Kalata Yakwamba Yakuluta Kwaku Timote 6:1-21
6 Ŵanthu wo ŵe mugoli la ukapolu, aŵatumbikengi ukongwa ambuyawu+ kuti zina laku Chiuta ndipuso chisambizu, vileki kunyozeka.+
2 Kweniso akapolu wo ŵe ndi ambuyawu akugomezga, angaŵayuyuwanga cha pakutole kuti mbabali. Kweni ateŵetiyengi mwakujipereka, chifukwa ŵeniwo ayanduwa ndi uteŵeti wawu wamampha, mbakugomezga ndipuso mbakwanjiwa.
Lutirizga kuŵasambiza vinthu venivi ndipuso kuŵachiska kuti achitengi vinthu venivi.
3 Asani munthu munyaki wasambiza chisambizu chinyaki, ndipu wazomereza cha ulongozgi wamampha*+ weniwo utuliya kwa Ambuyafwi, Yesu Khristu, pamwenga chisambizu cho chikoliyana ndi kujipereka kwaku Chiuta,+
4 watijikuzga chifukwa cha kunyada ndipuso wavwisa cha chinthu chechosi.+ Iyu wajaliya ŵaka* kupindana ndi ŵanthu ndipuso kususkana nawu pa mazu.+ Vinthu venivi vitambisa sanji, mphindanu, kukamba vinthu viheni, kuŵanaŵaniyana vinthu viheni,
5 ndipuso kususkana nyengu zosi pa tinkhani timanatimana pakati pa ŵanthu akubulumutizgika maŵanaŵanu+ kweniso wo akunoleka uneneska. Yiwu aŵanaŵana kuti kujipereka kwaku Chiuta ndi nthowa yakusaniriya phindu.+
6 Kukamba uneneska, kujipereka kwaku Chiuta kweniso kukhorwa ndi vo munthu we navu,+ kwe ndi phindu likulu ukongwa.
7 Pakuti tikuza ndi kekosi cha mucharu ndipu tipingengi kekosi cha pakutuwamu.+
8 Mwaviyo, asani te ndi chakurya ndi vakuvwala,* tije akukhorwa ndi vinthu venivi.+
9 Kweni ŵanthu wo akhumbisiska kukhupuka, atuwa mu mayeseru ndi muchiŵana,+ kweniso mu makhumbiru nganandi ngabwekabweka ndipuso ngakupweteka, ngo ngachitiska kuti ŵanthu aparanyiki ndi kunangikiya limu.+
10 Pakuti kwanja ndalama ndi msisi wa vinthu vakupweteka vamtundu wewosi, ndipu chifukwa chakukuzga chanju chenichi, anyaki alandizgika ndipu atuwapu pa chivwanu, ndipuso ajipweteka ukongwa ndi maurwirwi nganandi.+
11 Kweni yiwi wamunthu waku Chiuta, thaŵa vinthu venivi. Mumalu mwaki penja urunji, kujipereka kwaku Chiuta, chivwanu, chanju, kukunthiyapu kweniso kuzika.+
12 Chita nkhondu yamampha ya chivwanu; kolesa umoyu wamuyaya wo ukudanikiya kweniso wo ukuwupharazga pakweru mwakuvwika umampha, pa masu pa akaboni anandi.
13 Pa masu paku Chiuta mweniyo wasunga vinthu vosi kuja vamoyu, kweniso pa masu paku Khristu Yesu mweniyo nge kaboni, wangupharazga mwakuvwika umampha pa masu paku Pontiyo Pilato,+ nditikulamula
14 kuti usungi marangu kwambula kalema kweniso kwambula kafukwa mpaka mu zuŵa la kuwoneke kwa Ambuyafwi Yesu Khristu.+
15 Iyu ngwakukondwa kweniso ndi mulongozgi wanthazi ukongwa ndipu wazamulongo kuwoneke kwenuku, pa nyengu yaki yakuŵikika. Iyu ndi Fumu yaku wo alamuliya nge mafumu ndipuso Mbuya waku wo alamuliya nge ambuya,+
16 yija mweniyo wangafwa cha,+ yo waja kumalu nga ukweru wakuti munthu wangafikaku cha,+ mweniyo munthu weyosi wakumuwonapu cha ndipuso wangamuwona cha.+ Kwaku iyu kuŵi ulemu kweniso nthazi zambula kumala. Ame.
17 Lunguchizga* wo mbakukhupuka mu nyengu yinu,* kuti angajikuzganga cha ndipuso kuti aleki kuŵika chilindizga chawu mu chuma chambula kuthembeka+ kweni kwaku Chiuta, yo watitipaska mwakuzara vinthu vosi vo tikondwa navu.+
18 Uŵakambiyi kuti achitengi vinthu vamampha, aje akukhupuka pa ntchitu zamampha, aje akupaska, akunozgeka kugaŵana ndi anyawu,+
19 ajisungiyi mwakuphwere fawundeshoni yamampha ya kunthazi,+ kuti akolesi umoyu weneku.+
20 Timote, vikiliya chenicho ukupaskika,+ tuwaku ku nkhani zambula fundu zo zifipiska chinthu chakupaturika ndipuso ku fundu zo zisuskana ndi uneneska, zo mwaboza atiziwona kuti ndi “zeru.”+
21 Mwakulongo zeru zenizi, anyaki atuwaku ku chivwanu.
Wezi ukulu uŵi namwi.
Mazu Ngam'mphata
^ Pamwenga kuti, “wakovya.”
^ Pamwenga kuti, “watanja ukongwa.”
^ Mazu ngaki chayingu, “chakudika.”
^ Pamwenga kuti, “Lamula.”
^ Wonani Mazu ngo Ngakonkhoskeka.
