Dotoronome 28:1-68
28 “Ndipu asani uvwiyengi mazu ngaku Yehova Chiuta waku kwambula kutondeka, mwakuwonesesa kuti ulondo marangu ngosi ngo nditikulamula msanawale, Yehova Chiuta waku wakukwezengi kuluska mitundu yinyaki yosi yo ye pacharu chapasi.+
2 Asani uvwiyengi mazu ngaku Yehova Chiuta waku, vitumbiku vosi ivi vikulondongi ndi kukusaniya:+
3 “Utumbikikengi mutawuni yaku ndipuso utumbikikengi mumunda waku.+
4 “Atumbikikengi ŵana ŵaku,*+ vipasu va mumunda waku, ŵana a viŵetu vaku, ŵana a ng’ombi zaku ndi ŵana a mbereri zaku.+
5 “Yitumbikikengi sokola yaku+ kweniso mbali yaku yakukasiyamu fulawu.+
6 “Utumbikikengi asani usere ndipuso utumbikikengi asani utuwa.
7 “Yehova wachitiskengi arwani ŵaku wo atikuyukiya kuti athereskeki pa masu paku.+ Yiwu ayendengi munthowa yimoza pakuzikuyukiya kweni aseleriyengi nthowa 7 achikuthaŵa.+
8 Yehova walamulengi kuti nkhokwi zaku+ kweniso vosi vo uchita vitumbikiki, ndipu iyu wakutumbikengi kwambula kutondeka mucharu cho Yehova Chiuta waku watikupaska.
9 Yehova wakuŵikeningi kuti muje ŵanthu ŵaki akupaturika+ nge mo wakulapizgiya kwaku yimwi,+ chifukwa chakuti mulutirizga kusunga marangu ngaku Yehova Chiuta winu ndi kwenda mu nthowa zaki.
10 Ŵanthu wosi pacharu chapasi azamuwona kuti muziŵika ndi zina laku Yehova,+ ndipu azakukuwopani.+
11 “Yehova wakuchitiskengi kuti uje ndi ŵana anandi ukongwa, viŵetu vinandi ndipuso vipasu vinandi+ mucharu cho Yehova wakulapizga kwa apapi ŵaku akali kuti wakupaskengi.+
12 Yehova wakujuliyengi nkhokwi yaki yamampha, kuchanya, kuti wapereki vuwa mucharu chaku pa nyengu yaki,+ kweniso kuti watumbiki vosi vo uchita. Yiwi wazamubwerekesanga vinthu ku mitundu yinandi kweni wazamubwerekanga vinthu cha kwaku yiwu.+
13 Asani ulutirizgengi kuvwiya marangu ngaku Yehova Chiuta waku ngo nditikulamula msanawale, Yehova wakuchitiskengi kuti uje mutu, muchiya cha; uŵengi pachanya,+ pasi cha.
14 Ungatuwangapu cha pa mazu ngosi ngo nditikulamula msanawale, kwali nkhuluta kumaryi pamwenga kumazge,+ kuti ulondo achiuta anyaki ndi kuŵateŵete.+
15 “Kweni asani uvwiyengi cha mazu ngaku Yehova Chiuta waku ndipuso asani ulekengi kulondo ulongozgi waki wosi kweniso marangu ngaki ngo nditikupaska msanawale, matembu ngosi yanga ngakulondongi ndi kukusaniya:+
16 “Utembekengi mutawuni yaku ndipuso utembekengi mumunda waku.+
17 “Yitembekengi sokola yaku+ kweniso mbali yaku yakukasiyamu fulawu.+
18 “Atembekengi ŵana ŵaku,*+ vipasu va mumunda waku, ŵana a ng’ombi zaku ndi ŵana a mbereri zaku.+
19 “Utembekengi asani usere ndipuso utembekengi asani utuwa.
20 “Yehova wakutumiyeningi thembu, chimtimbaheka kweniso chilangu pa vinthu vosi vo muchita mpaka po mutuzgikiyengepu ndi kumaliya limu mwaliŵi, chifukwa cha vinthu viheni vo muchita ndipuso chifukwa chakuti mwandijowo.+
21 Yehova wachitiskengi kuti nthenda yijaliliyi paku yimwi mpaka po wakutuzgiyanimu limu mucharu cho muluta kuchichito kuti chije chinu.+
22 Yehova wakulangeningi ndi chifuŵa chikulu, kufunda muliŵavu,+ vakutupa, kotcha ukongwa muliŵavu, lipanga,+ chifundizi chikulu ndipuso kodikodi,+ ndipu vinthu venivi vikulondoningi mpaka po mwamaliya.
