Ezekiyeli 15:1-8
-
Yerusalemu, chimiti cha mphereska chambula ntchitu (1-8)
15 Yehova wangulongoro so nani, ndipu wangukamba kuti:
2 “Yiwi mwana wa munthu, kumbi chimiti cha mphereska chipambana wuli ndi vimiti vinyaki vosi pamwenga mphanda ya vimiti vamulisuwa?
3 Kumbi kuchimiti cha mphereska kungatoreka chimiti cho chingagwira ntchitu yeyosi? Pamwenga kumbi ŵanthu angapanga chakupayikapu viyaŵi kutuliya kuchimiti cha mphereska?
4 Awona! Chiponyeka pamotu kuti chije nkhuni, ndipu motu wo upiriza chisina ndi kusongu kweniso utotcha chapakati. Kumbi chimiti cho chingagwira ntchitu yeyosi?
5 Chinanga mphanyengu yo chenga champhumphu, chenga chakuti chingagwira ntchitu yeyosi cha. Sonu pakuti chimiti cho chafya kweniso chanyeka ndi motu, ndikuti chingagwira ntchitu cha chinanga nkhamanavi!”
6 “Mwaviyo, Yehova, Ambuya Fumu Yikulu wakamba kuti: ‘Nge chimiti cha mphereska cho che pakati pa vimiti vamulisuwa, cho ndapereka kuti chije nkhuni, ndimu so ndichitiyengi ndi ŵanthu wo aja mu Yerusalemu.+
7 Chisku changu chisuskana nawu. Yiwu athaŵa motu kweni motu wo uŵapirizengi. Ndipu mwazamuziŵa kuti ini ndini Yehova asani chisku changu chazisuskana nawu.’”+
8 “‘Charu cho ndazakuchisambusa mahami+ chifukwa chakuti yiwu achita vinthu mwambula kugomezgeka,’+ Yehova, Ambuya Fumu Yikulu ndiyu wakamba.”
