Dotoronome 2:1-37
2 “Pavuli paki, tinguwelere ndipu tinguselere kuchipululu kuziya kunthowa ya ku Nyanja Yiyera, nge mo Yehova wangundikambiya,+ ndipu tingwenda kwa mazuŵa nganandi kuzunguliya Phiri la Seiri.
2 Pakumaliya, Yehova wangundikambiya kuti,
3 ‘Mwazunguliya phiri ili kwa nyengu yitali. Sonu weleriyani ndipu muselere kunkhondi.*
4 Kambiya Ayisirayeli kuti: “Mujumphengi mumphaka ya abali ŵinu, ŵana aku Esawu,+ wo aja ku Seiri.+ Yiwu akuwopeningi+ ndipu yimwi mutenere kuphwere ukongwa.
5 Mungayambananga nawu cha, pakuti ndikupaskeningi cha chigaŵa chechosi cha charu chawu, chinanga nkhachigaŵa kamanavi kakukandapu phazi linu, chifukwa Phiri la Seiri ndikulipereka kwaku Esawu kuti chije chihara chaki.+
6 Mukaŵapaskengi ndalama pa chakurya cho mwamukurya ndipuso mukalipirengi ndalama pa maji ngo mwamukumwa.+
7 Pakuti Yehova Chiuta winu wakutumbikani pa vosi vo mwachita. Iyu waziŵa umampha kwenda kwinu muchipululu chikulu ichi. Kwa vyaka 40 ivi, Yehova Chiuta winu wenga namwi ndipu mwasoŵanga kanthu cha.”’+
8 Mwaviyo, tinguŵambala abali ŵidu, ŵana aku Esawu,+ wo aja ku Seiri. Tingukhwecha nthowa ya ku Araba, Elati ndi Eziyoni-geberi.+
“Pavuli paki, tinguwelere ndipu tingwenda nthowa ya kuchipululu cha Mowabu.+
9 Sonu Yehova wangundikambiya kuti, ‘Ungayambananga nawu cha Amowabu pamwenga kuchita nawu nkhondu, pakuti ndikupaskengi cha chigaŵa chechosi cha charu chawu nge chihara, chifukwa charu cha Ari ndachipereka ku mphapu yaku Loti+ nge chihara chawu.
10 (Aemimu+ ajanga kwenuku kali, ŵanthu anthazi, anandi ndipuso atali nge Aanaki.
11 Arefayimu+ awonekanga so nge Aanaki,+ ndipu Amowabu adananga Arefayimu wo kuti Aemimu.
12 Pakwamba Ahori+ ajanga ku Seiri, kweni ŵana aku Esawu anguŵalonda charu chawu ndi kuŵamala ndipu angwamba kuja mwenimo,+ nge mo Ayisirayeli azamutole charu cho chazamuja chawu, cho Yehova waŵapaskengi.)
13 Sonu lutani ndipu yambukani Dambu* la Zeredi.’ Mwaviyo tinguyambuka Dambu la Zeredi.+
14 Kutuwa ku Kadeshi-baniya mpaka po tinguyambukiya Dambu* la Zeredi tingwenda vyaka 38, mpaka po mugonezi wosi wa anthulumi akuti angaluta ku nkhondu ungumaliya mumsasa, nge mo Yehova wanguŵalapizgiya.+
15 Janja laku Yehova lingulimbana nawu kuti waŵatuzgemu mumsasa mpaka po angumaliya.+
16 “Anthulumi wosi akuti angaluta ku nkhondu ŵati amala pakati pa Ayisirayeli,+
17 Yehova wangulongoro so nani, ndipu wangukamba kuti,
18 ‘Msanawale mujumphengi muchigaŵa cha Mowabu, cho ntcharu cha Ari.
19 Asani mutuza kufupi ndi Aamoni mungaŵasuzganga cha pamwenga kuyambana nawu, pakuti ndikupaskeningi cha chigaŵa chechosi cha charu cha Aamoni nge chihara, chifukwa ndachipereka ku mphapu yaku Loti nge chihara chawu.+
20 Charu chenichi nachu chaziŵikanga kuti ntcha Arefayimu.+ (Pakwamba Arefayimu ajanga kwenuku, ndipu Aamoni adananga Arefayimu kuti Azamuzumimu.
21 Yiwu ŵenga anthazi, anandi ndipuso atali nge Aanaki.+ Kweni Yehova wanguŵamala pa masu pa Aamoni, ndipu yiwu anguŵadikisa ndi kwamba kuja mucharu chawu.
