Buku Lakwamba la Mbiri 14:1-17
14 Fumu Hiramu+ ya ku Turo, yingutuma ŵanthu kuti akapereki uthenga kwaku Davidi. Hiramu wangutumiza so mathabwa nga vimiti va sidara,* akusema mya* ndi makalipentala kuti akamuzenge nyumba.*+
2 Davidi wanguziŵa kuti Yehova wachitiska kuti ufumu waki ujalikiskiki mu Isirayeli,+ pakuti ufumu waki ungukwezeka chifukwa cha ŵanthu Ŵaki Ayisirayeli.+
3 Davidi wanguto anthukazi+ anandi ku Yerusalemu, ndipu iyu wangubala ŵana anandi anthulumi kweniso anthukazi.+
4 Mazina nga ŵana wo wangubaliya ku Yerusalemu ndi yanga:+ Shamuwa, Shobabu, Natani,+ Solomoni,+
5 Ibiha, Elishuwa, Elipeleti,
6 Noga, Nefegi, Yafiya,
7 Elishama, Beliyada ndi Elifeleti.
8 Afilisiti ŵati avwa kuti Davidi wasankhika kuja* fumu ya Ayisirayeli wosi,+ Afilisiti wosi anguza kuzipenja Davidi.+ Davidi wati wavwa venivi, wanguluta kuchichita nawu nkhondu.
9 Sonu Afilisiti anguza ndipu ayukiyanga ŵanthu wo ajanga mu Dambu la* Refayimu.+
10 Davidi wangufumba Chiuta kuti: “Kumbi ndiluti kuchichita nkhondu ndi Afilisiti? Kumbi muŵaperekengi mu manja mwangu?” Yehova wangumumuka kuti: “Luta, ndipu ini ndiŵaperekengi nadi mu manja mwaku.”+
11 Sonu Davidi wanguluta ku Bala-perazimu+ ndipu wanguŵabaya kweniko. Ivi vati vachitika, Davidi wangukamba kuti: “Chiuta wauneneska wapankhuwa arwani ŵangu mwakugwiriskiya ntchitu janja langu, nge chizenji cho chapankhuka chifukwa cha maji.” Ndichu chifukwa chaki malu yanga angungadana kuti Bala-perazimu.*
12 Afilisiti angujowo achiuta ŵawu kweniko, ndipu Davidi wati walamula, achiuta wo anguwotcheka pamotu.+
13 Pati pajumpha nyengu, Afilisiti anguyukiya so ŵanthu wo ajanga mudambu.*+
14 Davidi wangufumba so Chiuta wauneneska, kweni Chiuta wauneneska wangumumuka kuti: “Ungalutanga ko yiwu ŵali cha. Mumalu mwaki, ukaŵazunguliyi ndipu ukaŵayukiyi kumasu kwa vivwati va baka.+
15 Ndipu asani wachivwa kuguba kwa asilikali pachanya pa vivwati va baka, ukaŵayukiyi, chifukwa Chiuta wauneneska wazamuja kuti wadanjiyapu kali panthazi paku, kuti wabayi asilikali ŵa Afilisiti.”+
16 Sonu Davidi wanguchita nadi vo Chiuta wauneneska wangumulamula+ ndipu angubaya asilikali ŵa Afilisiti kwambiya ku Gibiyoni mpaka ku Gezeri.+
17 Mbiri yaku Davidi yingufika muvyaru vosi, ndipu Yehova wanguchitiska kuti mitundu yosi yimuwopengi.+
Mazu Ngam'mphata
^ Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
^ Pamwenga kuti, “akuzenga mipanda.”
^ Pamwenga kuti, “nyumba yachifumu.”
^ Mazu ngaki chayingu, “wapakika mafuta kuti waje.”
^ Pamwenga kuti, “Chidika cha.”
^ Kung’anamuwa kuti, “Kaswiri Wakupankhuwa.”
^ Pamwenga kuti, “muchidika.”
