Kalata Yakuluta kwa Aroma 12:1-21
12 Mwaviyo, nditikudandawuliyani abali chifukwa cha lisungu laku Chiuta, kuti mupereki maliŵavu nginu+ nge sembi yamoyu, yakupaturika+ kweniso yakuzomerezeka kwaku Chiuta, yeniyo mbuteŵeti wakupaturika limoza ndi lusu linu lakuŵanaŵana.+
2 Ndipu lekani kuwumbika ndi vakuchitika va mu nyengu yinu,* kweni sambukani mwakusintha maŵanaŵanu nginu,+ kuti muziŵi+ khumbu laku Chiuta lamampha, lakuzomerezeka kweniso lakufikapu.
3 Kuporote mu wezi ukulu wo ndikupaskika, ndikambiya weyosi waku yimwi kweniko, kuti mungajiŵanaŵaniyanga kuluska mo mutenere kujiŵanaŵaniya cha,+ kweni muŵanaŵanengi mwakulongo kuti mwe ndi maŵanaŵanu ngamampha, mwakukoliyana ndi chivwanu cho Chiuta wakupereka kwaku weyosi.+
4 Chifukwa nge mo viliri kuti te ndi viŵalu vinandi muliŵavu limoza,+ kweni viŵalu vo vigwira ntchitu mwakuyanana cha,
5 nasi chinanga kuti te anandi, te liŵavu limoza mwaku Khristu, kweni munthu weyosi pakuyija ntchiŵalu chakubatikika kuchinyaki.+
6 Sonu pakuti te ndi mphasu zakupambanapambana mwakukoliyana ndi wezi ukulu wo tikupaskika,+ asani te ndi mphasu yakukamba mauchimi, tikambi mauchimi mwakukoliyana ndi chivwanu cho tapaskika;
7 pamwenga asani te ndi mphasu ya uteŵeti, tiyeni tichiti uteŵeti wenuwu, ndipu yo wasambiza, walutirizgi kusambiza;+
8 yo wachiska, wachiskengi;+ yo wagaŵa,* wagaŵengi mwamasangu;+ yo walongozga, walongozgengi mwaphamphu;*+ ndipu yo walongo lisungu, walilongongi mwakukondwa.+
9 Chanju chinu chije chambula uryarya.+ Tinkhani chinthu chiheni,+ kolesani chinthu chamampha.
10 Pa kwanja abali, muyanjanengi ndi mtima wosi. Pa kulongorana ulemu, mujengi panthazi.*+
11 Mugwirengi ntchitu mwaphamphu, mungachitanga ulesi cha.+ Jani akukole ndi mzimu.+ Teŵetiyani Yehova* nge akapolu.+
12 Kondwani ndi chilindizga. Mukunthiyengepu masuzgu.+ Mufwiyengepu kupemphera.+
13 Mugaŵanengi ndi akupaturika mwakukoliyana ndi vo akhumbika.+ Muyanjengi kulonde alendu.+
14 Lutirizgani kutumbika wo atikutombozgani.+ Mutumbikengi ndipu mungatembanga cha.+
15 Kondwani ndi wo akondwa. Liyani ndi wo aliya.
16 Muwonengi anyinu nge mo mutijiwone mwaŵeni; mungajanga ndi maŵanaŵanu ngakujikuzga cha, kweni jani ndi maŵanaŵanu ngakujiyuyuwa.+ Mungajiwonanga kuti mwe azeru cha.+
17 Mungaweziyanga cha chiheni pa chiheni ku munthu weyosi.+ Muŵanaŵaniyengi vinthu vo ŵanthu wosi ativiwona kuti vamampha.
18 Asani nkhwamachitika, jani mwachimangu ndi ŵanthu wosi, nge mo mungafiskiya.+
19 Akwanjiwa, mungaweziyanga mwija cha. Kweni siliyani malu ukali waku Chiuta,+ pakuti kukulembeka kuti: “Yehova* watiti, ‘Kuweze nduzga nkhwangu, ndazamuweze ndini.’”+
20 Kweni “asani murwani waku we ndi nja, mupaski chakurya, asani we ndi nyota, mupaski chakuti wamwi. Pakuti asani wachita viyo, umuwunjikiyengi maka ngamotu pamutu paki.”*+
21 Mungazomerezanga cha kuti chiheni chikuthereskeni, kweni lutirizgani kuthereska chiheni mwakuchita chamampha.+
Mazu Ngam'mphata
^ Wonani Mazu ngo Ngakonkhoskeka.
^ Pamwenga kuti, “yo wapereka.”
^ Pamwenga kuti, “ndi mtima wosi.”
^ Pamwenga kuti, “muyambengi ndimwi.”
^ Wonani Fundu Zakukumaliya A5.
^ Wonani Fundu Zakukumaliya A5.
^ Kung’anamuwa kuchitiska kuti munthu wasinthi kweniso kusongono unononu waki.
