Kalata Yachitatu Yaku Yohane 1:1-14
1 Ini mura, ndilembe wakwanjiwa Gayo, yo nditimuyanja ukongwa.
2 Wakwanjiwa, ndipemphera kuti vinthu vosi vilutirizgi kukuyende umampha ndipuso kuti uje ndi umoyu wamampha,* nge mo sonu vitikuyende umampha.
3 Pakuti ndingukondwa ukongwa abali ŵati aza ndi kupereka ukaboni wakukwaskana ndi uneneska wo wawukolesa, po ulutirizga kwenda mu uneneska.+
4 Palivi chinthu cho chitindikondwesa ukongwa* kuluska kuvwa kuti ŵana ŵangu alutirizga kwenda mu uneneska.+
5 Wakwanjiwa, pa vinthu vosi vo uchitiya abali, ulongo kuti ndiwi wakugomezgeka, chinanga kuti yiwu mbalendu kwaku yiwi.+
6 Yiwu apereka ukaboni ku mpingu wakukwaskana ndi chanju chaku. Nditikupempha kuti achituwaku kweniko, ulayirani nawu mu nthowa yakukondwesa Chiuta.+
7 Pakuti anguluta kuchipharazga chifukwa cha zina laki, ndipu angutoku kanthu kekosi cha+ ku ŵanthu amitundu yinyaki.
8 Mwaviyo, te ndi udindu wakulonde ŵanthu aviyo,+ kuti tije antchitu anyawu mu uneneska.+
9 Mpingu ndinguwulembe nkhani yinyaki, kweni Diyotirefe mweniyo watanja kuja wakwamba pakati pawu,+ walonde mwaulemu cha kanthu kekosi kakutuliya kwaku isi.+
10 Ndichu chifukwa chaki, asani ndaza ndazamuvumbuwa ntchitu zo wachita. Iyu wawandisa nkhani zakunanga mbiri yidu.*+ Chifukwa chakuti wakhorwa cha ndi venivi, wakana kulonde abali+ mwaulemu ndipu wo akhumba kuŵalonde, watiŵajaliza ndipu watiŵasezga mu mpingu.
11 Wakwanjiwa, ungayezganga vinthu viheni cha, kweni uyezgengi vinthu vamampha.+ Mweniyo wachita vinthu vamampha ngwakutuliya kwaku Chiuta.+ Mweniyo wachita vinthu viheni wechendamuwonepu Chiuta.+
12 Ŵanthu wosi akamba vamampha vakukwaskana ndi Demetiriyasi, ndipu uneneska nawu utimusimikiziya. Isi nasi titimuchitiya ukaboni ndipu uziŵa kuti ukaboni wo tipereka ngwauneneska.
13 Nde ndi vinandi vakuti ndikulembe, kweni ndakhumba cha kuti ndilutirizgi kukulembe mwakugwiriskiya ntchitu chakulembe ndi inki.
14 Kweni ndigomezga kuti ndikuwonengi pambula kuswera yapa, ndipu tazamukambiskana pa masu ndi pa masu.
Chimangu chiŵi nawi.
Anyangu kunu atikutawuzga. Unditawuzgiyi anyangu kweniko weyosi pakuyija.
Mazu Ngam'mphata
^ Pamwenga kuti, “umoyu wambula kutamatama.”
^ Yapa pangafwatulikiya so kuti, “cho chitindichitiska kuwonga ukongwa.”
^ Mazu ngaki chayingu, “wakamba vakukwaskana ndi isi ndi mazu ngaheni.”
