Buku Lakwamba la Mbiri 10:1-14
-
Nyifwa yaku Sauli ndi ŵana ŵaki anthulumi (1-14)
10 Sonu Afilisiti achitanga nkhondu ndi Ayisirayeli. Ayisirayeli anguthaŵa pa masu pa Afilisiti ndipu ŵanthu anandi angubayika pa Phiri la Gilibowa.+
2 Afilisiti angutchimbiza Sauli ndi ŵana ŵaki ndipu ŵenga nawu pafupi ukongwa. Yiwu angubaya Yonatani, Abinadabu ndi Malaki-shuwa,+ ŵana anthulumi aku Sauli.
3 Nkhondu yingumukuliya ukongwa Sauli, ndipu akuponya mivi mwakugwiriskiya ntchitu uta angumusaniya mwakuti angumupweteka.+
4 Sonu Sauli wangukambiya munthu yo wamupingiyanga vidya kuti: “Solo lipanga laku ndipu undigwazi nalu, kuti ŵanthu ambula kudumulika yaŵa aleki kundichitiya nkhaza.”*+ Kweni munthu yo wamupingiyanga vidya wangukana chifukwa wenga ndi mantha ukongwa. Mwaviyo, Sauli wanguto lipanga laki ndipu wanguwiyapu.+
5 Munthu yo wamunyamuliyanga vidya wati wawona kuti Sauli wafwa, nayu so wanguwiya pa lipanga laki ndipu nayu wangufwa.
6 Mwaviyo, Sauli ndi ŵana ŵaki anthulumi atatu angufwa, ndipu ŵanthu wosi a munyumba yaki angufwiya limoza.+
7 Ayisirayeli wosi wo ajanga mudambu,* ŵati awona kuti weyosi wathaŵa ndipuso kuti Sauli ndi ŵana ŵaki afwa, angwamba kusiya matawuni ngawu ndi kuthaŵa. Pavuli paki Afilisiti anguza ndi kuja mumatawuni ngenanga.
8 Mawa laki, Afilisiti ŵati aza kuti aziŵazuwi vakuvwala ŵanthu wo angubayika, angusaniya kuti Sauli ndi ŵana ŵaki anthulumi afwa pa Phiri la Gilibowa.+
9 Mwaviyo, yiwu angumuzuwa ndipuso angumudumuwa mutu ndi kuto vidya vaki vankhondu. Pavuli paki yiwu angutuma uthenga mucharu chosi cha Afilisiti kuti apharazgi uthenga wenuwu kwa angoza ŵawu+ kweniso ku ŵanthu.
10 Pakumaliya yiwu anguŵika vidya vaki vankhondu munyumba* yaku chiuta wawu, kweniso angukhoma mutu waki kunyumba yaku Dagoni.+
11 Sonu ŵanthu wosi a ku Yabeshi+ ku Giliyadi ŵati avwa vosi vo Afilisiti anguchitiya Sauli,+
12 asilikali wosi wo ŵenga vinkhara angusoka ndipu anguchito thupi laku Sauli kweniso mathupi nga ŵana ŵaki. Yiwu anguza nangu ku Yabeshi ndipu viwanga vawu anguviŵika mumuwunda musina mwa chimiti chikulu ku Yabeshi.+ Pavuli paki angufunga kwa mazuŵa 7.
13 Mwaviyo, Sauli wangufwa chifukwa wangulongo kuti wenga wambula kugomezgeka kwaku Yehova, pakuti wanguvwiya cha mazu ngaku Yehova,+ kweniso chifukwa chakuti wanguchifumba munthu yo walongoronga ndi mizimu+
14 mumalu mwakufumba Yehova. Mwaviyo, Iyu wangumubaya ndipu ufumu waki wanguwupereka kwaku Davidi mwana waku Jese.+
Mazu Ngam'mphata
^ Pamwenga kuti, “phuzu.”
^ Pamwenga kuti, “muchidika.”
^ Pamwenga kuti, “munyumba yakusopiyamu.”