23 Kuchanya kwazamuja nge mkuŵa ndipu pacharu chapasi pazamuja nge chisulu.+
24 Yehova wazakukuwisiyani mchenga ndi fuvu mucharu chinu kutuliya kuchanya nge vuwa mpaka po mwazimaliya.
25 Yehova wazamuchitiska kuti mutheri pa masu pa arwani ŵinu.+ Mwazamukwenda munthowa yimoza pakuchiyukiya arwani ŵinu, kweni mwazamuselere nthowa 7 muchiŵathaŵa; ndipu mwazamuja chinthu chakuchitiska mantha ku maufumu ngosi nga pacharu chapasi.+
26 Ndipu mathupi nginu ngazamuja chakurya cha viyuni vosi vakuchanya ndipuso nga vinyama vosi va pacharu chapasi, ndipu palivi munthu yo wazakuvidikisa.+
27 “Yehova wazakukulanga ndi vitufya va ku Ijipiti, nthenda ya chizuluŵa,* viŵawu ndipuso vakutupa vo wazamuchira navu cha.
28 Yehova wazakukufunthisa, wazamuchitiska kuti uje wachibulumutiya+ ndipuso wazamuchitiska kuti pakati pinu paje chimtimbaheka.
29 Wazamupapaskapapaska ndi msana, nge mo munthu wachibulumutiya wapapaskiya ndi usiku,+ ndipu vosi vo wazamuchita vazakukuyende umampha cha; ŵanthu azamulutirizga kukuryiya masuku pamutu kweniso kukubiya, ndipu palivi yo wazakukutaska.+
30 Wazamulayizga munthukazi kuti utoranengi nayu kweni munthulumi munyaki wazakumukolere. Wazamuzenga nyumba kweni wazamujamu cha.+ Wazamupanda munda wa mphereska kweni wazamukurya cha vipasu vaki.+
31 Ng’ombi yaku yazamubayika uchilereska kweni wazamuryaku cha. Ŵanthu azamukuba bulu waku uchilereska kweni wazamuwere cha kwaku yiwi. Mbereri zaku zazamuperekeka kwa arwani ŵaku kweni palivi yo wazakukutaska.
32 Ŵana ŵaku anthulumi kweniso ŵana ŵaku anthukazi azamuperekeka ku ŵanthu anyaki+ uchilereska. Yiwi wazakuŵakhumbiranga, kweni manja ngaku ngazamuŵavi nthazi.
33 Vipasu va mumunda waku kweniso vinthu vosi vo wazamuvuna vazamuryika ndi munthu wambula kumuziŵa,+ ndipu nyengu zosi ŵanthu azakukuryiyanga masuku pamutu ndi kukupweteka.
34 Wazamufuntha ndi vo masu ngaku ngazamuwona.
35 “Yehova wazakukulanga ndi vitufya vakupweteka kweniso vambula kuchizgika mumakongonu ndi mumalundi ngaku, vitufya vo vazamukwambiya kuphazi mpaka paliwombu.
36 Yimwi ndi fumu yo mwazakujiŵikiya, Yehova wazakukudikisiyani kucharu cho yimwi ndi apapi ŵinu mukuchiziŵapu cha,+ ndipu kweniko mwamuteŵete achiuta anyaki, achiuta avimiti kweniso amya.+
37 Ndipu kwekosi ko Yehova wazakukudikisiyani, mwazamuja chinthu chakuchitiska mantha, chinthu cho ŵanthu amitundu yosi azakuchinena ndipuso cho azakuchinyoza.+
38 “Wazamupandanga mbewu yinandi mumunda waku kweni wazamuvunanga vimanavi+ chifukwa azombi azamukurya mbewu zaku.
39 Wazamulima ndi kupanda mphereska kweni wazamukumwa cha vinyu waki ndipu wazamuvuna chechosi cha+ chifukwa chakuti vibungu vazamukurya mphereska zaku.
