Kalata Yakuluta kwa Aroma 10:1-21
10 Abali, ndikhumbisiska mumtima mwangu kweniso ndipemphera mwakuŵeyere kwaku Chiuta chifukwa chaku yiwu, kuti ataskiki.+
2 Pakuti nditiŵachitiya ukaboni kuti mbaphamphu pakuteŵete Chiuta,+ kweni mwakukoliyana ndi kuziŵa vinthu mwauneneska cha.
3 Chifukwa cha kuleka kuziŵa urunji waku Chiuta+ angujithereska cha ku urunji wo,+ kweni akhumbanga kujalikiska urunji wawu.+
4 Pakuti Khristu ndiyu umaliru wa Dangu,*+ kuti munthu weyosi yo we ndi chivwanu waje murunji.+
5 Pakuti Mozesi wangulemba vakukwaskana ndi urunji wo ukoliyana ndi Dangu* kuti: “Weyosi yo wachita vinthu venivi, wazamuja ndi umoyu chifukwa cha vinthu venivi.”+
6 Kweni vakukwaskana ndi urunji wo utuza chifukwa cha chivwanu, Malemba ngakamba kuti: “Ungakambanga cha mumtima mwaku kuti,+ ‘Ndiyani yo wakwerengi kuchanya?’+ kung’anamuwa kuti, wakasisiyi Khristu pasi,
7 pamwenga kuti, ‘Ndiyani yo wasikiyengi kuchizenji?’+ kung’anamuwa kuti, wakayuski Khristu ku nyifwa.”
8 Kweni kumbi Lemba likambanji? Lititi: “Mazu ngo, nge pafupi ndi yiwi, nge mumulomu mwaku ndipuso mumtima mwaku”;+ kung’anamuwa, “mazu” nga chivwanu ngo tipharazga.
9 Pakuti asani upharazga pakweru ndi mulomu waku kuti Yesu ndiyu Mbuya,+ ndipuso we ndi chivwanu mumtima mwaku kuti Chiuta wakumuyuska ku nyifwa, wazamutaskika.
10 Pakuti munthu waja ndi chivwanu mumtima mwaki kuti waje murunji, kweni ndi mulomu waki, wapharazga pakweru chivwanu cho+ kuti wataskiki.
11 Pakuti lemba likamba kuti: “Palivi munthu wakuvwana mwaku iyu, yo wazamuguŵa.”+
12 Chifukwa palivi mphambanu pakati pa Myuda ndi Mgiriki.+ Pakuti wosi ŵe pasi pa Mbuya yumoza, mweniyo wapaska mwamasangu wosi wo adaniya paku iyu.
13 Pakuti “weyosi yo wadaniya pa zina laku Yehova* wazamutaskika.”+
14 Kweni kumbi angadaniyapu wuli pa zina laku yo aleka kuvwana mwaku iyu? Nanga angavwana wuli mwaku yo ŵechendavwepu vaku iyu? Ndipu angavwa wuli kwambula kuti munthu munyaki waŵapharazgiya?
15 Nanga angapharazga wuli kwambula kuti atumika?+ Nge mo kukulembeke kuti: “Hati kutowa maphazi nga ŵanthu wo apharazga uthenga wamampha wa vinthu vamampha!”+
16 Kweni ndi wosi cha wo anguvwiya uthenga wamampha. Pakuti Yesaya wangukamba kuti: “Yehova,* ndiyani yo wavwana mu vinthu vo wakuvwa kwaku isi?”+
17 Sonu munthu waja ndi chivwanu chifukwa cha vinthu vo wavwa.+ Ndipu vinthu vo wavwa vija vakutuliya mu mazu ngakukwaskana ndi Khristu.
18 Kweni ndifumbi kuti, Asi angutondeka cha kuvwa? Chifukwa kukamba uneneska, “kupoma kungufika mucharu chosi, ndipu uthenga ungufika kuvigoti va charu chapasi.”+
19 Kweni ndifumbi kuti, Asi Ayisirayeli angutondeka cha kuziŵa?+ Chakwamba Mozesi wangukamba kuti: “Ndazakukuchitiskani sanji kuporote mu ŵanthu akuti ndi mtundu cha. Ndazakuŵakwiyisa kuziya mu mtundu uzereza.”+
20 Kweni Yesaya mwachiganga wangukamba kuti: “Ŵanthu wo alekanga kundipenjapenja ndiwu angundisaniya+ ndipu ŵanthu wo alekanga kundipenjapenja ndiwu angundiziŵa.”+
21 Kweni vakukwaskana ndi Ayisirayeli wangukamba kuti: “Zuŵa losi lamphumphu ndatambasuliya manja ngangu ŵanthu ambula kuvwiya kweniso akunonopa mtima.”+
Mazu Ngam'mphata
^ Wonani Mazu ngo Ngakonkhoskeka.
^ Wonani Mazu ngo Ngakonkhoskeka.
^ Wonani Fundu Zakukumaliya A5.
^ Wonani Fundu Zakukumaliya A5.
