Buku Lakwamba la Mbiri 12:1-40
-
Ŵanthu wo awovyanga ufumu waku Davidi (1-40)
12 Yaŵa mbanthulumi wo anguza kwaku Davidi ku Zikilagi+ pa nyengu yo watondekanga kwenda mwakufwatuka chifukwa chaku Sauli+ mwana waku Kishi, ndipu ŵanthu ŵenaŵa ŵenga pa gulu la asilikali anthazi wo amuwovyanga pa nkhondu.+
2 Yiwu anyamuwanga mauta ndipuso agwiriskiyanga ntchitu manja ngosi ngaŵi, lamaryi ndi lamazge+ pakuponya mya mwakugwiriskiya ntchitu chakuponye,+ kweniso pakuponya mivi mwakugwiriskiya ntchitu uta. Ŵanthu ŵenaŵa ŵenga abali aku Sauli, a mu fuku laku Benjamini.+
3 Penga Ahiyezeri yo wenga mulongozgi wawu kweniso Yowashi, wosi ŵaŵi ŵenga ŵana aku Shema wa ku Gibeya;+ Yeziyeli ndi Peleti ŵana aku Azimaveti,+ Beraka, Yehu wa ku Anatoti,
4 Ishimaya wa ku Gibiyoni+ yo wenga pa gulu la asilikali anthazi 30+ ndipuso yo wenga mulongozgi wa asilikali 30 ŵenaŵa; penga so Yeremiya, Yahaziyeli, Yohanani, Yozabadi wa ku Gedera,
5 Eluzayi, Yerimoti, Beyaliya, Shemariya, Shefatiya Mharifu,
6 Elikana, Isishaya, Azareli, Yoweza ndi Yashobimu wa mu banja laku Kora;+
7 Kweniso Yowela ndi Zebadiya ŵana aku Yerohamu wa ku Gedori.
8 Ŵanthu anyaki a mu fuku laku Gadi anguluta kuchigaŵa chaku Davidi kumalu ngakusuzga kufikaku kuchipululu.+ Ŵanthu ŵenaŵa ŵenga asilikali anthazi, asilikali wo angusambizika kuchita nkhondu ndipuso ŵenga akunozgeka kuchita nkhondu mwakugwiriskiya ntchitu vishangu vikuluvikulu kweniso mikondu. Visku vaŵu vawonekanga nge visku va nkharamu ndipuso atchimbiyanga nge mbaŵa.
9 Ezeri ndiyu wenga mulongozgi, wachiŵi Obadiya, wachitatu Eliyabu,
10 wachinayi Mishimana, wachinkhondi Yeremiya,
11 wa 6 Atayi, wa 7 Eliyeli,
12 wa 8 Yohanani, wa 9 Elizabadi,
13 wa 10 Yeremiya ndipuso wa 11 Makibanayi.
14 Ŵanthu yaŵa ŵenga akutuliya mu fuku laku Gadi,+ alongozgi ŵa asilikali. Mumana ukongwa pa gulu lawu wenga wakuti wangalimbana ndi ŵanthu 100 ndipu mura ukongwa wenga wakuti wangalimbana ndi ŵanthu 1,000.+
15 Yaŵa mbanthulumi wo anguyambuka Yorodani mu mwezi wakwamba pa nyengu yo msinji wo ungutola muvigaŵa vaki vosi. Ndipu angudikisa ŵanthu wo ajanga muvidika, kuvuma* kweniso kuzambwi.*
16 Anthulumi anyaki a mu fuku laku Benjamini kweniso laku Yuda, nawu anguza kwaku Davidi kumalu ngakusuzga kufikaku ko wenga.+
17 Sonu Davidi wanguluta kuchikumana nawu ndipu wanguŵakambiya kuti: “Asani mwaza kwaku ini mwachimangu kuti mundiwovyi, mtima wangu ukoliyanengi namwi. Kweni asani mwaza kwaku ini kuti mundipereki kwa arwani ŵangu, chinanga kuti palivi cho manja ngangu ngananga, Chiuta wa apapi ŵidu akali wawoni ndipuso wayeruzgi.”+
18 Sonu mzimu unguza paku* Amasayi+ mulongozgi wa asilikali 30, ndipu wangukamba kuti:
“Isi te ŵinu yimwi a Davidi, ndipu isi te limoza namwi, yimwi mwana waku Jese.+
Chimangu, chimangu chiŵi namwi, kweniso chimangu chiŵi ndi yo watikuwovyani,Pakuti Chiuta winu ndiyu watikuwovyani.”+
Mwaviyo, Davidi wanguŵalondere ndipu wanguŵasankha kuti aje pa gulu la alongozgi ŵa asilikali.
19 Ŵanthu anyaki a mu fuku laku Manasi, nawu so anguthaŵiya kwaku Davidi pa nyengu yo wanguziya limoza ndi Afilisiti kuzichita nkhondu ndi Sauli. Kweni Davidi wanguŵawovya cha Afilisiti chifukwa mafumu nga Afilisiti+ ngati ngakambiskana, ngangumuweza ndipu ngangukamba kuti: “Walutengi kuchigaŵa cha ambuyaki a Sauli, ndipu ivi vichitiskengi kuti isi tidumuliki mitu.”+
20 Wati waluta ku Zikilagi,+ ŵanthu anyaki akutuliya mu fuku laku Manasi anguthaŵiya kwaku iyu, ndipu ŵanthu ŵaki ndi yaŵa: Adina, Yozabadi, Yediyeli, Mikayeli, Yozabadi, Elihu ndi Ziletayi, wo ŵenga alongozgi a magulu nga ŵanthu 1,000 ngaku Manasi.+
21 Yiwu anguwovya Davidi pakulimbana ndi magulu nga vigeŵenga, chifukwa wosi ŵenga asilikali anthazi kweniso ŵanthu achiganga,+ ndipu angusankhika kuja alongozgi ŵa asilikali.
