Dotoronome 12:1-32
12 “Izi ndi fundu ndipuso vyeruzgu vo mutenere kuchivilondo mwakuphwere mu mazuŵa ngosi ngo mwamujaliya ndi umoyu mucharu cho Yehova Chiuta wa apapi ŵinu akali, wakupaskeningi kuti chije chinu.
2 Mukanangiyi limu malu ngosi ngo mitundu yo mulondengi charu chawu yiteŵetiyaku achiuta ŵawu,+ kwali mphachanya pa mapiri ngatalingatali, kwali mphachanya pa mitunthu pamwenga pasi pa chimiti chechosi chakubiriŵira.
3 Mukabwanganduliyi pasi maguŵa ngawu nga sembi, mukaswi vipilala vawu vakupaturika,+ mukawotchi pamotu mapolu ngawu ngakupaturika* ndipuso mukawisiyi pasi vikozgu vakujoba va achiuta ŵawu,+ kuti mazina nga achiuta wo, ngakatuzgikepu pamalu ngo.+
4 “Mungachiteŵetiyanga Yehova Chiuta winu mu nthowa yeniyo cha.+
5 Kweni mukapenjengi Yehova Chiuta winu pamalu ngengosi ngo wasankha kuŵikapu zina laki ndipuso pamalu ngo waja, pakati pa mafuku nginu, ndipu kweniko ndiku mukalutengi.+
6 Kweniko ndiku mukalutengi ndi sembi zinu zakupiriza,+ sembi zinu zinyaki, vatchumi vinu,+ vakupereka vakutuliya mujanja linu,+ sembi zinu zakulapizga, sembi zo mupereka mwakukhumba mwija+ ndipuso viŵetu vakwamba kuwaku pa ng’ombi zinu kweniso pa mbereri zinu.+
7 Yimwi ndi mabanja nginu muziryiyengi kweniko vinthu venivi pa masu paku Yehova Chiuta winu+ ndipu muzikondwengi chifukwa cha vosi vo mwachita,+ pakuti Yehova Chiuta winu wakutumbikani.
8 “Mungazichitanga nge mo tichitiya panu msanawale cha, po weyosi wachita cho wawona kuti ntchakwenere mu masu mwaki,*
9 chifukwa mwechendafiki kumalu ngakupumuliyaku+ kweniso mwechendalonde* chihara cho Yehova Chiuta winu watikupaskani.
10 Asani mwayambuka Yorodani+ ndipu mwayamba kuja mucharu cho Yehova Chiuta winu watikupaskani kuti chije chinu, iyu wazakukupumuzgani kwa arwani ŵinu wosi wo akuzunguliyani ndipu mwazamujanga mwakuvikilirika.+
11 Mukalutengi ndi vinthu vosi vo nditikulamulani kumalu ngo Yehova Chiuta winu wasankha kuti kujengi zina laki.+ Mukalutengi ndi sembi zinu zakupiriza, sembi zinu zinyaki, vatchumi vinu,+ vakupereka vakutuliya mujanja linu ndipuso sembi zosi zakulapizga zo mwalayizga kuti muperekengi kwaku Yehova.
12 Mwazamukondwa pa masu paku Yehova Chiuta winu,+ yimwi, ŵana ŵinu anthulumi, ŵana ŵinu anthukazi, akapolu ŵinu anthulumi ndi anthukazi ndipuso Alevi mumatawuni* nginu, pakuti Alevi alivi chigaŵa pamwenga chihara pakati pinu.+
13 Muziphwere ukongwa kuti mungaziperekanga cha sembi zinu zakupiriza pamalu ngengosi ngo mwawona.+
14 Muziperekengi sembi zinu zakupiriza pamalu ngo Yehova wasankha pe mu chimoza mwa vigaŵa va mafuku nginu, ndipu kweniko ndiku muzichitiyengi vosi vo nditikulamulani.+
15 “Kweniso asani wakhumbira nyama, uzibayengi ndi kurya+ mwakukoliyana ndi mo Yehova Chiuta waku wakutumbikiya mumatawuni ngaku ngosi. Munthu wakufipiskika ndipuso munthu wambula kufipiskika, wangazirya nyama yo, nge mo uryiya mbaŵa pamwenga mphoyu.
