Dotoronome 9:1-29
9 “Vwani yimwi Ayisirayeli, msanawale muyambukengi Yorodani+ ndi kusere mucharu cho mwamulonda ku mitundu yikulu ndipuso yanthazi kuluska yimwi,+ matawuni ngakulu kweniso nga mipanda yakukho ndipuso yitali mpaka kufika kuchanya,*+
2 ŵanthu anthazi ndipuso atali, ŵana anthulumi aku Anaki,+ wo yimwi mutiŵaziŵa kweniso wo mukuvwa ŵanthu achikamba vaku yiwu kuti, ‘Ndiyani yo wangamaku ku ŵana anthulumi aku Anaki?’
3 Mwaviyo, muziŵi msanawale kuti Yehova Chiuta winu wayambukengi panthazi pinu.+ Iyu ndi motu wakupiriza+ ndipu waŵamalengi. Waŵathereskengi yimwi muchiwona kuti waŵatuzgemu* mwaliŵi ndi kuŵamala, nge mo Yehova wakulayizgiyani.+
4 “Asani Yehova Chiuta winu waŵadikisa pa masu pinu, mungazikambanga cha mumitima yinu kuti, ‘Yehova watisereza mucharu ichi kuti chije chidu chifukwa chakuti te arunji.’+ Kweni Yehova wadikisa mitundu iyi pa masu pinu chifukwa chakuti yichita vinthu viheni.+
5 Muserengi mucharu ichi ndi kuchito kuja chinu chifukwa chakuti mwe arunji pamwenga akunyoloka mtima cha. Kweni Yehova Chiuta winu wadikisa mitundu iyi pa masu pinu chifukwa chakuti yichita vinthu viheni+ ndipuso kuti wafiski mazu ngo Yehova wangulapizga kwa apapi ŵinu akali, Abrahamu,+ Isaki+ ndi Yakobe.+
6 Mwaviyo, ziŵani kuti Yehova Chiuta winu watikupaskani charu chamampha ichi kuti muchito kuja chinu chifukwa chakuti mwe arunji cha, pakuti yimwi ndimwi ŵanthu akumira mtima.*+
7 “Kumbukani, ndipu mungaluwanga cha mo mungukwiyisiya Yehova Chiuta winu muchipululu.+ Mwaja muchigarukiya Yehova+ kwambiya pa zuŵa lo mungutuliya mucharu cha Ijipiti mpaka po mwafikiya pamalu nganu.
8 Chinanga nkhu Horebu, mungukwiyisa Yehova, ndipu Yehova wangukukwiyiyani ukongwa mwakuti wenga pafupi kukumalani.+
9 Ndati ndakwera kuphiri kuti nkhalonde mya,+ mya ya phanganu lo Yehova wanguchita namwi,+ ndinguja paphiri mazuŵa 40 msana ndi usiku,+ kwambula kurya chakurya ndipuso kumwa maji.
10 Pavuli paki, Yehova wangundipaska mya yiŵi yo pangulembeka mazu ndi chikumbu chaku Chiuta, ndipu pamya yo penga mazu ngosi ngo Yehova wangulongoro namwi paphiri kutuliya mumotu pa zuŵa lo munguwungana pamoza.*+
11 Mazuŵa 40 msana ndi usiku ngati ngamala, Yehova wangundipaska mya yiŵi, mya ya phanganu,
12 ndipu Yehova wangundikambiya kuti, ‘Soka, tuwaku kunu mwaliŵi, chifukwa ŵanthu ŵaku wo ukuŵatuzga mucharu cha Ijipiti achita vinthu vo vingachitiska kuti anangiki.+ Atuwapu liŵi pa nthowa yo ndikuŵalamula kuti ayendengepu. Yiwu ajipangiya chikozgu chachisulu.’*+
13 Pavuli paki, Yehova wangundikambiya kuti, ‘Ndaŵawona ŵanthu yaŵa, ndipu awona! mbanthu akumira mtima.’*+
14 Ndileki kuti ndiŵamali ndi kusisita mazina ngawu pacharu chapasi, ndipu ndichitiskengi kuti yiwi uje mtundu wanthazi kweniso wa ŵanthu anandi kuluska yiwu.’+
15 “Pavuli paki, ndingung’anamuka ndipu ndingusika muphiri, phiri lo lichikore motu.+ Ndingupinga mya yiŵi ya phanganu mumanja mwangu.+
16 Pavuli paki, ndingulereska ndipu ndinguwona kuti mwabudiya Yehova Chiuta winu! Mungujipangiya tholi* lachisulu.* Mungutuwapu liŵi pa nthowa yo Yehova wangukulamulani kuti muyendengepu.+
17 Mwaviyo, ndinguto mya yiŵi, ndinguyiponya pasi ndi manja ngangu ndipu ndinguyiswa yimwi muchiwona.+
18 Pavuli paki, ndingujikama ndi kusindama mpaka chisku pasi pa masu paku Yehova kwa mazuŵa 40 msana ndi usiku, nge mo ndinguchitiya pakwamba. Ndinguja kwambula kurya chakurya pamwenga kumwa maji+ chifukwa cha maubudi ngosi ngo munguchita, mwakuchita vinthu viheni pa masu paku Yehova kweniso kumukwiyisa.
