Dotoronome 30:1-20
30 “Asani mazu ngosi yanga ngazifiskika paku yiwi, vitumbiku ndipuso matembu ngo ndaŵika pa masu paku,+ kweniso asani wazingakumbuka+ we pakati pa mitundu yosi yo Yehova Chiuta waku wazakukumbininiskiyaku,+
2 ndipu asani waziwere kwaku Yehova Chiuta waku+ ndi kuvwiya mazu ngaki ndi mtima waku wosi kweniso umoyu waku wosi,+ mwakukoliyana ndi vinthu vosi vo nditikulamula msanawale, yiwi ndi ŵana ŵinu,
3 Yehova Chiuta waku wazakukutuzgaku ku ukapolu+ ndipu wazakukulongo lisungu+ ndi kukuwunganisa kutuliya ku mitundu yosi yo Yehova Chiuta waku wakumbininiskiyaku.+
4 Chinanga kuti ŵanthu ŵaku angambininiskikiya kuvigoti va kuchanya, Yehova Chiuta waku wazakukuwunganisa kutuliya kweniko ndi kukuweze ku charu chaku.+
5 Yehova Chiuta waku wazakukusereza mucharu cho awusu anguchito kuja chawu, ndipu chazamuja chaku. Iyu wazakukuwovya kuti vinthu vizikuyendiyengi umampha ndi kukuyandanisa ukongwa kuluska awusu.+
6 Yehova Chiuta waku wazamutowesa* mtima waku ndipuso mtima wa mphapu yaku,+ kuti uziyanjengi Yehova Chiuta waku ndi mtima waku wosi kweniso umoyu waku wosi ndi kuja ndi umoyu.+
7 Pavuli paki, Yehova Chiuta waku wazamuŵika matembu ngosi yanga pa arwani ŵaku, wo akutinkhanga ndi kukutombozga.+
8 “Pavuli paki, wazamuwere kwaku Yehova ndi kuvwiya mazu ngaki ndipuso wazamusunga marangu ngaki ngosi ngo nditikulamula msanawale.
9 Yehova Chiuta waku wazakukutumbika ukongwa pa ntchitu zosi za manja ngaku,+ wazamuyandanisa ŵana ŵaku, viŵetu vaku ndi vipasu va muminda yaku, pakuti Yehova wazamukondwa so kukuwovya kuti vinthu vizikuyendiyengi umampha, nge mo wangukondwe ndi apapi ŵaku akali.+
10 Mwaviyo, wazamuvwiya mazu ngaku Yehova Chiuta waku ndi kulondo ulongozgi waki kweniso marangu ngaki ngo ngakulembeka mubuku ili la Dangu, ndipu wazamuwere kwaku Yehova Chiuta waku ndi mtima waku wosi kweniso umoyu waku wosi.+
11 “Sonu dangu ili lo nditikulamula msanawale ndinononu cha kwaku yiwi, kweniso le kumalu ngakuti ungatondeka cha kufikaku.*+
12 Le kuchanya cha, kuti ukambi kuti, ‘Ndiyani yo wakwerengi kuchanya kuti wakatitole, alinga kuti tilivwi ndi kulisunga?’+
13 Ndipu le kusirya linyaki la nyanja cha, kuti ukambi kuti, ‘Ndiyani yo wayambukiyengi kusirya linyaki la nyanja kuti wakatitole, alinga kuti tilivwi ndi kulisunga?’
14 Pakuti mazu ngo, nge pafupi ukongwa ndi yiwi, nge mumulomu mwaku ndipuso mumtima mwaku,+ kuti ungalondongi.+
15 “Awona, msanawale ndiŵika umoyu ndi vinthu vamampha, kweniso nyifwa ndi vinthu viheni pa masu paku.+
16 Asani uvwiyengi marangu ngaku Yehova Chiuta waku ngo nditikulamula msanawale, mwa kwanja Yehova Chiuta waku,+ kwenda mu nthowa zaki ndi kulondo ulongozgi waki, marangu ngaki ndipuso vyeruzgu vaki, mbwenu wazamuja ndi umoyu+ kweniso wazamuyandana, ndipu Yehova Chiuta waku wazakukutumbika mucharu cho uchitongi kuja chaku.+
17 “Kweni asani mtima waku watuwaku kwaku Chiuta+ ndipu waleka kuvwiya ndipuso wanyengeka ndi kwamba kusindamiya achiuta anyaki ndi kuŵateŵete,+
18 nditikukambiyani msanawale kuti mwazamumala kwambula kutondeka.+ Mwazamuja ndi umoyu utali cha mucharu cho muyambuka Yorodani kuti mukachito kuja chinu.
19 Msanawale ndito kuchanya ndi charu chapasi kuja akaboni kuti ndaŵika umoyu ndi nyifwa pa masu paku, thumbiku ndi thembu;+ ndipu sankha umoyu kuti uje ndi umoyu,+ yiwi ndi ŵana ŵaku,+
20 mwa kwanja Yehova Chiuta waku,+ kuvwiya mazu ngaki ndi kumudemetere,+ pakuti iyu ndiyu umoyu waku ndipuso ndiyu wakuwovyengi kuti uje ndi umoyu utali mucharu cho Yehova wakulapizga kuti wachiperekengi kwa apapi ŵaku akali, Abrahamu, Isaki ndi Yakobe.”+
