Buku Lakwamba la Mbiri 13:1-14
13 Davidi wangukambiskana ndi alongozgi a magulu nga ŵanthu 1,000 ndi a magulu nga ŵanthu 100 ndipuso alongozgi wosi.+
2 Sonu Davidi wangukambiya mpingu wosi wa Ayisirayeli kuti: “Asani ve umampha kwaku yimwi kweniso asani vakuzomerezeka kwaku Yehova Chiuta widu, tiyeni titumizi uthenga kwa abali ŵidu wo ajaku muvigaŵa vosi va Isirayeli, kweniso kwa asembi ndi Alevi mumatawuni ngawu+ limoza ndi malu ngaki ngakuliskaku viŵetu kuti azi kunu.
3 Ndipuso tikato Bokosi+ laku Chiuta widu.” Pakuti anguliphwere cha mu mazuŵa ngaku Sauli.+
4 Mpingu wosi ungukoliyana navu, pakuti ŵanthu wosi anguwona kuti mphakwenere.
5 Sonu Davidi wanguwunganisa Ayisirayeli wosi kutuwa kumsinji* wa Ijipiti mpaka ku Lebo-hemati,*+ kuti akato Bokosi laku Chiuta wauneneska kutuwa ku Kiriyati-yearimu.+
6 Davidi ndi Ayisirayeli wosi anguluta ku Bala,+ ku Kiriyati-yearimu, wa ku Yuda, kuti akato Bokosi laku Yehova Chiuta wauneneska, yo waja pampandu waufumu pachanya* pa akerubi,+ malu ngo zina laki lidanika.
7 Kweni yiwu angukweza Bokosi laku Chiuta wauneneska mungolu yifya,+ ndipu angulinyamuwa kutuwa kunyumba yaku Abinadabu. Uza ndi Ahiyo ndiwu alongozganga ngolu yo.+
8 Davidi ndi Ayisirayeli wosi akondwanga pa masu paku Chiuta wauneneska ndi nthazi zawu zosi, mwa kumba sumu, mabangu,* vakumbiya vinyaki va vingwi, ting’oma,+ vakumbiya va nge vimbali+ ndipuso mbata.*+
9 Kweni ŵati afika pamalu ngakukhwemiyapu mbewu ngaku Kidoni, Uza wangutambasuwa janja laki ndi kuko Bokosi, pakuti ng’ombi zinguja kamanavi kuligadabuliya pasi.
10 Wati wachita venivi, ukali waku Yehova ungukole paku Uza, ndipu Iyu wangumulanga chifukwa chakuti wangutambasuwa janja laki ndi kuko Bokosi.+ Uza wangufwiya penipo pa masu paku Chiuta.+
11 Kweni Davidi wangukwiya* chifukwa chakuti ukali waku Yehova ungukole paku Uza; ndipu malu ngenanga ngadanika kuti Perezi-uza* mpaka msanawale.
12 Pa zuŵa lenili, Davidi wangumuwopa ukongwa Chiuta wauneneska ndipu wangukamba kuti: “Kumbi Bokosi laku Chiuta wauneneska ndingaza nalu wuli kwaku ini?”+
13 Davidi wanguza nalu cha Bokosi ko iyu wajanga, ku Tawuni yaku Davidi. Mumalu mwaki, wangulamula kuti liluti kunyumba yaku Obedi-edomu, Mgiti.
14 Bokosi laku Chiuta wauneneska linguja ndi ŵanthu a munyumba yaku Obedi-edomu, linguja munyumba yaki kwa myezi yitatu, ndipu Yehova wangulutirizga kutumbika a munyumba yaku Obedi-edomu ndi vosi vo wenga navu.+
Mazu Ngam'mphata
^ Pamwenga kuti, “kutuwa ku Shihori.”
^ Pamwenga kuti, “pakuselere ku Hemati.”
^ Yapa pangafwatulikiya so kuti, “pakati.”
^ Anyaki akamba kuti, “mabangwi.”
^ Anyaki akamba kuti, “lipenga.”
^ Pamwenga kuti, “wanguguŵa.”
^ Kung’anamuwa kuti, “Kuyukiya Uza.”
