Yakobe 4:1-17
4 Kumbi ntchinthu wuli cho chitambisa nkhondu ndi ndewu pakati pinu? Asi vituliya mu makhumbiru nga liŵavu ngo ngachita nkhondu mukati mwinu?*
2 Mukhumbira kweni musaniya cha. Mulutirizga kubaya ŵanthu ndi kuchita mbunu, kweni mutondeka kusaniya. Mulutirizga kupumana kweniso kuchita nkhondu. Mulivi, chifukwa chakuti mupempha cha.
3 Ndipu asani mupempha, mulonde cha chifukwa mupempha ndi chilatu chiheni, kuti muvigwiriskiyi ntchitu pa makhumbiru nginu nga liŵavu.
4 Achigololu* yimwi, kumbi muziŵa cha kuti kuja pa ubwezi ndi charu nkhujiŵika pa urwani ndi Chiuta? Mwaviyo, weyosi yo wakhumba kuja pa ubwezi ndi charu watijipanga kuja murwani waku Chiuta.
5 Pamwenga kumbi muŵanaŵana kuti lemba likamba ŵaka kuti: “Mzimu wambunu wo we mwaku isi ulutirizga kukhumba vinthu vosi”?
6 Kweni wezi ukulu wo Iyu wapereka ngukulu ukongwa. Mwaviyo lemba likamba kuti: “Chiuta wasuska akujikuzga, kweni walongo wezi ukulu ku ŵanthu akujiyuyuwa.”
7 Mwaviyo, jithereskeni kwaku Chiuta, kweni suskani Dyaboli ndipu iyu wakuthaŵeningi.
8 Ndereni kufupi ndi Chiuta, ndipu nayu wanderengi kufupi ndi yimwi. Towesani manja nginu yimwi akubuda, ndipuso towesani mitima yinu yimwi akukayikakayika.
9 Jani achitima, liyani ndi kutenje. Kuseka kwinu kusambuki kuliya, ndipu likondwa linu lisambuki chitima.
10 Jiyuyuweni pa masu paku Yehova, ndipu iyu wakukwezeningi.
11 Abali, lekani kunenana. Weyosi yo wanena mubali pamwenga wayeruzga mubali waki, wanyoza dangu kweniso wayeruzga dangu. Sonu asani uyeruzga dangu, ndikuti uchita cha vo dangu likamba, kweni waja wakweruzga.
12 Wakupereka Marangu ndipuso Wakweruzga walipu yumoza pe, mweniyo wangataska ndi kunanga. Kweni yiwi ndiwi yani kuti uyeruzgi munyaku?
13 Sonu vwani kunu yimwi mukamba kuti: “Msanawale pamwenga mawa tilutengi kutawuni yakutiyakuti, ndipu tamujaku chaka chimoza. Tamuchita malonda ndi kusaniya phindu,”
14 penipo muziŵa cha mo umoyu winu uŵiyengi mawa, pakuti mwe nge nyankhuŵinda yo wabuka kwa kanyengu kamanavi mbwenu wasoŵa.
15 Kweni mumalu mwaki mukambengi kuti: “Asani Yehova wakhumba, tijengi ndi umoyu, tichitengi ivi pamwenga viya.”
16 Kweni sonu munyada ukongwa ndi kujikuzga kwinu. Kujiŵikamu kwaviyo nkhuheni.
17 Mwaviyo asani munthu munyaki waziŵa mo wangachitiya chamampha, kweni waleka kuchichita, ndikuti wachita ubudi.
Mazu Ngam'mphata
^ Mazu ngaki chayingu, “muviŵalu va liŵavu linu.”
^ Pamwenga kuti, “Ambula kugomezgeka.”
