Ezekiyeli 18:1-32
18 Yehova wangulongoro so nani, ndipu wangukamba kuti:
2 “Kumbi nthanthi yo mutanja kukamba mucharu cha Isirayeli yakuti, ‘Ada arya mphereska zakunthyanthyama, kweni ŵana ndiwu ayeyera minyu,’ ying’anamuwanji?+
3 “‘Nge mo ini ndiliri wamoyu,’ Yehova, Ambuya Fumu Yikulu ndiyu wakamba, ‘mulutirizgengi cha kukamba nthanthi yeniyi mu Isirayeli.
4 Awonani! Maumoyu ngosi ngangu. Umoyu wa wisi kweniso umoyu wa mwana, ngosi ngangu. Umoyu wo ubuda ndiwu ufwengi.
5 “‘Asani munthu ndi murunji ndipu wachita chinthu chakwenere kweniso chaurunji,
6 waturya cha vinthu vakuperekeka sembi kwa angoza pamapiri;+ walereska cha kwa angoza akuseruska* a nyumba yaku Isirayeli; wakazuzga cha muwolu wa munyaki+ pamwenga kugonana ndi munthukazi yo we ku mwezi;+
7 wachitiya nkhaza munthu weyosi cha,+ kweni waweza chikoli cho munthu yo wangumubwereka vinthu wangumupaska;+ wabiya munthu weyosi cha,+ kweni wapereka chakurya chaki ku munthu yo we ndi nja+ ndipuso wavwalika munthu wankhuli;+
8 walipirisa ndalama zapachanya cha pamwenga kuchita katapira,+ kweni wakana kuchita vinthu mwambula urunji;+ wayeruzga mwaurunji mulandu wa pakati pa munthu ndi munyaki;+
9 ndipu watenda mu marangu ngangu ndipuso wasunga vyeruzgu vangu kuti wachiti vinthu mwakugomezgeka, munthu waviyo ndi murunji ndipu walutirizgengi kuja ndi umoyu,’+ Yehova, Ambuya Fumu Yikulu ndiyu wakamba.
10 “‘Kweni asani munthu wabala mwana ndipu pavuli paki mwana yo, wasambuka munkhungu+ pamwenga wakubaya ŵanthu*+ pamwenga wachitaku chinthu chechosi cha vinthu ivi,
11 (chinanga kuti awisi achitaku cha chinthu chinyaki chechosi cha vinthu ivi), waturya vinthu vakuperekeka sembi kwa angoza pamapiri, wakazuzga muwolu wa munyaki,
12 wachitiya nkhaza ŵanthu wo akhumbika chovyu kweniso akavu,+ wato vinthu mwakuchita kuba, waweza cha chikoli, walereska kwa angoza akuseruska,+ wachita vinthu vaukazuzi,+
13 wachita katapira kweniso walipirisa ndalama zapachanya,+ mbwenu mwana yo wazamuja ndi umoyu cha. Chifukwa cha vinthu vosi vaukazuzi vo wachita, iyu wazamubayika. Ndopa zaki zazamuja pa mutu waki.
14 “‘Kweni asani munthu we ndi mwana ndipu mwana yo, wawona maubudi ngosi ngo awisi achita, kweni wachita cha vinthu venivi chinanga kuti wawona maubudi ngo,
15 waturya cha vinthu vakuperekeka sembi kwa angoza pamapiri; walereska cha kwa angoza akuseruska a nyumba yaku Isirayeli; wakazuzga cha muwolu wa munyaki;
16 wachitiya nkhaza munthu weyosi cha; wakaniriya cha chikoli; wato cha vinthu mwakuchita kuba, wapereka chakurya chaki ku munthu yo we ndi nja ndipuso wavwalika munthu wankhuli;
17 wakandirizga mukavu cha; wachita katapira cha pamwenga kulipirisa ndalama zapachanya; ndipu wasunga vyeruzgu vangu kweniso watenda mu marangu ngangu. Munthu waviyo wafwengi cha chifukwa cha ubudi wa awisi. Iyu walutirizgengi kuja ndi umoyu.
18 Kweni chifukwa chakuti awisi anguchita chinyengu, angubiya mubali wawu, ndipuso anguchita vinthu viheni pakati pa ŵanthu ŵawu, azamukufwa chifukwa cha ubudi wawu.
