Yakobe 5:1-20
5 Avwani yimwi ŵanthu akukhupuka, liyani ndi kutenje chifukwa cha masuzgu ngo ngatuza paku yimwi.
2 Chuma chinu chavunda ndipu vakuvwala vinu varyika ndi nyenji.*
3 Golidi ndi siliva winu vachita ulosu ndipu ulosu waki wazamuja kaboni winu ndipuso wazamukurya liŵavu linu. Vo mwasunga vazamuja nge motu mu mazuŵa ngakumaliya.
4 Awonani! Malipiru nga ŵanthu wo agwira ntchitu yakuvuna muminda yinu ngo mwaleka kuŵapaska, ngaliya, ndipu kuliya kwa akuvuna wo akhumba chovyu, kwavwika mumakutu ngaku Yehova wa mizinda.
5 Mwaja ndi umoyu wapachanya ndipuso mwakhorwesa makhumbiru nginu pacharu chapasi. Mwatutuŵisa mitima yinu pa zuŵa lakubayikiya.
6 Mwayeruzga; mwabaya munthu murunji. Asi iyu watikususkani?
7 Mwaviyo, abali zizipizgani mpaka pa kuŵapu kwa Ambuya. Awonani! Mlimi walindizga chipasu chakuzirwa cha charu, wazizipizga mpaka po vuwa yalowoke ndipuso mpaka po vuwa yakumaliya yaziya.
8 Yimwi namwi zizipizgani; chitiskani mitima yinu kuja yakukho, chifukwa kuŵapu kwa Ambuya kwe pafupi.
9 Abali, mungadinginyikiyananga* cha, kuti muleki kuyeruzgika. Awonani! Wakweruzga wama pafupi ndi khomu.
10 Abali, pa nkhani yakusuzgika kweniso kuzizipizga, toliyaniku chakuwoniyapu cha achimi wo angulongoro mu zina laku Yehova.
11 Awonani! ŵanthu wo akukunthiyapu titiŵawona kuti mbakutumbikika. Mukuvwa va kukunthiyapu kwaku Yobu kweniso mwawona vo Yehova wangumupaska ndipuso mwawona kuti Yehova ngwachanju chikulu ukongwa* kweniso ngwalisungu.
12 Abali ŵangu, chakukhumbika ukongwa ntchakuti muleki kulapizga mwakuzumbuwa kuchanya pamwenga charu chapasi pamwenga chinthu chinyaki chechosi. Kweni “Hinya” winu waje hinya ndipu “Awa” winu waje awa, kuti muleki kuyeruzgika.
13 Kumbi walipu pakati pinu yo wasuzgika? Walutirizgi kupemphera. Kumbi walipu pakati pinu yo wakondwa? Wambi sumu zakuthamika Chiuta.
14 Kumbi walipu pakati pinu yo watama? Wajidaniyi ŵara a mpingu ndipu amupemphere, amupaki mafuta mu zina laku Yehova.
15 Pempheru la munthu wachivwanu lazamuchizga munthu yo watama,* ndipu Yehova wazakumuyuska. Ndipuso asani wakuchita maubudi, wazamugowokereka.
16 Mwaviyo, sumuliyanani maubudi ndipuso pempheriyanani kuti muchizgiki. Pempheru lakuŵeyere la munthu murunji le ndi nthazi ukongwa.*
17 Eliya wenga munthu ŵaka nge isi, kweni wati wapemphera ndi mtima wosi kuti vuwa yileki kuwa, yinguwa nadi cha pacharu kwa vyaka vitatu ndi myezi 6.
18 Pavuli paki wangupemphera so, vuwa yinguwa kutuwa kuchanya ndipu charu chingupasa vipasu.
19 Abali ŵangu, asani munthu munyaki pakati pinu walandizgika ndi kutuwaku ku uneneska ndipu munthu munyaki wamuweza,
20 ziŵani kuti munthu yo waweza wakubuda ku ubudi waki, wamutaska* ku nyifwa ndipu wabenekere maubudi nganandi.
Mazu Ngam'mphata
^ Mazu nga Chigiriki ngo ngafwatulikiya kuti nyenji ngang’anamuwa kachidononu kakuphululuka ko katurya vakuvwala.
^ Pamwenga kuti, “mungadandawuliyananga.” Mazu ngaki chayingu, “mungadaŵiyananga.”
^ Pamwenga kuti, “ngwachitima ukongwa.”
^ Panyaki kuti, “munthu wakuvuka.”
^ Mazu ngaki chayingu, “le ndi nthazi ukongwa asani ligwira ntchitu.”
^ Pamwenga kuti, “wataska umoyu waki.”
