Ekisodo 15:1-27
15 Pa nyengu yo, Mozesi ndi Ayisirayeli angumbiya Yehova sumu yakuti:+
“Ndimumbiyi Yehova, pakuti iyu wakwezeka ukongwa.+
Waponya munyanja hachi ndi wakukwerapu waki.+
2 Ya* ndi nthazi zangu, pakuti iyu wanditaska.+
Uyu ndi Chiuta wangu, ndimuthamikengi;+ ndi Chiuta wa ada,+ ndimukwezengi.+
3 Yehova ntchinkhara pa nkhondu.+ Zina laki ndi Yehova.+
4 Iyu waponya munyanja magaleta ngaku Farawo ndipuso asilikali ŵaki,+Kweniso asilikali ŵaki anthazi ukongwa adodome mu Nyanja Yiyera.+
5 Maji ngamweza wanthazi nganguŵabenekere; angudodome pasi pa nyanja nge mwa.+
6 Yimwi Yehova, janja linu lamaryi, le ndi nthazi ukongwa;+Yimwi Yehova, janja linu lamaryi, livikita murwani.
7 Ndi nthazi zinu zikulu muwisiya pasi wo atikuyukiyani;+Mutumiza ukali winu wakukole, ndipu utiŵanyekesa nge mo mapesi nganyeke.
8 Ndi mvuchi wakutuliya mumphunu mwinu maji nganguwunjikika pamoza;Maji nganguma nge chimati, ndipu ngayendanga cha;Maji ngamweza wanthazi ngangukhoma pakati pa nyanja.*
9 Murwani wangukamba kuti: ‘Ndiŵandondoloskengi! Ndiŵasaniyengi!
Ndigaŵengi vinthu vakuphanga mpaka po ndakhorwe!
Ndisolongi lipanga langu! Janja langu liŵathereskengi!’+
10 Munguphuta ndi mvuchi winu, nyanja yinguŵabenekere;+Angudodome nge ndolu mumaji nganthazi.
11 Ndi chiuta nuyu yo wayanana namwi, Yimwi Yehova?+
Ndiyani yo wayanana namwi, yimwi wakupaturika ukongwa?+
Yimwi wakwenere kuwopeka ndi kukumbiyani sumu zakuthamika, Yimwi wakuchita vinthu vakuziziswa.+
12 Mungutambasuwa janja linu lamaryi, ndipu charu chinguŵameza.+
13 Ndi chanju chambula kumala mungulongozga ŵanthu wo mwawombo;+Ndi nthazi zinu mwazakuŵalongozge kumalu nginu ngakupaturika.
14 Ŵanthu amitundu yosi avwi;+ ndipu achiti mantha;Ŵanthu a ku Filisitiya azamukuvwa urwirwi.*
15 Pa nyengu yo, mafumu* nga ku Edomu ngazamuchita mantha,Ndipu alongozgi a ku Mowabu azamumbwambwanthiya.+
Ŵanthu wosi a ku Kanani azamusongonoka mtima.+
16 Mantha ndi chitenthi vazakuŵawiya.+
Chifukwa cha ukulu wa janja linu, azamuchita chechosi cha nge mwaMpaka po ŵanthu ŵinu ajumphiya, Yimwi Yehova,Mpaka po ŵanthu wo mukupanga+ ajumphiya.+
17 Mwazakuŵato ndi kuŵapanda muphiri la chihara chinu,+Malu nginu ngakujaku ngakujalikiskika ngo mwajinozge, Yimwi Yehova,Malu ngakupaturika ngo manja nginu ngajalikiska, Yimwi Yehova.
18 Yehova wazamulamuliya nge fumu muyaya mpaka muyaya.+
19 Mahachi ngaku Farawo, magaleta ngaki ngankhondu kweniso asilikali akukwera pamahachi ŵati asere munyanja,+Yehova wanguweze nyanja mumalu mwaki ndipu wanguŵabizga,+Kweni Ayisirayeli angwenda pakati pa nyanja pamalu ngakumira.”+
20 Ndipu Miriyamu, mchimi munthukazi, mzichi waku Aroni, wanguto kang’oma, ndipu anthukazi wosi amulondonga achimba ting’oma ndi kuvina.
21 Miriyamu walondeziyananga ndi anthulumi, ndipu wambanga kuti:
“Mbiyani Yehova, pakuti iyu wakwezeka ukongwa.+
Waponya munyanja hachi ndi wakukwerapu waki.”+
22 Pavuli paki, Mozesi wangulongozga Ayisirayeli kutuwa ku Nyanja Yiyera, ndipu anguluta kuchipululu cha Shuru. Yiwu angwenda muchipululu kwa mazuŵa ngatatu, kweni mwengavi maji.
23 Angufika ku Mara,*+ kweni angutondeka kumwa maji nga kwenuku chifukwa ngenga ngakuŵaŵa. Ndichu chifukwa chaki Mozesi wangudana malu ngo kuti Mara.
24 Mwaviyo, Ayisirayeli angwamba kudinginyikiya Mozesi+ ndipu akambanga kuti: “Sonu timwengenji?”
25 Mozesi wanguliriya Yehova+ ndipu Yehova wangumulongo kamiti. Kamiti ko wati wakaponya mumaji, maji ngo ngangwamba kunowa.
Pamalu ngenanga, Chiuta wanguŵaŵikiya dangu kweniso wanguŵakambiya vo vingachitiska kuti ayeruzgiki ndipu wanguŵayesa.+
26 Chiuta wangukamba kuti: “Asani muvwiyengi mazu ngaku Yehova Chiuta winu ndi mtima wosi, ndi kuchita cho ntchamampha mu masu ngaki, ndipuso asani muvwiyengi marangu ngaki ndi kusunga fundu zaki zosi,+ ndikulangeningi cha ndi matenda ngo ndingulanga nangu Ayijipiti,+ pakuti ini Yehova, nditikuchizgani.”+
27 Pavuli paki, angufika ku Elimu, ko kwenga akasupi 12 a maji ndipuso vimiti 70 va kantchindi. Mwaviyo angujintha mahema ngawu pafupi ndi maji.
Mazu Ngam'mphata
^ “Ya” ndi mazu ngakudumuwa nga zina lakuti Yehova.
^ Mazu ngaki chayingu, “mumtima wa nyanja.”
^ Mazu ngaki chayingu, “urwirwi wa pakubala.”
^ Mazu ngaki chayingu, “Masheki.” Sheki lenga zina la mulongozgi wa fuku.
^ Kung’anamuwa kuti, “Kuŵaŵa.”
