Kalata Yakuluta kwa Aroma 3:1-31
3 Kumbi kuja Myuda kwe ndi phindu lelosi, pamwenga pe phindu wuli asani munthu wadumulika?
2 Kwe ndi phindu likulu ukongwa. Chakwamba ntchakuti akusungizgika mazu ngakupaturika ngaku Chiuta.+
3 Sonu fundu njakuti wuli? Asani ŵanthu anyaki alivi chivwanu, kumbi kuleka kuja ndi chivwanu kwawu kung’anamuwa kuti ŵanthu angamugomezga so cha Chiuta?
4 Awa! Kweni Chiuta waje muneneska+ chinanga munthu weyosi wangaja waboza,+ nge mo vikulembeke kuti: “Kuti uziŵiki kuti we murunji chifukwa cha mazu ngaku, kuti vikuyende umampha asani uyeruzgika.”+
5 Kweni asani urunji waku Chiuta uwoneke chifukwa cha kuŵavi urunji kwidu, nanga tingakambanji? Kumbi Chiuta ngwambula urunji pakulongo ukali waki? (Ndilongoro mazu ngapusu ngo ŵanthu angasuzgika cha kuvwa.)
6 Awa! Sonu asani ve viyo, Chiuta wazamuyeruzga wuli charu?+
7 Kweni asani boza langu lichitiska kuti uneneska waku Chiuta uziŵiki ukongwa kuti ŵanthu amukankhuski, ntchifukwa wuli ndiyeruzgika kuti nde wakubuda?
8 Ndilekiyenji kukamba nge mo ŵanthu anyaki atitipusikiya kuti tikamba kuti, “Tiyeni tichiti vinthu viheni kuti vinthu vamampha vizi”? Cheruzgu cha ŵanthu ŵenaŵa, ntchakukoliyana ndi urunji.+
9 Sonu muwona wuli? Kumbi isi tiphara anyidu? Awa! Pakuti takamba kali kuti wosi, Ayuda ndi Agiriki mbakubuda;+
10 nge mo vikulembeke kuti: “Palivi munthu murunji chinanga njumoza,+
11 palivi munthu weyosi wakuziŵa vinthu, kweniso palivi munthu weyosi yo wapenjapenja Chiuta.
12 Ŵanthu wosi apetuka, ŵanthu wosi aja abwekabweka, palivi munthu yo walongo lisungu, palivi chinanga njumoza.”+
13 “Khosi lawu ndi dindi lakujulika; ndipu akamba boza ndi malilimi ngawu.”+ “Poyizoni wa njoka ya chipi we kusi kwa milomu yawu.”+
14 “Ndipu mulomu wawu wazaza mazu ngakutemba kweniso ngakumwaza mtima.”+
15 “Maphazi ngawu ngatchimbiriya kuchidira ndopa.”+
16 “Kubwanganduka ndipuso masuzgu ve mu nthowa zawu,
17 ndipu yiwu atiyiziŵa cha nthowa ya chimangu.”+
18 “Pa masu pawu, palivi kopa Chiuta.”+
19 Sonu tiziŵa kuti vinthu vosi vo Dangu* likamba, vikambikiya ŵanthu wo ŵe pasi pa Dangu,* kuti mulomu wewosi uleki kulongoro ndipuso kuti charu chosi chije chakwenere kulangika ndi Chiuta.+
20 Mwaviyo, palivi munthu yo* wazamukambika kuti ndi murunji pa masu paki chifukwa cha ntchitu za dangu,+ pakuti ubudi waziŵika umampha chifukwa cha dangu.+
21 Kweni sonu chinanga kuti pangaŵavi dangu, urunji waku Chiuta uwoneke mbwenu,+ pakuti Dangu* ndipuso vo achimi akulemba vipereka ukaboni,+
22 ndipu urunji waku Chiuta uwoneke chifukwa chakuja ndi chivwanu mwaku Yesu Khristu ku ŵanthu wosi wo ŵe ndi chivwanu. Pakuti palivi kupambana.+
23 Chifukwa wosi mbakubuda ndipu mbakupeleŵere pa unkhankhu waku Chiuta.+
24 Iyu watiŵawona kuti mbarunji chifukwa cha wezi waki ukulu+ wo wakuwulongo mwakuŵafwatuwa ndi sembi yakuwombole yo Khristu Yesu wakupereka,+ ndipu venivi ve nge mphasu yawezi.+
25 Chiuta wangupereka Khristu kuja sembi yakupepese maubudi* kuti ŵanthu aje pa chimangu ndi Chiuta+ mwakuja ndi chivwanu mu ndopa zaku Khristu.+ Venivi vilongo urunji waki, chifukwa Chiuta walekerezga ndi chilatu chakuti wagowoke maubudi ngo ngakuchitika kali.
26 Venivi vilongo urunji waki mu nyengu yinu, kuti iyu waje murunji+ chinanga mphanyengu yo wawona munthu yo we ndi chivwanu mwaku Yesu kuti ndi murunji.+
27 Sonu pe chakumalikiya ya pa? Awa, palivi chakumalikiya. Chifukwa cha dangu laki nili? La ntchitu?+ Awa, kweni chifukwa cha dangu la chivwanu.
28 Pakuti tiwona kuti munthu waziŵika kuti ndi murunji chifukwa cha chivwanu, pade pa ntchitu za dangu.+
29 Pamwenga kumbi iyu ndi Chiuta wa Ayuda pe?+ Asi iyu ndi Chiuta wa ŵanthu amitundu yinyaki so?+ Hinya, iyu ndi Chiuta wa ŵanthu amitundu yinyaki so.+
30 Pakuti Chiuta njumoza,+ ŵanthu akudumulika wazakuŵawona kuti mbarunji+ chifukwa cha chivwanu chawu ndipu ŵanthu ambula kudumulika, nawu so wazakuŵawona kuti mbarunji+ chifukwa cha chivwanu chawu.
31 Kumbi sonu tikhumba kumalisa dangu chifukwa cha chivwanu chidu? Awa! Kweni, tivikiliya dangu.+
Mazu Ngam'mphata
^ Wonani Mazu ngo Ngakonkhoskeka.
^ Wonani Mazu ngo Ngakonkhoskeka.
^ Mazu ngaki chayingu, “palivi mnofu wo.”
^ Wonani Mazu ngo Ngakonkhoskeka.
^ Pamwenga kuti, “sembi yakubenekere maubudi; yakuyanjanisa.”
