Kalata Yakuluta kwa Aefeso 1:1-23
1 Ini Paulo, wakutumika waku Khristu Yesu chifukwa cha khumbu laku Chiuta, ndilembe akupaturika wo ŵe ku Efeso,+ ŵeniwo mbakugomezgeka mwakukoliyana ndi Khristu Yesu kuti:
2 Wezi ukulu kweniso chimangu vakutuliya kwaku Chiuta Awusefwi, ndi Ambuya Yesu Khristu viŵi namwi.
3 Walumbiki Chiuta, kweniso Wusewu wa Ambuyafwi Yesu Khristu, pakuti wakutitumbika ndi vitumbiku vosi vauzimu mumalu ngakuchanya mwakukoliyana ndi Khristu.+
4 Wanguchita venivi wachitisankha charu chechendajalikiskiki kuti tije akukoliyana ndi iyu,* ndi chilatu chakuti tije akupaturika kweniso ambula kalema+ pa masu paki pakulongo chanju.
5 Pakuti wakutisankhiya limu+ kuti tisambuki ŵana ŵaki+ kuporote mwaku Yesu Khristu, mwakukoliyana ndi vo vingumunozge kweniso khumbu laki,+
6 kuti wezi waki ukulu waunkhankhu uthamikiki.+ Wezi wenuwu wakuwupereka mwachanju kwaku isi mwakugwiriskiya ntchitu wakwanjiwa waki.+
7 Mwakugwiriskiya ntchitu iyu, tafwatulika ndi sembi yakuwombole kuporote mu ndopa za munthu mwenuyu,+ ndipu tagowokereka nadi maubudi ngidu+ mwakukoliyana ndi chuma cha wezi waki ukulu.
8 Chiuta wakutipaska wezi ukulu wenuwu unandi ukongwa mu zeru zosi kweniso mu kuvwisa vinthu,*
9 mwakutiziŵisa chisisi chakupaturika+ cha khumbu laki. Chisisi chenichi chikoliyana ndi venivo vikumunozge kweniso khumbu laki,
10 kuti waŵiki nthowa yakwendese vinthu asani nyengu yakuŵikika yamaliya limu, ndi chilatu chakuti wawunganisi pamoza vinthu vosi mwaku Khristu, vinthu vakuchanya ndi vinthu vapacharu chapasi.+ Mwaku iyu
11 mweniyo te akukoliyana nayu ndipuso tikuŵikika nge akuhara,+ pakuti wangutisankhiya limu mwakukoliyana ndi khumbu laku yo wafiska vinthu vosi nge mo wasankhiya mwakukoliyana ndi khumbu laki.
12 Wanguchita venivi kuti isi te akwamba kuja ndi chilindizga mwaku Khristu, tichitiski kuti Chiuta wathamikiki ndi kukankhuskika.
13 Kweni namwi so munguja ndi chilindizga mwaku iyu mwati mwavwa mazu ngauneneska, ngo mbuthenga wamampha wakukwaskana ndi utaski winu. Mwati mwagomezga, mungudindika chidindu+ kuporote mwaku iyu ndi mzimu wakupaturika wo mungulayizgika.
14 Mzimu wenuwu ntchikoli* chakuperekeke limu cha chihara chidu,+ ndi chilatu chakuti ŵanthu aku Chiuta+ afwatuliki mwakugwiriskiya ntchitu sembi yakuwombole,+ kuti Chiuta wathamikiki ndi kukankhuskika.
15 Ndichu chifukwa chaki nani po ndikuvwiya vakukwaskana ndi chivwanu cho mwe nachu mwa Ambuya Yesu ndipuso chanju cho mulongo akupaturika wosi,
16 ndilekeza cha kuwonga Chiuta chifukwa chaku yimwi. Ndilutirizga kukuzumbuwani mu mapempheru ngangu,
17 kuti Chiuta wa Ambuyafwi Yesu Khristu, Ada aunkhankhu, wakupaskeni mzimu wa zeru ndipuso wakuvwisa vinthu vo iyu wavumbuwa, kuti mumuziŵi umampha.+
18 Iyu wangweruska masu nga mtima winu, kuti muziŵi chilindizga cho wakukudaniyani, kweniso chuma chaunkhankhu cho wasungiya akupaturika nge chihara,+
19 ndipuso ukulu wa nthazi zaki zakujumpha mwesu kwaku isi akugomezga.+ Venivi vikoliyana ndi vo wachita mwakugwiriskiya ntchitu nthazi zaki zikulu,
20 zo wangulongo Khristu po wangumuyuska ku nyifwa ndi kumujalika kujanja laki lamaryi+ mumalu ngakuchanya.
21 Iyu wakumuŵika pachanya ukongwa kuluska boma lelosi, mazaza ngosi, nthazi zosi, wakulamuliya weyosi ndipuso zina lelosi lo lidanika,+ mu nyengu yinu* kweniso yo yituza.
22 Chiuta wakuthereske so vinthu vosi kusi kwa maphazi+ ngaki ndipuso wakumuŵika kuja mutu wa vinthu vosi vakukwaskana ndi mpingu,+
23 wo ndi liŵavu laki.+ Mpingu wenuwu ngwakuzaza ndi iyu, yo wazaza vinthu vosi mu nthowa yeyosi.
Mazu Ngam'mphata
^ Kung’anamuwa Khristu.
^ Pamwenga kuti, “kweniso mu kuwamu.”
^ Pamwenga kuti, “ntchisimikizu cha vinthu vo vituza.”
^ Wonani Mazu ngo Ngakonkhoskeka.
