Ezekiyeli 19:1-14
-
Sumu yakumba pakuliya yakukwaskana ndi alongozgi a ku Isirayeli (1-14)
19 “Umbi sumu yakumba pakuliya yakukwaskana ndi alongozgi a ku Isirayeli
2 ndipu ukambi kuti,‘Kumbi anyinamwi ŵenga nge vinthu wuli? Ŵenga nge nkharamu zinthukazi pakati pa nkharamu.
Yiwu agonanga pakati pa nkharamu zimanazimana zanthazi ndipu aleranga ŵana ŵawu.
3 Yiwu angulera yumoza mwa ŵana ŵawu, ndipu mwana yo wanguja nkharamu yimana yanthazi.+
Wangusambira kupaluwa nyama,Ndipuso waryanga ŵanthu.
4 Mitundu ya ŵanthu yinguvwa vaku iyu ndipu yingumuko mumbuna yawu,Yingumuko ndi mbeja ndipu yinguluta nayu kucharu cha Ijipiti.+
5 Nyina wangulindizga kweni pati pajumpha nyengu wanguwona kuti mwana yo wawengeku so cha.
Mwaviyo, wanguto mwana waki munyaki ndipu wangumutumiza nge nkharamu yimana yanthazi.
6 Iyu nayu wayendangayendanga pakati pa nkharamu ndipu wanguja nkharamu yimana yanthazi.
Wangusambira kupaluwa nyama, ndipuso waryanga ŵanthu.+
7 Iyu wangukhaza pakati pa tinyumba tawu takuthopoka takukho ndipu wangubwanganduwa matawuni ngawu,Mwakuti charu cho chingubwangandulika chinguzaza ndi kukoroma kwaki.+
8 Mitundu ya ŵanthu ya muvigaŵa vapafupi yingumuyukiya ndipu yingumuponye chilepa chawu,Iyu wangukoleka mumbuna yawu.
9 Angumuko ndi mbeja ndi kumuŵika muchibokosi* ndipu anguluta nayu kwa fumu ya ku Babiloni.
Kweniko, angumujaliya kuti mazu ngaki ngangavwikanga so cha pamapiri nga ku Isirayeli.
10 Nyoku wenga nge chimiti cha mphereska+ mu ndopa zaku,* chakupandika mumphepeti mwa maji.
Chingupasa vipasu ndipuso chenga ndi mphanda zinandi chifukwa cha maji nganandi.
11 Chingupanga mphanda* zakukho, zakwenere kupangiya nthonga za akulamuliya.
Chingukuwa ndipuso chinguthopoka kuphara vimiti vinyaki,Ndipu chawonekiyanga patali chifukwa cha utali waki kweniso chifukwa cha mani ngaki nganandi.
12 Kweni chifukwa cha ukali, nyoku wanguchesulika+ ndi kuponyeka pacharu chapasi,Ndipu mphepu yakutuliya kuvuma yinguchitiska kuti vipasu vaki vimiri.+
Mphanda zaki zakukho zinguphajulika, zingumira ndipuso zingupiriya ndi motu.+
13 Sonu wapandika muchipululu,Mucharu chambula maji, mucharu chakumira.+
14 Motu wo, ungusapaliya kutuliya ku mphanda* zaki ndipu ungupiriza mphukira zaki kweniso vipasu vaki,Ndipu pengavi mphanda yakukho yo yingujaku, pengavi nthonga ya akulamuliya.+
“‘Iyi ndi sumu yakumba pakuliya, ndipu yazamuja sumu yakumba pakuliya.’”
Mazu Ngam'mphata
^ Chibokosi cho chikambika yapa, ntchinthu cho apingamu nyama yamoyu asani atiyisamisiya kumalu nganyaki.
^ Yapa pangafwatulikiya so kuti, “nge chimiti cha mphereska mumunda waku wa mphereska.”
^ Pamwenga kuti, “nthonga.”
^ Pamwenga kuti, “nthonga.”