16 Kweni ungaryanga cha ndopa;+ utenere kuzidira pasi nge maji.+
17 Wazamuzomerezeka cha kuryiya mumatawuni ngaku chatchumi cha mbewu zaku, vinyu waku wasonu, mafuta ngaku, viŵetu vakwamba kuwaku pa ng’ombi zaku kweniso pa mbereri zaku,+ sembi zaku zosi zakulapizga zo walayizga pamwenga vakupereka vakutuliya mujanja laku.
18 Vinthu venivi wazakuviryiya pa masu paku Yehova Chiuta waku, pamalu ngo Yehova Chiuta waku wazamusankha,+ yiwi ndi mwana waku munthulumi, mwana waku munthukazi, mteŵeti waku munthulumi kweniso munthukazi, ndipuso Mlevi yo waja mumatawuni ngaku; ndipu wazamukondwa pa masu paku Yehova Chiuta waku chifukwa cha vosi vo wachita.
19 Ukawonesesengi kuti utimuluwa cha Mlevi+ pa nyengu yosi yo wamujaliya ndi umoyu mucharu chaku.
20 “Asani Yehova Chiuta waku wazikuzga chigaŵa chaku+ nge mo wakukulayizgiya,+ ndipu yiwi wazikamba kuti, ‘Ndikhumba nyama,’ chifukwa chakuti wakhumbira kurya nyama, ungazirya nyama nyengu yeyosi yo wayikhumbiya.+
21 Asani malu ngo Yehova Chiuta waku wasankha kuti waŵikeku zina laki+ nge kutali ndi yiwi, uzibayengi zinyaki mwa ng’ombi zaku pamwenga mbereri zaku zo Yehova wakupaska, nge mo ndakulamuliya, ndipu uziryiyengi mutawuni yaku nyengu yeyosi yo wakhumbiya nyama.
22 Ungazirya nyama yo, nge mo uryiya mbaŵa pamwenga mphoyu;+ munthu wakufipiskika ndipuso munthu wambula kufipiskika wangazirya.
23 Usimikizi mtima kuti ungaryanga cha ndopa,+ chifukwa ndopa mbumoyu,+ ndipu ungaryanga cha umoyu limoza ndi nyama.
24 Ungaryanga cha ndopa. Uzidirengi pasi nge maji.+
25 Ungaryanga cha ndopa kuti vinthu vikuyende umampha, yiwi ndi ŵana ŵaku, chifukwa uchita cho ntchakwenere mu masu mwaku Yehova.
26 Uchiluta kumalu ngo Yehova wazamusankha, uzilutengi ndi vinthu vakupaturika vo vaku pe, ndipuso sembi zaku zakulapizga.
27 Kweniko ndiku wamuperekiyanga sembi zaku zakupiriza, nyama kweniso ndopa,+ paguŵa la sembi laku Yehova Chiuta waku. Ndopa za sembi zaku zizipungulikengi musina mwa guŵa la sembi+ laku Yehova Chiuta waku, kweni nyama ya sembi yo uziryengi.
28 “Uziwonesesengi kuti uvwiya mazu ngosi ngo nditikulamula, kuti yiwi ndi mphapu yaku vinthu vizikuyendiyeningi umampha, chifukwa chakuti uchita vinthu vamampha kweniso vakwenere mu masu mwaku Yehova Chiuta waku.
29 “Asani Yehova Chiuta waku wananga mitundu yo ulondengi charu chawu,+ ndipu yiwi wayamba kuja mucharu cho,
30 uziphwere kuti uzileki kuwira muchiŵana asani Chiuta waziŵananga pa masu paku. Ungazifumbanga cha vakukwaskana ndi achiuta ŵawu kuti, ‘Kumbi mitundu iyi yaŵasopanga wuli achiuta ŵawu? Nani ndichitengi viyo.’+
31 Yehova Chiuta waku ungazimuchitiyanga venivi cha, chifukwa yiwu achitiya achiuta ŵawu vinthu vosi vaukazuzi vo Yehova watinkha, yiwu atotcha ŵana ŵawu anthulumi kweniso ŵana ŵawu anthukazi pamotu kuti apereki sembi kwa achiuta ŵawu.+
32 Uwonesesengi kuti ulondo mazu ngosi ngo ndakulamula.+ Ungasazgiyangaku cha pamwenga kutuzgiyaku.+
Mazu Ngam'mphata
^ Wonani Mazu ngo Ngakonkhoskeka.
^ Pamwenga kuti, “cho waŵanaŵana kuti ntchakwenere.”
^ Mazu ngaki chayingu, “mwechendafiki ku.”
^ Mazu ngaki chayingu, “mumageti.”
