Dotoronome 20:1-20
20 “Asani mwaluta kuchichita nkhondu ndi arwani ŵinu ndipu mwawona mahachi ngawu, magaleta ngawu ndipuso asilikali ŵawu wo mbanandi kuluska yimwi, mungaŵawopanga cha, pakuti Yehova Chiuta winu yo wakukutuzgani mucharu cha Ijipiti we namwi.+
2 Asani mwe pafupi kuluta ku nkhondu, wasembi wazengi pafupi ndi ŵanthu ndipu wakambiskanengi nawu.+
3 Iyu waŵakambiyengi kuti, ‘Vwani yimwi Ayisirayeli, mwe pafupi kuchichita nkhondu ndi arwani ŵinu. Mungatenthemanga cha. Mungawopanga cha pamwenga kuchita mantha, pamwenga kumbwambwanthiya chifukwa chaku yiwu,
4 pakuti Yehova Chiuta winu waluta namwi kuti wakachiti nkhondu ndi arwani ŵinu kweniso kuti wakakutaskeni.’+
5 “Ŵara ŵa asilikali nawu akambiyengi ŵanthu kuti, ‘Kumbi ndiyani yo wazenga nyumba yaki ndipu wechendayijuliyi? Wawere kunyumba yaki kuchitiya kuti wangachifwa ku nkhondu ndipu munthu munyaki wangazijuliya nyumba yo.
6 Ndipuso ndiyani yo walima munda wa mphereska ndipu wechendayambi kurya vipasu vaki? Wawere kunyumba yaki kuchitiya kuti wangachifwa ku nkhondu ndipu munthu munyaki wangaziyamba kurya vipasu va mumunda wo.
7 Nanga ndiyani yo wakukole munthukazi ndipu wechendamuto? Wawere kunyumba yaki+ kuchitiya kuti wangachifwa ku nkhondu ndipu munthulumi munyaki wangazito munthukazi yo.’
8 Ŵara ŵa asilikali afumbengi so ŵanthu wo kuti, ‘Ndiyani yo watopa ndipuso kuchita mantha?+ Wawere kunyumba yaki kuti wangachichitiska kuti abali ŵaki aje ndi mantha nge iyu.’*+
9 Asani ŵara ŵa asilikali amaliza kulongoro ndi ŵanthu, asankhengi alongozgi ŵa asilikali kuti alongozgi ŵanthu.
10 “Asani mwafika pafupi ndi tawuni yo mukhumba kuchita nayu nkhondu, muŵakambiyengi dankha fundu zakuti paje chimangu.+
11 Asani akumukani mwachimangu ndi kukujuliyani mageti ngawu, ŵanthu wosi wo musaniyengi mwenimo ajengi ŵinu kuti akugwiriyeningi ntchitu ya ukapolu ndi kukuteŵetiyani.+
12 Kweni asani akana kuja namwi pa chimangu ndipu akhumba kuchita namwi nkhondu, muzingilizengi tawuni yo,
13 Yehova Chiuta winu wayiperekengi mu manja mwinu, ndipu mutenere kubaya ndi lipanga munthulumi weyosi yo musaniyengi mwenimo.
14 Kweni anthukazi, ŵana, viŵetu ndipuso vinthu vosi vo ve mutawuni yo, vosi vo mwaphanga, muvitongi kuti vije vinu+ ndipu muryengi vinthu vo mwaphanga arwani ŵinu, venivo Yehova Chiuta winu wakupaskani.+
15 “Venivi ndivu muchitengi ndi matawuni ngosi ngo nge kutali ukongwa ndi yimwi, matawuni nga mitundu yo ye kufupi ndi yimwi cha.
16 Kweni mumatawuni nga ŵanthu yaŵa, ngo Yehova Chiuta winu watikupaskani nge chihara, mungazomerezanga cha kuti muje chinthu chechosi chamoyu.+
17 Mumalu mwaki, munangi chinthu chechosi. Munangi Ahiti, Aamori, Akanani, Aperezi, Ahivi ndipuso Ayebusi+ nge mo Yehova Chiuta winu wakulamuliyani;
18 kuti aleki kukusambizani kuchita vinthu vosi vaukazuzi vo achitiya achiuta ŵawu, ndi kukuchitiskani kuti mubudiyi Yehova Chiuta winu.+
19 “Asani mwazingiliza tawuni ndi kuyito pavuli pakuti mwachita nayu nkhondu kwa mazuŵa nganandi, mungawisiyanga pasi cha vimiti vo ve mwenimo. Muryengi vipasu vaki, kweni mungavidumuwanga cha.+ Kumbi mutenere kuyukiya chimiti cha mumunda nge mo muyukiya munthu?
20 Mungadumuliya pasi vimiti vo muziŵa kuti vipasu vaki vakurya cha. Mungavidumuliya pasi ndi kupangiya vakukwerapu pakulimbana ndi tawuni yo muchita nayu nkhondu, mpaka po tawuni yo yabwangandulikiya.
Mazu Ngam'mphata
^ Mazu ngaki chayingu, “wangachichitiska kuti mitima ya abali ŵaki yisongonoki nge mtima waki.”