40 Wazamukuŵa ndi vimiti va maolivi muchigaŵa chaku chosi kweni wazamupaka mafuta cha chifukwa chakuti vipasu vaku va maolivi vazamuyoyoka.
41 Wazamubala ŵana anthulumi ndi ŵana anthukazi kweni azamulutirizga cha kuja ŵaku chifukwa chakuti azamuluta ku ukapolu.+
42 Vidononu vinandi* vazamutaka vimiti vaku vosi kweniso vipasu va mucharu chaku.
43 Mulendu yo waja pakati paku wazamukweriyangakweriyanga kweni yiwi wazamusikiyangasikiyanga.
44 Iyu wazakukubwerekesa vinthu kweni yiwi wazakumubwereka chechosi cha.+ Iyu wazamuja mutu kweni yiwi wazamuja muchiya.+
45 “Matembu ngosi+ ngenanga ngazengi paku yiwi, ngakulondongi ndipu ngakusaniyengi mpaka po wamaliya limu+ chifukwa cha kuleka kuvwiya mazu ngaku Yehova Chiuta waku kweniso chifukwa chakuleka kulondo ulongozgi waki ndipuso marangu ngaki ngo wakukupaska.+
46 Matembu yanga ngajengi paku yiwi ndi pa ŵana ŵaku nge chisimikizu chambula kumala kweniso nge chakuziziswa,+
47 chifukwa chakuti Yehova Chiuta waku ungumuteŵete mwakukondwa cha kweniso ndi mtima walikondwa pa nyengu yo wenga ndi vinthu vinandi.+
48 Yehova wazakukutumiya arwani ŵaku kuti akuyukiyi ndipu wazakuŵateŵete+ we ndi nja+ kweniso nyota, wavwala malizwazwa ndipuso ulivi chechosi. Iyu wazamuŵika goli lachisulu mukhosi mwaku mpaka po wakumaliya limu.
49 “Yehova wazakukuyuskiya mtundu wakutali kuti ukuyukiyi,+ mtundu wo wazamutuliya kukumaliya kwa charu chapasi, ndipu chineneru chaki wazakuchivwanga cha.+ Mtundu wo wazakukuvwandamiya nge nombu,+
50 mtundu wakuwoneka mwakofya, wo wazamuphweriyaku cha munthu wakukota pamwenga kwanjiya mwana.+
51 Yiwu azamukurya ŵana a viŵetu vinu ndipuso vipasu va mucharu chinu mpaka po mwamaliya limu. Azakukusiliyaniku mbewu yeyosi cha, vinyu wasonu pamwenga mafuta ndipuso ŵana a ng’ombi pamwenga ŵana a mbereri mpaka po akumaliyani.+
52 Yiwu azakukuzingilizani, azakukujaliyani mumatawuni* nginu mucharu chinu chosi mpaka po mipanda yinu yitali kweniso yakukho yo muthemba yawiya. Azakukuzingilizani ndi kukujaliyani mumatawuni nginu mucharu chinu chosi cho Yehova Chiuta winu wakupaskani.+
53 Pavuli paki, mwazamukurya ŵana ŵinu,* mwazamukurya mnofu wa ŵana ŵinu anthulumi ndi ŵana ŵinu anthukazi+ wo Yehova Chiuta winu wakupaskani, pakuti mwazamusuzgika ukongwa chifukwa chakuzingilizika ndi arwani.
54 “Chinanga ndi munthu wakulombotoka ukongwa kweniso yo akumuleremeka pakati pinu wazamuchitiya chitima mubali waki cha, pamwenga muwolu waki wakwanjiwa, pamwenga mwana waki munthulumi yo wajaku,
55 ndipu wazakuŵagaŵiyaku cha nyama ya ŵana ŵaki yo wazamukurya, chifukwa chakuti wazamuŵavi chechosi, pakuti mwazamusuzgika ukongwa mumatawuni nginu chifukwa chakuzingilizika ndi arwani.+
56 Ndipu munthukazi wakulombotoka kweniso yo akumuleremeka pakati pinu yo wakuŵanaŵanapu cha kuti wangakanda lundi laki pasi chifukwa chakuti akumuleremeka,+ wazakumuchitiya chitima cha mulumu waki wakwanjiwa, mwana waki munthulumi pamwenga mwana waki munthukazi.
