Buku Lakwamba la Mbiri 15:1-29
15 Davidi wangulutirizga kuzenga nyumba zaki mu Tawuni yaku Davidi, kweniso wangunozge malu Bokosi laku Chiuta wauneneska ndipu wangulijinthiya hema.+
2 Penga pa nyengu yeniyi po Davidi wangukambiya kuti: “Palivi so munthu munyaki weyosi yo wanyamuwengi Bokosi laku Chiuta wauneneska kupatuwaku Alevi, pakuti ndiwu Yehova wakusankha kuti anyamuwengi Bokosi laku Yehova kweniso kuti amuteŵetiyengi nyengu zosi.”+
3 Sonu Davidi wanguwunganisa Ayisirayeli wosi ku Yerusalemu kuti akato Bokosi laku Yehova ndi kuza nalu kumalu ngo wangulinozge.+
4 Davidi wanguwunganisa mphapu yaku Aroni+ kweniso Alevi.+
5 Kutuliya mu banja laku Kohati, penga Uriyeli yo wenga mulongozgi limoza ndi abali ŵaki 120.
6 Kutuliya mu banja laku Merari, penga Asaya+ yo wenga mulongozgi limoza ndi abali ŵaki 220.
7 Kutuliya mu banja laku Gerisomu, penga Yoweli+ yo wenga mulongozgi limoza ndi abali ŵaki 130.
8 Kutuliya mu mphapu yaku Elizafani,+ penga Shemaya yo wenga mulongozgi limoza ndi abali ŵaki 200.
9 Kutuliya mu mphapu yaku Heburoni, penga Eliyeli yo wenga mulongozgi limoza ndi abali ŵaki 80.
10 Ndipu kutuliya mu mphapu yaku Uziyeli,+ penga Aminadabu yo wenga mulongozgi limoza ndi abali ŵaki 112.
11 Davidi wangudana so Zadoki+ ndi Abiyatara+ wo ŵenga asembi, kweniso wangudana Uriyeli, Asaya, Yoweli, Shemaya, Eliyeli ndi Aminadabu wo ŵenga Alevi,
12 ndipu wanguŵakambiya kuti: “Yimwi ndimwi mwe alongozgi a nyumba za awusemwi za Alevi. Yimwi kweniso abali ŵinu mujitowesi, ndipu mukato Bokosi laku Yehova Chiuta waku Isirayeli ndi kuza nalu kumalu ngo ini ndalinozge.
13 Chifukwa chakuti ndimwi cha mungulinyamuwa pa ulendu wakwamba,+ ukali waku Yehova Chiuta widu ungukole paku isi,+ pakuti tingufufuza cha nthowa yakwenere.”+
14 Mwaviyo, asembi ndi Alevi angujitowesa kuti akato Bokosi laku Yehova Chiuta waku Isirayeli.
15 Sonu Alevi angunyamuwa Bokosi laku Chiuta wauneneska pamapewa ngawu mwakugwiriskiya ntchitu vimiti,+ nge mo Mozesi wangulamuliya mwakukoliyana ndi mazu ngaku Yehova.
16 Pavuli paki Davidi wangukambiya alongozgi ŵa Alevi kuti asankhi abali ŵawu wo ŵenga akumba kuti ambi sumu mwalikondwa, mwakugwiriskiya ntchitu vipangizu ivi vakumbiya: vakumbiya va vingwi, mabangu*+ ndipuso vakumbiya va nge vimbali.+
17 Mwaviyo, Alevi angusankha Hemani+ mwana waku Yoweli, ndipu kutuliya pakati pa abali ŵaki angusankha Asafu+ mwana waku Berekiya. Angusankha so Etani+ mwana waku Kushaya kutuliya pakati pa ŵanthu a mu banja laku Merari wo ŵenga abali ŵawu.
18 Yiwu ŵenga limoza ndi abali ŵawu wo ŵenga a gulu lachiŵi,+ ndipu pa gulu lenili penga Zekariya, Beni, Yaziyeli, Shemiramoti, Yehiyelu, Uni, Eliyabu, Benaya, Maseya, Matitiya, Elifelehu ndi Mikineya kweniso Obedi-edomu ndi Yeyiyeli wo ŵenga alonda a pageti.
19 Penga so akumba yaŵa, Hemani,+ Asafu+ ndi Etani wo angusankhika kuti ambengi vakumbiya va nge vimbali vo venga vamkuŵa.+
20 Ndipu Zekariya, Aziyeli, Shemiramoti, Yehiyelu, Uni, Eliyabu, Maseya ndi Benaya ambanga vakumbiya va vingwi vo anguvishuna kuti vimbengi Alamoti.*+
21 Matitiya,+ Elifelehu, Mikineya, Obedi-edomu, Yeyiyeli ndi Azaziya ambanga mabangu* ngo angungashuna kuti ngambengi Sheminiti,*+ kuti alongozgengi.
22 Kenaniya+ yo wenga mulongozgi wa Alevi ndiyu wawoneriyanga vakukwaskana ndi kayenderu, pakuti wenga ndi lusu.
23 Penga so Berekiya ndi Elikana wo ŵenga alonda a Bokosi.
24 Ndipu Shebaniya, Yoshafati, Netaneli, Amasayi, Zekariya, Benaya ndi Eliyezere wo ŵenga asembi angumba mbata* mwakukweza pa masu pa Bokosi laku Chiuta wauneneska.+ Obedi-edomu ndi Yehiya nawu ateŵetiyanga nge alonda a Bokosi.
25 Davidi, ŵara wosi ŵa Ayisirayeli kweniso alongozgi a magulu nga ŵanthu 1,000, nawu angwenda mwakukondwa+ pakuchito bokosi la phanganu laku Yehova kunyumba yaku Obedi-edomu.+
26 Chiuta wauneneska wati wawovya Alevi wo angunyamuwa bokosi la phanganu laku Yehova, yiwu angupereka sembi ng’ombi zimanazimana 7 zinthulumi kweniso mbereri 7 zinthulumi.+
27 Davidi wanguvwala mkhanju wapanthuwa wo wenga wasalu yamampha ukongwa. Alevi wosi wo angunyamuwa Bokosi, akumba sumu ndipuso Kenaniya yo wawoneriyanga vakukwaskana ndi kayenderu kweniso akumba sumu, nawu anguvwala so viyo. Davidi wanguvwala so efodi wasalu.+
28 Ayisirayeli wosi azanga ndi bokosi la phanganu laku Yehova achidaniriza mwakukondwa,+ achimba masengwi, mbata,+ vakumbiya va nge vimbali kweniso achimba mwakukweza vakumbiya va vingwi ndi mabangu.*+
29 Kweni bokosi la phanganu laku Yehova lati lafika mu Tawuni yaku Davidi,+ Mikala mwana munthukazi waku Sauli+ wangulingiza pawindu. Iyu wanguwona Fumu Davidi yichihulukahuluka ndi kukondwa, ndipu wangwamba kumuyuyuwa mumtima mwaki.+
Mazu Ngam'mphata
^ Anyaki akamba kuti, “mabangwi.”
^ Wonani Mazu ngo Ngakonkhoskeka.
^ Anyaki akamba kuti, “mabangwi.”
^ Wonani Mazu ngo Ngakonkhoskeka.
^ Anyaki akamba kuti, “lipenga.”
^ Anyaki akamba kuti, “mabangwi.”