19 Pakuti ndinguchita mantha chifukwa chakuti Yehova wangukukwiyiyani ukongwa,+ mwakuti wenga pafupi kukumalani. Kweni Yehova wangundivwa so pa nyengu iyi.+
20 “Yehova wangumukwiyiya ukongwa Aroni, mwakuti wenga pafupi kumubaya,+ kweni pa nyengu iyi ndinguŵeyere so chifukwa chaku Aroni.
21 Pavuli paki, ndinguto tholi,+ chinthu cho mungupanga chenicho chingukubudisani, ndipu ndinguliwotcha pamotu. Ndinguliphwanya ndi kulisira mpaka kusilirika nge fuvu. Ndinguto fuvu lo, ndipu ndingulidira mumsinji wo usika kutuliya muphiri.+
22 “Kweniso mungukwiyisa Yehova ku Tabera,+ ku Masa+ ndipuso ku Kibiroti-hatava.+
23 Yehova wati wakutuzganiku ku Kadeshi-baniya+ ndi kukukambiyani kuti, ‘Lutani kuti mukato charu cho ndikupaskeningi kwambula kutondeka kuti chije chinu!’ mungugarukiya so dangu laku Yehova Chiuta winu,+ ndipu mungulongo cha kuti mwe ndi chivwanu+ mwaku iyu kweniso mungumuvwiya cha.
24 Mwaja muchigarukiya Yehova kutuliya po ndikukuziŵiyani.
25 “Mwaviyo, ndingulutirizga kujikama ndi kusindama mpaka chisku pasi pa masu paku Yehova mazuŵa 40 msana ndi usiku.+ Ndinguchita viyo, chifukwa chakuti Yehova wangukamba kuti wakumaleningi.
26 Ndingwamba kuŵeyere Yehova, ndipu ndingukamba kuti, ‘Yehova, Ambuya Fumu Yikulu, mungaŵananganga cha ŵanthu ŵinu. Ŵanthu yaŵa ntchuma* chinu+ ndipu mukuŵawombo ndi nthazi zinu ndipuso mukuŵatuzga mucharu cha Ijipiti ndi janja lanthazi.+
27 Kumbukani ateŵeti ŵinu, Abrahamu, Isaki ndi Yakobe.+ Mungaŵikanga maŵanaŵanu pa mtafu wa ŵanthu yaŵa cha, pamwenga pa uheni wawu ndipuso pa ubudi wawu.+
28 Chifukwa asani muchitengi viyo, ŵanthu a mucharu cho mukutituzgamu akambengi kuti: “Yehova wakutondeka kuluta nawu mucharu cho wanguŵalayizga, ndipu chifukwa chakuti wanguŵatinkha, wanguŵatuzga kuti waziŵabayiyi muchipululu.”+
29 Pakuti yiwu mbanthu ŵinu ndipuso chuma* chinu.+ Mbanthu ŵinu wo mukuŵatuzga ndi janja linu lanthazi kweniso janja linu lakutambasuka.’+
Mazu Ngam'mphata
^ Kung’anamuwa mipanda yakuthopoka.
^ Pamwenga kuti, “kuti waŵalondi charu chawu.”
^ Mazu ngaki chayingu, “akumira khosi.”
^ Pamwenga kuti, “pa zuŵa lo mpingu unguwungana pamoza.”
^ Pamwenga kuti, “chikozgu chachisulu chakusongono.”
^ Mazu ngaki chayingu, “akumira khosi.”
^ Tholi ndi mwana wa ng’ombi.
^ Pamwenga kuti, “tholi lachisulu chakusongono.”
^ Pamwenga kuti, “ntchihara.”
^ Pamwenga kuti, “chihara.”