57 Iyu wazakuvichitiya chitima cha vinthu vakumaliya vo vituwa pakati pa malundi ngaki asani wabala ndipuso wazakuŵachitiya chitima cha ŵana ŵaki wo wabala, chifukwa chakuti wazamukurya vinthu vo kweniso ŵana ŵaki mwachisisi, pakuti mwazamusuzgika ukongwa mumatawuni nginu chifukwa chakuzingilizika ndi arwani.
58 “Asani wazamuleka kusunga mwakuphwere mazu ngosi nga mu Dangu ili ngo ngakulembeka mubuku ili+ ndipuso asani wazamuleka kopa zina launkhankhu kweniso lakuchitiska mantha+ laku Yehova+ Chiuta waku,
59 Yehova wazakukulanga limoza ndi mphapu yaku, wazakukutumiya milili yakofya, yikulu kweniso yambula kumala,+ ndi nthenda zakofya ndipuso zambula kumala.
60 Wazakukutumiya nthenda zosi za ku Ijipiti zo wawopanga, ndipu zazamujaliriya paku yiwi.
61 Kweniso Yehova wazakukutumiya nthenda yeyosi pamwenga mulili wewosi wo ukulembeka cha mubuku la Dangu ili mpaka po yiwi wazamumaliya limu.
62 Chinanga kuti mwe anandi ukongwa nge nyenyezi zakuchanya,+ amanavi ŵaka aku yimwi ndiwu azamujaku+ chifukwa cha kuleka kuvwiya mazu ngaku Yehova Chiuta winu.
63 “Nge mo Yehova wangukondwe kukuwovyani kuti vinthu vikuyendiyeningi umampha kweniso kuti muyandani, ndimu so Yehova wakondwiyengi kukunangani ndi kukumaliyani limu. Ndipu mwazamutuzgikamu mucharu cho mwe pafupi kuchito kuja chinu.
64 “Yehova wazakukumbininiskiyani mu mitundu yosi ya ŵanthu, kutuliya kuchigoti cha charu chapasi mpaka kuchigoti chinyaki,+ ndipu kweniko mwamuteŵete achiuta avimiti kweniso amya wo yimwi ndi apapi ŵinu akali mukuŵaziŵapu cha.+
65 Mwazamuŵavi chimangu pakati pa mitundu yeniyi+ kweniso mwazamuŵavi malu ngakuti phazi linu likandepu kuti mupumuwi. Mumalu mwaki, Yehova wazamuchitiska kuti mufipengi mtima,+ wazamubaya masu nginu ndipuso mwazamusoŵanga chakuchita.+
66 Umoyu winu wazamuja pa ngozi ukongwa, mwazamujanga mwamantha usiku ndi msana; ndipu mwazamukayikiyanga kuti mulutirizgengi kuja ndi umoyu.
67 Ndi mlenji mwazamukambanga kuti, ‘Mphanyi kwenga mazulu!’ ndipu ndi mazulu mwazamukambanga kuti, ‘Mphanyi kwenga mlenji!’ chifukwa cha mantha ngo mwazamuja nangu mumtima mwinu kweniso chifukwa cha vo masu nginu ngazamuwona.
68 Yehova wazakukuweziyani ku Ijipiti pa sitima, ndipu mwazamukwenda munthowa yo ndingukukambiyani kuti, ‘Mwazakuyiwona so cha,’ ndipu kweniko mwazakujigulisa kwa arwani ŵinu kuti muje akapolu ŵawu anthulumi ndi akapolu ŵawu anthukazi, kweni kwazamuŵavi yo wazakukugulani.”
Mazu Ngam'mphata
^ Mazu ngaki chayingu, “Vitumbikikengi vipasu va mumoyu mwaku.”
^ Mazu ngaki chayingu, “Vitembekengi vipasu va mumoyu mwaku.”
^ Iyi ndi nthenda yo munthu watupa kwakuchitiya chimbuzi pamwenga watuwa thumbu.
^ Pamwenga kuti, “Vidononu vakupoma.”
^ Mazu ngaki chayingu, “mumageti.”
^ Mazu ngaki chayingu, “vipasu va mumoyu mwinu.”
