Buku Lakwamba la Samuyeli 21:1-15
21 Pavuli paki Davidi wangufika ku Nobu+ kwaku Ahimeleki wasembi. Ahimeleki wanguchita mantha wati wakumana ndi Davidi, ndipu wangumufumba kuti: “Ntchifukwa wuli we wija kwambula munthu munyaki?”+
2 Davidi wangumuka wasembi Ahimeleki kuti: “Fumu yandituma kuti nkhachiti chinthu chinyaki, kweni yandilamula kuti, ‘Ungakambiyanga weyosi cha vo ndakutuma kuti ukachiti kweniso ulongozgi wo ndakupaska.’ Ndapangana ndi anyamata ŵangu kuti tikumani pachili panyaki.
3 Sonu asani mwe ndi viŵandi vinkhondi mundipaskeku, pamwenga mungandipaska chechosi cho chilipu.”
4 Wasembi wangumuka Davidi kuti: “Chiŵandi bweka palivi, kweni pe chiŵandi chakupaturika.+ Asani anyamata ŵaku aŵakwaska cha anthukazi,* ndikupaskengi.”+
5 Davidi wangumuka kuti: “Anthukazi ajapu nasi pafupi cha, nge mo viŵiya pa maulendu nganyaki asani ndiluta ku nkhondu.+ Sonu asani pa maulendu bweka maliŵavu nga anyamata ŵangu ngaja ngakutowa, kwe wuli pa ulendu wa msanawale uwu!”
6 Mwaviyo, wasembi wangumupaska viŵandi vakupaturika,+ chifukwa pengavi viŵandi vinyaki kupatuwaku viŵandi vakulongo* vo vingutuzgika pa masu paku Yehova kuti aŵikepu vasonu pa zuŵa lo angutuzgiyapu.
7 Sonu yumoza mwa ateŵeti aku Sauli wenga penipo pa zuŵa ili, chifukwa angumukole pasi pa masu paku Yehova. Mteŵeti uyu wadanikanga kuti Doyegi+ wa ku Edomu,+ ndipu iyu wenga mulongozgi wa aliska aku Sauli.
8 Davidi wangufumba Ahimeleki kuti: “Kumbi mwe ndi mkondu pamwenga lipanga kunu? Ini ndapinga cha lipanga langu pamwenga vidya vangu vankhondu chifukwa vo fumu yingundituma venga va liŵiliŵi.”
9 Wasembi wangumuka kuti: “Mkondu waku Goliyati,+ Mfilisiti yo ungumubaya mu Dambu la* Ela+ ndiwu ulipu. Wavungika musalu ndipu we kuseri kwa efodi.+ Asani ukhumba kuwuto, ungato pakuti weniwo pe ndiwu ulipu panu.” Davidi wangukamba kuti: “Palivi wakuyanana nawu. Ndipaskeni weniwo.”
10 Pa zuŵa lenili, Davidi wangusoka ndipu wangulutirizga kuthaŵa+ Sauli. Iyu wangufika kwaku Akishi, fumu ya ku Gati.+
11 Ateŵeti aku Akishi angumukambiya kuti: “Asi uyu ndi Davidi, fumu ya charu? Asi mwenuyu ndiyu ambanga vakukwaskana ndi iyu pa nyengu yo avinanga ndi kukamba kuti,‘Sauli wabaya ŵanthu 1,000,Ndipu Davidi wabaya ŵanthu masawuzandi nganandi’?”+
12 Davidi wangwamba kuŵanaŵaniya mazu ngenanga mumtima mwaki ndipu wangumuwopa ukongwa+ Akishi, fumu ya ku Gati.
13 Sonu Davidi wangujisintha+ pa masu pawu ndipu wangwamba kuchita vinthu nge munthu wakufuntha pakati pawu.* Iyu wangwamba kukwaluwa visasa va pageti kweniso lolozi lasuluwanga mpaka ku mwembi waki.
14 Pakumaliya paki, Akishi wangukambiya ateŵeti ŵaki kuti: “Muwone limu kuti munthu uyu ngwakufuntha! Sonu ntchifukwa wuli mwaza nayu kwaku ini?
15 Kumbi mwavwa kuti ini ndisoŵa ŵanthu akufuntha, mwakuti ndikhumba uyu kuti wandichitiyengi vakufuntha vaki pa masu pangu? Ndi munthu wakuti wangasere munyumba mwangu uyu?”
Mazu Ngam'mphata
^ Pamwenga kuti, “agonana ndi anthukazi cha.”
^ Wonani Mazu ngo Ngakonkhoskeka.
^ Pamwenga kuti, “Chidika cha.”
^ Mazu ngaki chayingu, “mu manja mwawu.”