22 Ivi ndivu wanguchitiya ŵana aku Esawu, wo sonu aja ku Seiri,+ pa nyengu yo wangumala Ahori pa masu pawu, kuti alondi charu cha Ahori+ ndipu yiwu aja mucharu cho mpaka sonu.
23 Kweni Aavimu, ajanga mumizi mpaka kuchifika ku Gaza+ mpaka po Akafitorimu+ wo angutuliya ku Kafitori* anguŵamaliya ndi kwamba kuja mucharu chawu.)
24 “‘Sokani ndipu yambukani Dambu* la Arinoni.+ Awonani, ndapereka mu manja mwinu Sihoni,+ Muamori, fumu ya ku Heshiboni. Mwaviyo, yambani kuto charu chaki ndipu chitani nayu nkhondu.
25 Msanawale ndiyambengi kuchitiska ŵanthu wosi pacharu chapasi wo avwa vaku yimwi kuti akuwopeni kweniso achiti namwi mantha. Yiwu azamutimbanyizgika ndi kumbwambwanthiya chifukwa chaku yimwi.’+
26 “Pavuli paki, ndingutuma mathenga kutuliya muchipululu cha Kedemoti+ kuluta kwaku Sihoni, fumu ya ku Heshiboni, kuti akamukambiyi mazu ngachimangu ngakuti,+
27 ‘Ndizomerezeni kuti ndijumphi mucharu chinu. Ndiyendengi munthowa pe, ndipetukiyengi kumaryi cha pamwenga kumazge.+
28 Ndazamukurya chakurya cho mwazakundigulisa pe, kweniso ndazamukumwa maji ngo mwazakundigulisa pe. Ndizomerezeni kuti ndijumphemu ŵaka nthowa.
29 Venivi ndivu ŵana aku Esawu, wo aja ku Seiri kweniso Amowabu wo aja ku Ari angundichitiya, mpaka po ndinguyambukiya Yorodani kuluta kucharu cho Yehova Chiuta widu watitipaska.’
30 Kweni Sihoni, fumu ya ku Heshiboni wangutikaniza kujumpha mucharu chaki, chifukwa chakuti Yehova Chiuta winu wanguzomereza kuti wachiti mtafu*+ ndipuso kuti mtima waki unonopi, kuti wamupereki mu manja mwinu nge mo viliri sonu.+
31 “Pavuli paki, Yehova wangundikambiya kuti, ‘Awona, ndayambapu kali kupereka Sihoni kweniso charu chaki mu manja mwaku. Yambapu kuto charu chaki.’+
32 Sihoni ndi ŵanthu ŵaki wosi, ŵati aza kuzichita nasi nkhondu ku Yahazi,+
33 Yehova Chiuta widu wangumupereka mu manja mwidu, ndipu tingumuthereska, iyu, ŵana ŵaki anthulumi kweniso ŵanthu ŵaki wosi.
34 Tingulonda matawuni ngaki ngosi pa nyengu yo, ndipuso tingubwanganduwa tawuni yeyosi. Ndipu tingubaya anthulumi, anthukazi ndi ŵana. Pengavi yo wangupona.+
35 Tingutoku ŵaka viŵetu ndipuso vinthu vinyaki vo tingusaniya mumatawuni ngo tinguthereska.
36 Kwambiya ku Aroweri,+ tawuni yo ye mumphepeti mwa Dambu* la Arinoni (kusazgapu tawuni yo ye mudambu lo), mpaka kuchifika ku Giliyadi, palivi tawuni yo tingutondeka kufikaku. Yehova Chiuta widu wangupereka matawuni ngosi ngenanga mu manja mwidu.+
37 Kweni mungufika cha mucharu cha Aamoni,+ cho che mu Dambu* la Yaboku+ ndipuso mungufika cha kumatawuni nga muchigaŵa chamapiri kweniso malu nganyaki ngengosi ngo Yehova Chiuta widu wangukukanizani.
Mazu Ngam'mphata
^ Anyaki akamba kuti, “kumpotu.”
^ Ili ndi dambu lo lija ndi maji mu nyengu ya vuwa pe.
^ Ili ndi dambu lo lija ndi maji mu nyengu ya vuwa pe.
^ Kung’anamuwa Kirete.
^ Ili ndi dambu lo lija ndi maji mu nyengu ya vuwa pe.
^ Mazu ngaki chayingu, “wanguzomereza kuti mzimu waki unonopi.”
^ Ili ndi dambu lo lija ndi maji mu nyengu ya vuwa pe.
^ Ili ndi dambu lo lija ndi maji mu nyengu ya vuwa pe.