19 “‘Kweni yimwi mwazamukamba kuti: “Kumbi vaŵa wuli kuti mwana waleki kuja ndi mulandu chifukwa cha ubudi wa awisi?” Pakuti mwana wachita chinthu chakwenere kweniso chaurunji, wasunga marangu ngangu ngosi ndi kungachita, walutirizgengi kuja ndi umoyu.+
20 Umoyu wo ubuda ndiwu wazamukufwa.*+ Mwana wazamuja ndi mulandu cha chifukwa cha ubudi wa awisi ndipu ada azamuja ndi mulandu cha chifukwa cha ubudi wa mwana wawu. Murunji wazamuyeruzgika mwakukoliyana ndi urunji waki ndipu muheni wazamuyeruzgika mwakukoliyana ndi uheni waki.+
21 “‘Asani munthu muheni waleka maubudi ngosi ngo wachitanga ndipu wasunga marangu ngangu kweniso wachita chinthu cho ntchakwenere ndipuso chaurunji, wazamuja ndi umoyu. Iyu wazamukufwa cha.+
22 Wazamumbika mulandu cha chifukwa cha mphulupulu zo wachita.+ Iyu wazamulutirizga kuja ndi umoyu chifukwa cha kuchita urunji.’+
23 “‘Kumbi ndikondwa ndi nyifwa ya munthu muheni?’+ Yehova, Ambuya Fumu Yikulu ndiyu wakamba. ‘Asi ndikhumba kuti waleki nthowa zaki ziheni ndi kuja ndi umoyu?’+
24 “‘Kweni asani munthu murunji waleka urunji waki ndipu wachita vinthu viheni,* wachita vinthu vosi vaukazuzi vo ŵanthu aheni achita, kumbi wazamuja ndi umoyu? Ntchitu zosi zaurunji zo wanguchita zazamukumbukika cha.+ Wazamukufwa chifukwa cha kuleka kugomezgeka kwaki kweniso chifukwa cha ubudi wo wanguchita.+
25 “‘Kweni yimwi mwazamukamba kuti: “Nthowa yaku Yehova njambula urunji.”+ Yimwi a munyumba yaku Isirayeli, chondi vwisiyani! Kumbi nthowa yangu ndiyu yambula urunji?+ Asi nthowa zinu ndizu zambula urunji?+
26 “‘Asani munthu murunji waleka urunji waki, wachita vinthu viheni ndipu wafwa chifukwa cha uheni wo, iyu wafwa chifukwa cha uheni wo wachitanga.
27 “‘Asani munthu muheni waleka uheni waki wo wachitanga, ndipu wayamba kuchita chinthu chakwenere kweniso chaurunji, iyu wazamuja ndi umoyu.+
28 Asani waziŵa mphulupulu zosi zo wachitanga ndipu wazileka, wazamuja ndi umoyu. Iyu wazamukufwa cha.
29 “‘Kweni a munyumba yaku Isirayeli azamukamba kuti: “Nthowa yaku Yehova njambula urunji.” Kumbi nthowa zangu ndizu zambula urunji nadi, yimwi a munyumba yaku Isirayeli?+ Asi nthowa zinu ndizu zambula urunji?’
30 “‘Mwaviyo, ndazamuyeruzga weyosi mwakukoliyana ndi nthowa zaki,+ yimwi a munyumba yaku Isirayeli,’ Yehova Ambuya Fumu Yikulu ndiyu wakamba. ‘Tuwaniku, tuliyaniku limu ku mphulupulu zinu zosi, kuti zileki kuja chinthu chakuguŵiska cho chingachitiska kuti muje ndi mulandu.
31 Tayani mphulupulu zosi zo mwachita,+ ndipu jani ndi* mtima wufya kweniso maŵanaŵanu ngafya,+ mufwiyenji+ yimwi a munyumba yaku Isirayeli?’
32 “‘Ndikondwa cha ndi nyifwa ya munthu weyosi chinanga nkhamanavi,’+ Yehova, Ambuya Fumu Yikulu ndiyu wakamba. ‘Mwaviyo, weleriyani ndipu jani ndi umoyu.’”+
Mazu Ngam'mphata
^ Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.
^ Mazu ngaki chayingu, “wakudira ndopa za ŵanthu.”
^ Pamwenga kuti, “Munthu yo wabuda ndiyu wazamukufwa.”
^ Pamwenga kuti, “vinthu vambula urunji.”
^ Mazu ngaki chayingu, “ndipu jipangiyeni.”
