Yakobe 1:1-27
1 Ini Yakobe, kapolu waku Chiuta ndipuso wa Ambuya Yesu Khristu, ndilembe mafuku 12 ngo ngakumbininika kuti:
Timoneni!
2 Abali ŵangu, mukondwengi asani mukumana ndi masuzgu ngakupambanapambana,
3 pakuti muziŵa kuti chivwanu chinu chakuyeseka chibala kukunthiyapu.
4 Kweni zomerezani kuti kukunthiyapu kumalizi kugwira ntchitu yaki, ndi chilatu chakuti muje akukwana ndipuso ambula kalema pa chinthu chechosi, kweniso ambula kusoŵa kanthu.
5 Sonu asani munthu munyaki wasoŵa zeru, walutirizgi kupempha kwaku Chiuta ndipu wamupaskengi, pakuti iyu wapereka ndi mtima wosi kwaku weyosi ndipuso wakontho cha.
6 Kweni walutirizgi kupempha mwachivwanu, wangakayikanga cha chinanga nkhamanavi, pakuti yo wakayika waja nge jiŵa la munyanja lo litutuzgika ndi mphepu kweniso liyingayinga ŵaka.
7 Ndipu munthu waviyo wangaŵanaŵananga cha kuti walondiyengi kanthu kekosi kwaku Yehova,
8 pakuti iyu ndi munthu wakukayika, ndipuso ngwakusaŵasaŵa mu nthowa zaki zosi.
9 Kweni mubali mukavu wakondwi* chifukwa wakwezeka,
10 ndipu wakukhupuka wakondwi ndi kuyuyulika kwaki, chifukwa wamalengi nge luŵa la kudondu.
11 Pakuti nge mo lumwi lituliya ndi kotcha kwaki, lifotesa vakume ndi kuwisa maluŵa nga vakume vo, ndipu kutowa kwa vakume vo kumala, ndimu so munthu wakukhupuka wamaliya wechendafiski vo wapenja.
12 Ngwakutumbikika munthu yo walutirizga kukunthiyapu mayeseru, chifukwa asani wazomerezeka wazamulonde chisoti* chaumoyu, chenicho Yehova wakulayizga ŵanthu wo alutirizga kumuyanja.
13 Asani munthu wateseka, wangakambanga cha kuti: “Ndiyeseka ndi Chiuta.” Pakuti Chiuta wayeseka cha ndi vinthu viheni ndipuso iyu mweneku watesa munthu weyosi cha.
14 Kweni munthu weyosi wateseka asani wakopeka ndipuso wanyengeka ndi khumbiru la mweneku.
15 Sonu asani khumbiru lame nthumbu, libala ubudi, ndipu pavuli paki asani ubudi wachitika, ubala nyifwa.
16 Abali ŵangu akwanjiwa, mungalandizgikanga cha.
17 Mphasu yeyosi yamampha ndipuso yakufikapu yituliya kuchanya. Yisika kutuwa kwa Ada a maukweru ngosi ngakuchanya, wo asinthasintha cha nge mo vithuthuzi visinthiya.
18 Lenga khumbu laki kuti watibali mwakugwiriskiya ntchitu mazu nga uneneska, ndi chilatu chakuti tije vipasu vakwamba pa vamoyu vo wakulenga.
19 Abali akwanjiwa, ziŵani ichi: Munthu weyosi waje mpusu kuvwa, wakusweriyapu kulongoro, ndipuso wambula kukwiya liŵi,
20 Pakuti ukali wa munthu ubala urunji waku Chiuta cha.
21 Mwaviyo tayani kutali ukazuzi wewosi ndipuso uheni wewosi,* ndipu muzomerezi mwakuzika kuti mazu ngo ngangakutaskani ngapandiki mwaku yimwi.
22 Kweni muchitengi vo mazu ngakamba ndipu mungavwanga ŵaka cha, ndi kujipusika ndi maŵanaŵanu ngaboza.
23 Pakuti asani munthu munyaki watuvwa ŵaka vo mazu ngakamba kweni wachita cha, walingana ŵaka ndi munthu yo walereska chisku chaki pagilasi.
24 Pakuti watijilereska, pavuli paki watuwapu ndipu nyengu yeniyo waluwa kuti ndi munthu wamtundu wuli.
25 Kweni munthu yo walereseska mu dangu lakufikapu lakulongozge ku wanangwa ndipu walutirizga kuchita viyo, waja munthu wakuvwa ndi kuluwa cha, kweni wakuchita, ndipu wakondwengi ndi vo wachita.
26 Asani munthu munyaki waŵanaŵana kuti ngwakusopa Chiuta kweni watiliko* cha lilimi laki, wapusika mtima waki ndipu kusopa kwaki nkhwaŵaka.
27 Kusopa kwakutowa ndipuso kwambula kufipiskika pa masu paku Chiuta widu kweniso Awusefwi ndi uku: kuphwere ŵana alanda ndi vyoko mu masuzgu ngawu, kweniso kujisunga wambula kalema mucharu.
Mazu Ngam'mphata
^ Mazu ngaki chayingu, “wamaliki.”
^ Chisoti ichi, ndi mphotu yo ŵanthu alonde pa maphara.
^ Panyaki kuti, “kuzara kwa uheni.”
^ Pamwenga kuti, “watilimanga.”
