Yakobe 2:1-26
2 Abali ŵangu, asani muchita vinthu mwakwanjiya, kumbi ndikuti mwe ndi chivwanu mwaku Yesu Khristu, Ambuyafwi aunkhankhu?
2 Pakuti asani munthu wakuvwala mpheti zagolidi muvikumbu vaki ndipuso wakuvwala vakuvwala vakudula, waza pa unganu winu, kweniso munthu mukavu wakuvwala vakuvwala vabwekabweka nayu waza,
3 kumbi mutanjiya munthu wakuvwala vakuvwala vakudula ndi kukamba kuti, “Ja yapa pamalu ngamampha,” ndipu mukambiya munthu mukavu kuti, “Lutirizga kuma wima” pamwenga “Kaje pachakukandapu maphazi ngangu pa”?
4 Asani muchita viyo, asi ndikuti mwayamba kusankhana mwijamwija ndipuso mwayamba kuyeruzgana uheni?
5 Avwani abali ŵangu akwanjiwa. Asi Chiuta wakusankha ŵanthu wo charu chitiŵawona kuti mbakavu, kuti aje akukhupuka mu chivwanu ndipuso kuti aje akuhara Ufumu weniwo wakulayizga ŵanthu wo atimuyanja?
6 Kweni sonu muyuyuwa akavu. Asi mbakukhupuka ŵenaŵa wo atikukandirizgani ndi kukuguguziyani kumakhoti?
7 Asi yiwu anyoza zina lamampha lo mukupaskika?
8 Asani sonu mulondo dangu laufumu mwakukoliyana ndi lemba lo likamba kuti, “Uyanjengi munyaku nge mo utijiyanjiya wamweni,” ndikuti muchita umampha ukongwa.
9 Kweni asani mulutirizga kwanjiya, ndikuti muchita ubudi ndipuso dangu litikusimikizani* kuti mwe ambula kuvwiya marangu.
10 Pakuti asani munthu wasunga Dangu* kweni wanangisa kanthu kanyaki, ndikwesa wanangiya Dangu* losi.
11 Pakuti mweniyo wakukamba kuti, “Ungachitanga chigololu cha,” ndiyu so wakukamba kuti, “Ungabayanga munthu cha.” Sonu asani uchita cha chigololu kweni ubaya munthu, ndikuti uvwiya cha dangu.
12 Lutirizgani kulongoro ndi kuchita vinthu nge ŵanthu wo azamuyeruzgika ndi dangu la ŵanthu anangwa.*
13 Pakuti munthu wambula lisungu, wazamuyeruzgika mwambula lisungu. Lisungu liluska cheruzgu.
14 Abali ŵangu, pe phindu wuli asani munthu munyaki wakamba kuti we ndi chivwanu kweni walivi ntchitu za chivwanu cho? Chivwanu chaviyo chingamutaskapu cha, asi viyo?
15 Asani mubali pamwenga muzichi wasoŵa chakuvwala* pamwenga wasoŵa chakurya chakukwana cha pa zuŵa lo,
16 kweni munyaki waku yimwi watiŵakambiya kuti, “Lutani muchimangu; mukafundisiki ndipu mukaryi umampha,” penipo mwaŵapaska cha vo akhumbika paliŵavu lawu, pe phindu wuli?
17 Mwakuyanana ŵaka, chivwanu pakuchija, asani chilivi ntchitu zaki, ntchakufwa.
18 Kweni munyaki wangakamba kuti: “Yiwi we ndi chivwanu, ndipu ini nde ndi ntchitu. Ndilongo chivwanu chaku kwambula ntchitu, ndipu nani ndikulongongi chivwanu changu mwa ntchitu zangu.”
19 Asi yiwi ugomezga kuti kwe Chiuta yumoza? Uchita umampha ukongwa. Viŵanda navu vigomezga ndipu vimbwambwanthiya.
20 Wamunthu mubulu yiwi, kumbi ukhumba kuziŵa kuti chivwanu chambula ntchitu zaki ntchakufwa?
21 Asi wusefwi Abrahamu wangukambika kuti ndi murunji chifukwa cha ntchitu wati wapereka sembi mwana waki Isaki pamalu ngakuperekiyapu sembi?*
22 Wona kuti chivwanu chaki chenga chamoyu chifukwa cha ntchitu zaki, ndipuso kuti chivwanu chaki chinguja chakufikapu chifukwa cha ntchitu zaki,
23 ndipu lemba lingufiskika lo likamba kuti: “Abrahamu wenga ndi chivwanu mwaku Yehova ndipu Chiuta wanguwona kuti vo wanguchita wenga urunji,” mwaviyo wangudanika kuti mubwezi waku Yehova.
24 Mwawona kuti munthu wakambika kuti ndi murunji chifukwa cha chivwanu pe cha, kweni chifukwa cha ntchitu.
25 Mwakuyanana ŵaka, asi Rahabi yo wenga huli nayu wangukambika kuti ndi murunji chifukwa cha ntchitu, wati walonde umampha nthumi ndi kuzikambiya kuti zituliyi kunthowa yinyaki?
26 Ndipu kukamba uneneska, nge mo liŵavu lambula mzimu* liŵiya lakufwa, chivwanu chambula ntchitu zaki nachu ntchakufwa.
Mazu Ngam'mphata
^ Pamwenga kuti, “litikuchenyani.”
^ Wonani Mazu ngo Ngakonkhoskeka.
^ Wonani Mazu ngo Ngakonkhoskeka.
^ Mazu ngaki chayingu, “dangu la wanangwa.”
^ Mazu ngaki chayingu, “ngwankhuli.”
^ Pamwenga kuti, “pajotcheru.”
^ Pamwenga kuti, “mvuchi.”
