Kalata Yakuluta kwa Aroma 4:1-25
4 Asani ve viyo, kumbi tingakamba kuti mpapi widu wakali Abrahamu wanguyanduwanji?
2 Mwakuyeruzgiyapu, asani Abrahamu wangukambika kuti ndi murunji chifukwa cha ntchitu, watingi wajengi ndi chifukwa chakumalikiya, kweni kwaku Chiuta cha.
3 Kumbi lemba likambanji? “Abrahamu wenga ndi chivwanu mwaku Yehova* ndipu Iyu wangumuwona kuti wenga murunji.”+
4 Sonu ku munthu yo wagwira ntchitu, malipiru ngaki watingawona nge wezi ukulu cha, kweni watingawona nge chinthu cho wakhumbikanga kulonde.*
5 Kweni munthu yo wagwira ntchitu cha, mweniyo wavwana mwaku Yo wakamba munthu wambula kopa Chiuta kuti ndi murunji, Chiuta watimuwona kuti ndi murunji chifukwa cha chivwanu chaki.+
6 Davidi nayu wangukamba kuti ngwakukondwa munthu yo Chiuta watimuwona kuti ndi murunji pade pa ntchitu, iyu wanguti:
7 “Mbakukondwa ŵanthu wo ntchitu zawu zakususkana ndi marangu zagowokereka kweniso wo maubudi ngawu ngabenekereka.*
8 Ngwakukondwa munthu yo Yehova* wazakungakumbukapu cha maubudi ngaki.”+
9 Kumbi mbanthu akudumulika pe wo akondwa, pamwenga ŵanthu ambula kudumulika nawu so akondwa?+ Pakuti tititi: “Chivwanu chaku Abrahamu chinguchitiska kuti Chiuta wamuwonengi kuti wenga murunji.”+
10 Kumbi wangumuwona pa nyengu niyi kuti wenga murunji? Pa nyengu yo wenga wakudumulika pamwenga po wenga wambula kudumulika? Penga pa nyengu yo wenga wambula kudumulika.
11 Ndipu wangulonde chisimikizu+ cha kudumulika nge chidindu chaurunji chifukwa cha chivwanu cho wenga nachu wechendadumuliki, kuti waje wusewu wa ŵanthu wosi ambula kudumulika wo ŵe ndi chivwanu,+ kuti Chiuta waŵawoni kuti mbarunji.
12 Ndipuso kuti waje wisi wa mphapu yakudumulika, wusewu wa ŵanthu wo angangamiya dangu la kudumulika kweniso wusewu wa ŵanthu wo atichilondo umampha chivwanu cho wusefwi Abrahamu+ wenga nachu wechendadumuliki.
13 Pakuti ndi dangu cha lo linguchitiska Abrahamu pamwenga mphapu* yaki kulonde layizgu lakuti wazamuhara charu,+ kweni urunji chifukwa cha chivwanu.+
14 Pakuti asani wo angangamiya dangu ndiwu azamuhara, mbwenu kuja ndi chivwanu nkhwambula phindu ndipu layizgu lo lamala ntchitu.
15 Kukamba uneneska, Dangu* lichitiska kuti ukali waku Chiuta uwoneki,+ kweni po palivi dangu palivi mphulupulu.+
16 Layizgu likuperekeka chifukwa cha chivwanu kuti uje wezi ukulu,+ kuti layizgu lenili lije lakusimikizika ku mphapu* yaki yosi,+ kwaku wo angangamiya Dangu,* kweniso kwaku wo angangamiya chivwanu chaku Abrahamu, ada aku tosi.+
17 (Venivi ve nge mo vikulembeke kuti: “Ndakusankha kuti uje wusewu wa mitundu yinandi ya ŵanthu.”)+ Venivi ndivu Chiuta mweniyo Abrahamu wanguja ndi chivwanu mwaku iyu wanguwona, Chiuta yo wayuska ŵanthu akufwa ndipuso wakamba vinthu vo palivi nge kuti vilipu.*
18 Iyu wenga ndi chilindizga kweniso chivwanu kuti wazamuja wusewu wa mitundu yinandi ya ŵanthu chinanga kuti venivi vawonekanga nge kuti vingachitika cha. Iyu wagomezganga venivi chifukwa cha vo vingukambika kuti: “Ndimu so mphapu* yaku yazamuŵiya.”+
19 Chinanga kuti chivwanu chaki chingudewezeka cha, kweni iyu wawonanga liŵavu laki nge kuti ndakufwa (pakuti wenga ndi vyaka pafufupi 100)+ ndipuso kuti chibaliru chaku Sara chenga chakufwa.*+
20 Kweni chifukwa cha layizgu laku Chiuta chivwanu chaki chingudewezeka cha, kweni chinguja chanthazi ndipu wakankhuskanga Chiuta
21 ndipuso wasimikizanga ndi mtima wosi kuti Chiuta watondekengi cha kufiska vo wangumulayizga.+
22 Mwaviyo, “Chiuta wangumuwona kuti wenga murunji.”+
23 Kweni mazu ngakuti “wangumuwona” ngangulembeke iyu pe cha,+
24 kweni ngakulembeke so isi, taŵanthu wo wazakutiwona kuti te arunji chifukwa cha kugomezga mwaku Iyu yo wakuyuska Yesu, Ambuyafwi ku nyifwa.+
25 Yesu wakuperekeka chifukwa cha maubudi ngidu+ ndipuso wakuyuskika kuti Chiuta watiwoni kuti te arunji.+
Mazu Ngam'mphata
^ Wonani Fundu Zakukumaliya A5.
^ Pamwenga kuti, “watingawona nge ngongoli.”
^ Pamwenga kuti, “ngagowokereka.”
^ Wonani Fundu Zakukumaliya A5.
^ Mazu ngaki chayingu, “mbewu.”
^ Wonani Mazu ngo Ngakonkhoskeka.
^ Mazu ngaki chayingu, “mbewu.”
^ Wonani Mazu ngo Ngakonkhoskeka.
^ Yapa pangafwatulikiya so kuti, “ndipuso wachitiska kuti vinthu vo kulivi, viŵeku.”
^ Mazu ngaki chayingu, “mbewu.”
^ Pamwenga kuti, “kuti Sara wenga chumba.”