22 Zuŵa lelosi ŵanthu azanga kwaku Davidi+ kuti azimuwovyi, mpaka msasa waki ungukuwa, ndipu unguja nge msasa waku Chiuta.+
23 Ichi ntchiŵerengeru cha alongozgi ŵa asilikali wo ŵenga akunozgeka kuchita nkhondu, wo anguza kwaku Davidi ku Heburoni+ kuti apereki ufumu waku Sauli kwaku Davidi mwakukoliyana ndi vo Yehova wangulamula.+
24 Anthulumi akutuliya mu fuku laku Yuda wo anyamuwanga vishangu vikuluvikulu kweniso mikondu, ŵengapu 6,800 wo ŵenga akunozgeka kuchita nkhondu.
25 Mu fuku laku Simiyoni mungutuwa asilikali anthazi kweniso achiganga 7,100.
26 Alevi ŵengapu 4,600.
27 Yehoyiyada+ ndiyu wenga mulongozgi wa ŵana aku Aroni,+ ndipu wenga limoza ndi ŵanthu 3,700.
28 Penga so Zadoki+ yo wenga mnyamata wanthazi kweniso wachiganga. Iyu wenga limoza ndi alongozgi 22 a munyumba ya awisi.
29 Kutuliya mu fuku laku Benjamini, kung’anamuwa abali aku Sauli,+ penga ŵanthu 3,000. Anandi mwa ŵanthu ŵenaŵa, pakwamba avikiliyanga mwakuphwere nyumba yaku Sauli.
30 Kutuliya mu fuku laku Efurayemu, penga anthulumi 20,800 wo ŵenga anthazi kweniso achiganga. Yiwu ŵenga akutchuka munyumba za awusewu.
31 Kutuliya mu hafu ya fuku laku Manasi, penga ŵanthu 18,000 wo angusankhika mwakuchita kuzumbulika mazina kuti azi kwaku Davidi kuzimusankha kuja fumu.
32 Kutuliya mu fuku laku Isakara, penga alongozgi 200 wo ayiziŵanga umampha nyengu kweniso aziŵanga vo Ayisirayeli akhumbikanga kuchita, ndipu abali ŵawu wosi avwiyanga vo yiwu alamulanga.
33 Kutuliya mu fuku laku Zebuloni, penga ŵanthu 50,000 wo ŵenga akuti angaja asilikali ndi kundanda pamzeri wakunozgeke nkhondu ŵe ndi vidya vosi vankhondu. Yiwu anguluta kwaku Davidi ndi mtima wosi.*
34 Kutuliya mu fuku laku Nafutali, penga alongozgi 1,000 wo ŵenga limoza ndi ŵanthu 37,000 wo apinganga vishangu vikuluvikulu kweniso mikondu.
35 Kutuliya mu fuku laku Dani, penga ŵanthu 28,600 wo andandanga pamzeri wakunozgeke nkhondu.
36 Kutuliya mu fuku laku Ashere, penga ŵanthu 40,000 wo ŵenga akuti angaja asilikali ndi kundanda pamzeri wakunozgeke nkhondu.
37 Kutuliya kusirya kwa Yorodani,+ kung’anamuwa fuku laku Rubeni, fuku laku Gadi kweniso hafu ya fuku laku Manasi, penga asilikali 120,000 wo ŵenga ndi vidya vakupambanapambana vakuchitiya nkhondu.
38 Wosi ŵenaŵa ŵenga anthulumi akuti angachita nkhondu, ndipu angukoliyana kuti achiti nkhondu. Yiwu anguza ndi mtima wosi ku Heburoni kuti asankhi Davidi kuja fumu ya Ayisirayeli wosi, kweniso Ayisirayeli wosi angukoliyana pakukhumba* kusankha Davidi kuti waje fumu.+
39 Yiwu anguja kweniko limoza ndi Davidi kwa mazuŵa ngatatu, ndipu aryanga ndi kumwa, pakuti abali ŵawu anguŵanozge chakurya.
40 Kweniso wo ŵenga kufupi ndi yiwu kusazgapu so wo ŵenga kutali mpaka ko kwajanga fuku laku Isakara, laku Zebuloni ndi laku Nafutali, azanga ndi chakurya pa abulu, ngamila, nyulu* ndipuso ng’ombi. Yiwu azanga ndi ufwa, makeki nga mkuyu wakukanyata, makeki nga mphereska zakumira, vinyu, mafuta kweniso ng’ombi ndi mbereri zinandi ukongwa, pakuti ŵanthu mu Isirayeli angukondwa ukongwa.
Mazu Ngam'mphata
^ Pamwenga kuti, “ko kutuliya lumwi.”
^ Pamwenga kuti, “ko kuselere lumwi.”
^ Mazu ngaki chayingu, “ungubundiza.”
^ Pamwenga kuti, “Wosi wo anguluta kwaku Davidi ŵenga ndi mtima wa paŵipaŵi cha.”
^ Mazu ngaki chayingu, “ŵenga ndi mtima umoza.”
^ Zina ili mu Chiheberi, ling’anamuwa mwana yo wabalika asani bulu munthulumi wakwera hachi yinthukazi.
