Kalata Yakuluta kwa Aefeso 6:1-24
6 Mwaŵana, muvwiyengi apapi ŵinu+ mwakukoliyana ndi Ambuya, pakuti wenuwu mburunji.
2 “Utumbikengi awusu ndi anyoku”+ ndilu dangu lakwamba lo le ndi layizgu, ndipu layizgu laki ndakuti:
3 “Kuti vinthu vikuyende umampha kweniso kuti uje ndi umoyu utali pacharu.”
4 Ndipuso yimwi ada, mungakwiyisanga ŵana ŵinu cha,+ kweni lutirizgani kuŵalera mwakuŵasambiza+ ndi kuŵalunguchizga* nge mo Yehova* wakhumbiya.+
5 Yimwi akapolu, muvwiyengi ambuyamwi akuliŵavu+ ndipu muŵengi ndi mantha kweniso mumbwambwanthiyengi kutuliya pasi pa mtima, nge mo muchitiya kwaku Khristu.
6 Mungachitanga venivi pa nyengu yo atikuwonani pe cha pakukhumba kukondwesa ŵanthu,+ kweni muchitengi nge akapolu aku Khristu, wo achita khumbu laku Chiuta ndi mtima wosi.+
7 Muteŵetiyengi ndi maŵanaŵanu ngamampha, nge muteŵete Yehova,*+ ŵanthu cha,
8 pakuti muziŵa kuti chechosi chamampha cho munthu weyosi wachita wazakuchilonde so kwaku Yehova,*+ kwali wangaŵa kapolu pamwenga mwanangwa.
9 Yimwi ambuyawu, namwi so muchitengi nawu viyo akapolu ŵinu, mungaŵawofyanga cha pakuti muziŵa kuti Mbuya waku mosi mwaŵaŵi, yiwu ndi yimwi we kuchanya+ ndipu iyu watanjiya cha.
10 Pakumaliya, lutirizgani kusaniya nthazi+ mwa Ambuya ndipuso mu nthazi zawu zikulu ukongwa.
11 Vwalani vidya vosi vankhondu+ vakutuliya kwaku Chiuta, kuti muleki kusukunyika pakulimbana ndi mauryarya ngaku Dyaboli,
12 pakuti tilimbana*+ ndi ndopa kweniso liŵavu cha, kweni tilimbana ndi maboma, mazaza, akulamuliya charu a mdima uwu, tilimbana ndi mizimu yiheni+ mumalu ngakuchanya.
13 Pa chifukwa chenichi, nyamuwani vidya vosi vankhondu vakutuliya kwaku Chiuta,+ kuti muzileki kuthera mu zuŵa liheni ndipuso kuti muzileki kusukunyika asani mwazifiska vosi.
14 Mwaviyo, mungasukunyikanga cha, mangisani lamba wauneneska muchiwunu chinu,+ vwalani chapachifuŵa chaurunji,+
15 kweniso vwalani sapatu ku maphazi kwinu muchinozgeka kupharazga uthenga wamampha wa chimangu.+
16 Kusazgiyapu pa vosi ivi munyamuwi chishangu chikulu cha chivwanu,+ chenicho mwazamufiska kuzimwa nachu mivi yakukole motu ya muheni yo.+
17 Kweniso londiyani chisoti chautaski,+ ndipuso lipanga la mzimu, lo ndi mazu ngaku Chiuta.+
18 Muchichita venivi, mupempherengi+ pa chakuchitika chechosi mu mzimu mwakugwiriskiya ntchitu mtundu wewosi wa pempheru ndi kuŵeyere.+ Kuti mufiski kuchita venivi, jani masu ndipu nyengu zosi muŵeyeriyengi Chiuta mumalu mwa akupaturika wosi.
19 Nani so mundipempheriyengi, kuti asani ndajula mulomu wangu ndipaskikengi mazu, ndi chilatu chakuti ndifiskengi kulongoro mwachiganga pakuvumbuwa chisisi chakupaturika cha uthenga wamampha,+
20 wo ndajaliya nge kazembi+ mu simbi za ukayidi, ndipuso kuti ndilongorongi mwachiganga vakukwaskana ndi uthenga wenuwu, nge mo nditenere kuchitiya.
21 Sonu kuti muziŵi vakukwaskana ndi ini ndipuso mo ndiliri, Tukiko,+ mubali wakwanjiwa kweniso mteŵeti wakugomezgeka mwa Ambuya, wakukonkhoskiyeningi vosi.+
22 Ndamutuma kwaku yimwi ndi chilatu chenichi, kuti muziŵi mo tiliri ndipuso kuti wasisipuwi mitima yinu.
23 Chimangu, chanju limoza ndi chivwanu vakutuliya kwaku Chiuta, Ada ndi Ambuya Yesu Khristu viŵi ndi abali.
24 Wezi ukulu uŵi ndi ŵanthu wosi wo chanju chawu pa Ambuyafwi Yesu Khristu ntchambula kumala.
Mazu Ngam'mphata
^ Pamwenga kuti, “kuŵalongozga.” Mazu ngaki chayingu, “ndi kuŵaŵikamu maŵanaŵanu.”
^ Wonani Fundu Zakukumaliya A5.
^ Wonani Fundu Zakukumaliya A5.
^ Wonani Fundu Zakukumaliya A5.
^ Mazu ngaki chayingu, “tipumana.”
