Buku Lakwamba la Mbiri 21:1-30
21 Pavuli paki Satana* wangulimbana ndi Isirayeli ndipu wanguchitiska kuti Davidi waŵerengi Ayisirayeli.+
2 Sonu Davidi wangukambiya Yowabu+ ndi alongozgi a ŵanthu kuti: “Lutani mukaŵerengi Ayisirayeli kutuliya ku Beresheba mpaka ku Dani;+ pavuli paki muzindikambiyi kuti ndiziŵi chiŵerengeru chawu.”
3 Kweni Yowabu wangukamba kuti: “Yehova wasazgiyeku chiŵerengeru cha ŵanthu ŵaki maulendu 100! Ambuya fumu yangu, asi ŵanthu wosi yaŵa mbateŵeti ŵinu kali ambuya? Sonu ntchifukwa wuli yimwi ambuya mukhumba kuchita viyo? Ntchifukwa wuli mukhumba kuchitiska kuti Ayisirayeli aje ndi mulandu?”
4 Kweni mazu nga fumu nganguphara mazu ngaku Yowabu. Sonu Yowabu wanguluta ndipu wanguzunguliya mu Isirayeli yosi, pavuli paki wanguwere ku Yerusalemu.+
5 Sonu Yowabu wangupaska Davidi nambala ya ŵanthu wo anguŵerengeka. Ayisirayeli wosi wo ŵenga asilikali amalipanga ŵengapu 1,100,000 ndipu Ayuda wo ŵenga asilikali amalipanga ŵengapu 470,000.+
6 Kweni Alevi ndi ŵanthu a fuku laku Benjamini anguŵerengeka cha+ chifukwa mazu ngo fumu yingukamba ngangumukondwesa cha Yowabu chinanga nkhamanavi.+
7 Venivi vingumukondwesa cha chinanga nkhamanavi Chiuta wauneneska. Mwaviyo, wangulanga Ayisirayeli.
8 Sonu Davidi wangukambiya Chiuta wauneneska kuti: “Ndabuda+ ukongwa po ndachitiya venivi. Sonu chondi, ndigowokiyeni ndamteŵeti winu,+ pakuti ndachita vinthu mwauzereza ukongwa.”+
9 Yehova wangukambiya Gadi+ yo wenga wakuwona viwona waku Davidi kuti:
10 “Luta ukakambiyi Davidi kuti, ‘Yehova wakamba kuti: “Pe vinthu vitatu vakuti usankhepu. Usankhepu chimoza chakuti ndichiti nawi.”’”
11 Sonu Gadi wanguza kwaku Davidi ndi kumukambiya kuti; “Yehova wakamba kuti, ‘Usankhepu wija,
12 kwali usankhengi kuti mucharu muwi nja yikulu kwa vyaka vitatu,+ pamwenga kuti kwa myezi yitatu arwani ŵaku akupeyi uku atikuthereska ndi lipanga,+ pamwenga so kuti kwa mazuŵa ngatatu lipanga laku Yehova limoza ndi mungelu waku Yehova linangi+ charu chosi cha Isirayeli, kung’anamuwa kuti muwi mulili.’+ Sonu uŵanaŵaniyepu vakuti nkhamuki kwaku Yo wandituma.”
13 Davidi wangukambiya Gadi kuti: “Venivi vandipaska chitima ukongwa. Chondi, Yehova ndiyu wandilangi, pakuti lisungu laki ndikulu.+ Kweni ndingalangikanga ndi janja la munthu cha.”+
14 Sonu Yehova wanguwisiya mulili+ pa Ayisirayeli, mwakuti ŵanthu 70,000 a ku Isirayeli angufwa.+
15 Sonu Chiuta wauneneska wangutuma mungelu ku tawuni ya Yerusalemu kuti wakayinangi. Kweni wati waja kamanavi kuti wayinangi, Yehova wanguwona ndipu wangusintha maŵanaŵanu pa soka* lo wanguwisiya ŵanthu.+ Iyu wangukambiya mungelu yo wawisiyanga ŵanthu soka kuti: “Mbwenu!+ Sisa janja laku sonu.” Pa nyengu iyi mungelu waku Yehova wenga pafupi ndi malu ngakukhwemiyapu mbewu ngaku Orinani+ Myebusi.+
16 Davidi wati wayunuska mutu waki, wanguwona mungelu waku Yehova yo wanguma pakati pacharu chapasi ndi kuchanya. Mungelu mwenuyu wenga ndi lipanga+ kujanja laki lo wangulisoske muchanya, ndipu wangulilazgisiya ku Yerusalemu. Davidi ndi ŵara angujiwisa pasi+ kavunama mwaliŵiliŵi, ndipu pa nyengu iyi ndipu yiwu avwala vigudulu.+
17 Davidi wangukambiya Chiuta wauneneska kuti: “Asi ini ndini ndingulamula kuti ŵanthu aŵerengeki? Ini ndini ndabuda, ndipu ini ndini ndananga;+ kweni nanga mbereri izi zananganji? Yimwi Yehova Chiuta wangu, chondi, janja linu liwiyi ini ndi nyumba ya ada; kweni lekani kulanga ŵanthu ŵinu ndi soka ili.”+
18 Sonu mungelu waku Yehova wangutuma Gadi+ kuti wakakambiyi Davidi kuti waluti wakazenge Yehova guŵa la sembi pamalu ngakukhwemiyapu mbewu ngaku Orinani Myebusi.+
