Buku Lakwamba la Mbiri 22:1-19
22 Sonu Davidi wangukamba kuti: “Iyi ndi nyumba yaku Yehova Chiuta wauneneska, ndipu ili ndi guŵa la sembi zakupiriza laku Isirayeli.”+
2 Davidi wangulamula kuti alendu wosi+ wo ajanga mucharu cha Isirayeli awunganisiki pamoza, ndipu wanguŵapaska ntchitu yakucheketa mya yakuzenge nyumba yaku Chiuta wauneneska, kuti ayicheketengi ndi kuyicheketereza.+
3 Davidi wanguwunganisa so visulu vinandi ukongwa vakupangiya mizumali ya visasa va pamageti kweniso kuti apangiyi vakupaniya vinthu. Iyu wanguwunganisa so mkuŵa unandi ukongwa wo uzitu waki wenga wakuti ungapimika cha.+
4 Davidi wanguwunganisa so mathabwa nga sidara*+ ngambula kuŵerengeka, pakuti ŵanthu a ku Sidoni+ ndipuso ŵanthu a ku Turo+ anguza ndi mathabwa nganandi ukongwa nga sidara kwaku iyu.
5 Davidi wangukamba kuti: “Mwana wangu Solomoni ndi munamana ndipuso waziŵa vinandi cha,*+ kweni nyumba yaku Yehova yo yikhumbika kuzengeka yiŵengi yakawana cha,+ ndipu mbiri ya nyumba yeniyi kweniso kutowa kwaki+ viziŵikengi muvyaru vosi.+ Mwaviyo, ini ndimunozgiyengi limu vinthu vinyaki.” Sonu Davidi wanguwunjikiya limu vinthu vinandi ukongwa wechendafwi.
6 Kweniso Davidi wangudana mwana waki Solomoni, ndipu wangumukambiya kuti wamuzenge nyumba Yehova Chiuta waku Isirayeli.
7 Davidi wangukambiya mwana waki Solomoni kuti: “Mtima wangu ungukhumbisiska kuzenga nyumba yakuziŵika ndi zina laku Yehova Chiuta wangu.+
8 Kweni mazu ngaku Yehova nganguza kwaku ini ngakuti, ‘Yiwi wadira ndopa zinandi ukongwa ndipu wachita nkhondu zikuluzikulu. Yiwi uzengengi cha nyumba yakuziŵika ndi zina langu,+ pakuti wadira ndopa zinandi ukongwa pacharu chapasi pa masu pangu.
9 Awona! Ujengi ndi mwana munthulumi+ yo wazamuja munthu wachimangu,* ndipu ini ndazamuchitiska kuti wapumuwi kwa arwani ŵaki wosi wo atimuzunguliya.+ Pakuti zina laki liŵengi Solomoni*+ ndipu ndichitiskengi kuti Isirayeli waje mwachimangu kweniso mwakufwasa mu mazuŵa ngaki.+
10 Iyu ndiyu wazamuzenga nyumba yakuziŵika ndi zina langu.+ Ini ndazamuja wisi ndipu iyu wazamuja mwana wangu.+ Ini ndazamuchitiska kuti mpandu waki waufumu mu Isirayeli ujalikiskiki mpaka muyaya.’+
11 “Sonu yiwi wamwana wangu, Yehova waŵi nawi kweniso vinthu vikuyende umampha, ndipu uzengi nyumba yaku Yehova Chiuta waku, nge mo iyu wakambiya vakukwaskana ndi yiwi.+
12 Ndipempha kuti Yehova wakupaski zeru ndipuso wakuwovyi kuti uvwisengi vinthu+ asani wakupaska mazaza mu Isirayeli, kuti usungi dangu laku Yehova Chiuta waku.+
13 Vinthu vikuyendiyengi umampha asani usungengi mwakuphwere marangu+ ndipuso vyeruzgu vo Yehova wangulamula Mozesi kuti wapaski Ayisirayeli.+ Uje ndi chiganga kweniso uje ndi nthazi. Ungawopanga cha pamwenga kuchita mantha.+
14 Awona, ini ndasuzgika ukongwa kuwunganisa vinthu vakuzenge nyumba yaku Yehova, ndawunganisa golidi wakukwana matalenti* 100,000, siliva wakukwana matalenti 1 miliyoni, mkuŵa kweniso visulu vinandi ukongwa+ vo uzitu waki ungapimika cha, kweniso ndawunganisa mathabwa ndi mya.+ Kweni yiwi uzisazgiyepu mbwenu.
15 Yiwi we ndi antchitu anandi akucheketa mya, akusema mya,+ makalipentala kweniso ŵanthu wo ŵe ndi malusu ngakupambanapambana.+
16 Golidi, siliva, mkuŵa ndipuso visulu vilipu vinandi ukongwa mwakuti vingapimika cha.+ Sonu soka, uyambi kugwira ntchitu ndipu Yehova waŵi nawi.”+
17 Pavuli paki, Davidi wangulamula alongozgi wosi a ku Isirayeli kuti awovyi mwana waki Solomoni. Iyu wanguŵakambiya kuti:
18 “Asi Yehova Chiuta winu we namwi, ndipuso asi wachitiska kuti mupumuwi muvigaŵa vosi? Pakuti iyu wangupereka mu manja mwangu ŵanthu wo ajanga mucharu ichi, ndipu charu ichi chathereskeka pa masu paku Yehova kweniso pa masu pa ŵanthu ŵaki.
19 Sonu simikizani ndi mtima winu wosi kweniso umoyu winu wosi kuti mupenjengi Yehova Chiuta winu,+ ndipu yambani kuzenga malu ngakupaturika ngaku Yehova Chiuta wauneneska.+ Chitani venivi kuti bokosi la phanganu laku Yehova ndipuso viyaŵi vakupaturika vaku Chiuta wauneneska,+ muziviŵiki munyumba yakuziŵika ndi zina laku Yehova yo muzengengi.”+
Mazu Ngam'mphata
^ Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
^ Pamwenga kuti, “ndi mteta.”
^ Zina ili lituliya ku mazu nga Chiheberi ngo ngang’anamuwa kuti “Chimangu.”
^ Mazu ngaki chayingu, “yo wapumuwa.”
^ Talenti yimoza yayanananga ndi makilogilamu 34.2. Wonani Fundu Zakukumaliya B14.
