa pasi.
8 Mungelu yo wangumukambiya kuti: “Vwala malaya ndipuso vwala sapatu zaku.” Ndipu Peturo wanguchita vo mungelu wangumukambiya. Pakumaliya wangumukambiya kuti: “Vwala malaya ngakubwalu, ndipu ndilondongi.”
9 Peturo wangutuwa pabwalu ndipu walondonga mungelu, kweni waziŵanga cha kuti vo vachitikanga kuporote mwa mungelu venga chayivu. Iyu waŵanaŵananga kuti wawona ŵaka chiwona.
10 Ŵati ajumpha gulu lakwamba la alonda kweniso gulu lachiŵi, angufika pageti lachisulu lakuselere mutawuni, ndipu geti lo linguŵajulikiya lija. Ŵati atuliya kubwalu, angwende limoza mumsewu ndipu nyengu yeniyo mungelu yo wanguwoneka so cha.
11 Peturo wati wawamu vo vachitikanga, wangukamba kuti: “Sonu ndaziŵa nadi kuti Yehova wangutumiza mungelu waki kuti wazinditaski mu manja mwaku Herodi kweniso ku vinthu vosi vo Ayuda alindizganga kuti vichitikengi.”
12 Wati waziŵa venivi, wanguluta kunyumba yaku Mariya nyina waku Yohane yo wadanikanga so kuti Mariko, ko kunguwungana ŵanthu anandiku wo apempheranga.
13 Wati wagong’oska pageti, msungwana wantchitu yo wadanikanga kuti Roda, wanguluta kuchiwonaku.
14 Wati waŵanika mazu ngaku Peturo, wangukondwa ukongwa mwakuti wangujulapu cha pageti, mumalu mwaki wanguwere ŵaka mukati ndi kuchikamba kuti Peturo we pageti.
15 Yiwu angumukambiya kuti: “Wazunguliya mutu kwali.” Kweni iyu wangulimbikiya kukamba kuti waneneska. Sonu yiwu angwamba kukamba kuti: “Ndi mungelu waki.”
16 Kweni Peturo wangulutirizga kuja penipo ndipu wagong’oskanga. Ŵati ajula geti angumuwona ndipu anguzizwa ukongwa.
17 Kweni iyu wanguŵasiniza ndi janja kuti aje cheti ndipu wanguŵakonkhoske mo Yehova wangumutuzgiya mujeri. Ndipuso wanguŵakambiya kuti: “Vinthu venivi mukakambiyi Yakobe ndi abali.” Wati wakamba venivi wangutuwa ndi kuluta kunyaki.
18 Kwati kwacha, asilikali angutimbanyizgika kuti ntchinthu wuli cho chachitikiya Peturo.
19 Herodi wanguyesesa kumupenjapenja, kweni wangumusaniya cha. Iyu wangufumba asilikali wo kuti akambi umampha ndipu wangulamula kuti alangiki. Pavuli paki, Herodi wangutuwa ku Yudeya ndi kuluta ku Kayisareya ndipu wanguja kweniko kwa kanyengu.
20 Sonu Herodi wangukwiyiya* ŵanthu a ku Turo ndi Sidoni. Yiwu angukoliyana chinthu chimoza ndi kuza kwaku iyu. Ŵati anyengere Bulasito, mweniyo wawoneriyanga nyumba ya* fumu Herodi, angupempha chimangu, chifukwa charu chawu chalondiyanga chakurya kutuliya mucharu cho Herodi wawusanga.
21 Pa chakuchitika chapade, Herodi wanguvwala malaya ngaki nga ufumu, wanguja pampandu wakuyeruzgiyapu milandu ndipu wangwamba kulongoro ndi ŵanthu.
22 Sonu ŵanthu wo anguwungana angwamba kudaniriza kuti: “Ndi chiuta yo walongoro, ndi munthu cha!”
23 Nyengu yeniyo, mungelu waku Yehova wangumulanga, chifukwa wangukankhuska Chiuta cha. Iyu wanguryika ndi mphorozi ndipu pavuli paki wangufwa.
24 Kweni mazu ngaku Yehova ngangulutirizga kukuwa ndi kusapaliya.
25 Kweni Baranaba ndi Saulo ŵati amaliza kugwira ntchitu yakupereka chovyu ku Yerusalemu, anguweku ndipu anguto Yohane yo wadanikanga kuti Mariko.
Mazu Ngam'mphata
^ Pamwenga kuti, “wazimulongo ku ŵanthu kuti amumbi mulandu.”
^ Pamwenga kuti, “wakhumbanga kuchita nkhondu ndi.”
^ Mazu ngaki chayingu, “chipinda cha.”
