Kalata Yakwamba Yakuluta Kwaku Timote 3:1-16
3 Mazu yanga ngakugomezgeka: Asani munthu wapenja kuja wakuwonere,+ wakhumba ntchitu yamampha.
2 Mwaviyo wakuwonere waje munthu wambula kafukwa, munthulumi wa munthukazi yumoza, wakujiko pakuchita vinthu, wakuŵanaŵana umampha,*+ wakuchita vinthu mwandondomeku, wakulonde alendu,+ wakuziŵa kusambiza,+
3 muloŵevu cha,+ wandewu cha, kweni wakoloŵa,+ wabefu cha,+ wakwanja ndalama cha.+
4 Waje munthu wakuziŵa kulongozga a munyumba yaki mu nthowa yamampha ndipuso wa ŵana akuvwiya ndi mtima wosi.+
5 (Pakuti asani munthu watondeka kulongozga a munyumba yaki, wangawuphwere wuli mpingu waku Chiuta?)
6 Wangaŵanga wakung’anamuka sonu cha,+ kuchitiya kuti wangayamba kujikuzga, ndi kulonde cheruzgu cho Dyaboli wakulonde.
7 Waje so wakuti ŵanthu akubwalu atimuchitiya ukaboni wamampha*+ kuti waleki kunyozeka* ndi kuwila muchiŵana chaku Dyaboli.
8 Ateŵeti akovya nawu so aje akuchita vinthu mwaura, apaŵipaŵi cha,* akumwa vinyu munandi cha, akusaniya phindu mwakubiya ŵanthu cha,+
9 kweni akukolesa chisisi chakupaturika cha chivwanu. Achitengi venivi ŵe ndi njuŵi yamampha.+
10 Ndipuso ŵenaŵa ayeseki dankha kuti aziŵiki asani mbakukwana,* pavuli paki ndipu muŵazomerezi kuti ateŵete nge ateŵeti, pakuti alivi mbiri yiheni.+
11 Anthukazi nawu so aje akuchita vinthu mwaura, ambula kunanga mbiri ya anyawu,+ akujiko pakuchita vinthu, akugomezgeka mu vinthu vosi.+
12 Ateŵeti akovya aje anthulumi a munthukazi yumoza, akulongozga umampha ŵana ŵawu kweniso a munyumba yawu.
13 Pakuti anthulumi wo ateŵete mu nthowa yamampha, aja ndi mbiri yamampha ndipuso atuŵa ndi wanangwa wakulongoro va chivwanu cho ŵe nachu mwaku Khristu Yesu.
14 Nditikulembe vinthu venivi chinanga kuti ndiŵanaŵana kuti ndizi kwaku yiwi pambula kuswera yapa,
15 ndachitiya kuti asani ndingaswera, uziŵi mo ungachitiya munyumba yaku Chiuta,+ yeniyo ndi mpingu waku Chiuta wamoyu. Ndipu mpingu wenuwu ntchipilala kweniso ntchindamilu ya uneneska.
16 Kukamba uneneska, chisisi chakupaturika chakukwaskana ndi kujipereka kwaku Chiuta kwenuku, ntchikulu ukongwa: ‘Wanguwoneke mu liŵavu,+ wangukambika kuti ndi murunji mu mzimu,+ wanguwoneke kwa angelu,+ wangupharazgika pakati pa ŵanthu amitundu,+ ŵanthu pacharu chosi angumugomezga+ kweniso wangulondereka kuchanya mu unkhankhu.’
Mazu Ngam'mphata
^ Pamwenga kuti, “wakuŵanaŵana mwazeru.”
^ Pamwenga kuti, “waleki kulengeseka.”
^ Pamwenga kuti, “ŵanthu akubwalu akamba vamampha vakukwaskana ndi iyu.”
^ Pamwenga kuti, “akukamba boza cha.”
^ Pamwenga kuti, “asani mbakwenere.”