19 Mwaviyo, Davidi wanguluta mwakukoliyana ndi mazu ngo Gadi wangukamba mu zina laku Yehova.
20 Sonu Orinani wati wang’anamuka, wanguwona mungelu, ndipu ŵana ŵaki anthulumi anayi wo ŵenga nayu limoza anguchibisama. Pa nyengu iyi, Orinani wakhwemanga tirigu.
21 Davidi wati wafika kwaku iyu, Orinani wangumuwona Davidi, ndipu mwaliŵiliŵi wangutuwapu pamalu ngakukhwemiyapu mbewu ndipu wangujikamiya Davidi mpaka chisku chaki pasi.
22 Davidi wangukambiya Orinani kuti: “Ndigulisi* malu ngaku ngakukhwemiyapu mbewu, kuti ndizengepu guŵa lakuperekiyapu sembi kwaku Yehova. Undigulisi pa mtengu waki chayiwu kuti mulili wo wawiya ŵanthu umali.”+
23 Kweni Orinani wangukambiya Davidi kuti: “Toni ŵaka malu ngo kuti ngaje nginu, ndipu yimwi ambuya fumu yangu chitani cho muwona kuti ntchamampha.* Ndiperekengi so ng’ombi kuti muyipereki nge sembi yakupiriza, chakukhweme mbewu+ kuti chije nkhuni, ndipuso tirigu kuti waje sembi ya mbewu. Vosi venivi ndikupaskeningi.”
24 Kweni Fumu Davidi yingukambiya Orinani kuti: “Awa, undilangi mtengu waki chayiwu kuti ndiguli, chifukwa ndingato cha vinthu vaku ndi kuvipereka kwaku Yehova pamwenga kupereka sembi zakupiriza kwambula kulipirapu kekosi.”+
25 Mwaviyo, Davidi wangupaska Orinani ndalama za malu ngo, ndipu uzitu waki wenga masekeli* 600 ngagolidi.
26 Davidi wanguzenge Yehova guŵa la sembi+ pamalu ngenanga, ndipu wangupereka sembi zakupiriza kweniso sembi za chimangu, ndipu wangudaniya paku Yehova yo wangumumuka mwakugwiriskiya ntchitu motu+ wakutuwa kuchanya wo unguza paguŵa la sembi zakupiriza.
27 Sonu Yehova wangukambiya mungelu+ kuti waweze lipanga laki muchakuŵikamu chaki.
28 Pa nyengu yeniyi, Davidi wati wawona kuti Yehova wamumuka pamalu ngakukhwemiyapu mbewu ngaku Orinani Myebusi, iyu wangulutirizga kupereka sembi pamalu ngenanga.
29 Kweni pa nyengu iyi, chihema chaku Yehova cho Mozesi wangupanga muchipululu kweniso guŵa la sembi zakupiriza venga pamalu ngapachanya ku Gibiyoni.+
30 Kweni Davidi walutangaku cha kwenuku kuchifumba Chiuta, pakuti wenga ndi mantha chifukwa cha lipanga la mungelu waku Yehova.
Mazu Ngam'mphata
^ Yapa pangafwatulikiya so kuti, “murwani.”
^ Pamwenga kuti, “wanguchita chitima chifukwa cha soka.”
^ Mazu ngaki chayingu, “Ndipaski.”
^ Mazu ngaki chayingu, “cho masu nginu ngawona kuti ntchamampha.”
^ Sekeli yimoza yayanananga ndi magilamu 11.4. Wonani Fundu Zakukumaliya B14.
