Ezekiyeli 27:1-36
-
Sitima ya ku Turo atiyimbiya sumu yakumba pakuliya (1-36)
27 Yehova wangulongoro so nani, ndipu wangukamba kuti:
2 “Yiwi mwana wa munthu, mbiya Turo sumu yakumba pakuliya,+
3 ndipu kambiya Turo kuti,‘Yiwi yo waja pamageti nga nyanja,Wamalonda wa ŵanthu a muvirwa* vinandi,Yehova, Ambuya Fumu Yikulu wakamba kuti:
“Yiwi Turo wakamba kuti, ‘Nde wakutowa ukongwa.’+
4 Vigaŵa vaku ve mukati mwa nyanja,Ndipu ŵanthu wo akukupanga akukutowesa ukongwa.
5 Mathabwa ngosi ngo angukupangiya ngenga nga vimiti va junipa va ku Seniri,+Ndipu anguto chimiti cha sidara* ku Lebanoni ndi kupangiya mlongoti waku.
6 Nkhafu zaku zingupangika kutuliya ku vimiti va oku va ku Bashani,Ndipu kunthazi kwaku kungupangika ndi vimiti va milanji vakutoweseka ndi minyanga ya njovu ya ku Kitimu.+
7 Thanga laku lenga la salu zakutowa za ku Ijipiti,Ndipu salu zakubenekere pachanya zenga zakupangika ndi wuzu wabuluu kweniso weya wa mbereri wapepo wakutuliya ku virwa va Elisha.+
8 Ŵanthu a ku Sidoni ndi a ku Arivadi+ ndiwu akuvuŵanga.
Ŵanthu ŵaku alusu, yiwi Turo, ndiwu akuyendesanga.+
9 Ŵanthu akuziŵa ntchitu* kweniso alusu a ku Gebali+ ndiwu amatanga mo mathabwa ngaku ngakulumikizana.+
Sitima zosi za kunyanja ndi akwendesa ŵaki azanga kwaku yiwi kuzichita nawi malonda.
10 Pa gulu la asilikali ŵaku penga ŵanthu a ku Peresi, ku Ludimu kweniso ku Puti,+ ŵanthu ŵaku ankhondu.
Yiwu apayikanga vishangu vawu kweniso visoti vawu mwaku yiwi, ndipu anguchitiska kuti uje ndi unkhankhu.
11 Ŵanthu a ku Arivadi wo ŵenga pa gulu la asilikali ŵaku amanga pachanya pa mipanda kuzunguliya tawuni yaku,Ndipu anthulumi achiganga ŵenga alonda mutinyumba taku takuthopoka.
Yiwu apayikanga vishangu vakuzunguliya mumipanda kuzunguliya tawuni yakuNdipu angukutowesa ukongwa.
12 “‘“Tashishi+ wachitanga nawi malonda chifukwa cha chuma chaku chinandi.+ Yiwu akupaskanga siliva, visulu, tini kweniso ndolu ndipu yiwi waŵapaskanga katundu waku.+
13 Yavani, Tubala,+ ndi Mesheki+ achitanga nawi malonda, yiwu akupaskanga akapolu+ kweniso vinthu vamkuŵa ndipu yiwi waŵapaskanga malonda ngaku.
14 Nyumba ya ku Togarama+ yakupaskanga mahachi kweniso nyulu* ndipu yiwi wayipaskanga katundu waku.
15 Ŵanthu a ku Dedani+ achitanga nawi malonda; ungulemba ntchitu amalonda muvirwa vinandi; yiwu akupaskanga minyanga ya njovu+ ndipuso vimiti va eboni* nge msonkhu.
16 Edomu wachitanga nawi malonda chifukwa chakuti yiwi wenga ndi vinthu vinandi. Yiwu akupaskanga mya ya takoyizi, weya wa mbereri wapepo, salu zakutowa zakudyoŵa, salu zamampha, mya ya korali kweniso mya ya rube ndipu yiwi waŵapaskanga katundu waku.
17 “‘“Yuda ndi charu cha Isirayeli achitanga nawi malonda, akupaskanga tirigu wa ku Miniti,+ chakurya chamampha, uchi,+ mafuta ndi basamu+ ndipu yiwi waŵapaskanga katundu waku.+
18 “‘“Damasiko+ wachitanga nawi malonda chifukwa chakuti yiwi wenga ndi katundu munandi kweniso chifukwa cha chuma chaku chosi, yiwu achitanga malonda nga vinyu wa ku Heliboni kweniso wuzu wa ku Zahara.*
19 Vedani ndi Yavani akutuliya ku Uzali akupaskanga vinthu vachisulu, vimiti va kasiya* ndipuso mujuŵa* ndipu yiwi waŵapaskanga katundu waku.
20 Dedani+ wachitanga nawi malonda nga salu zakupangiya vakujapu va paviŵetu.
21 Ungulemba ntchitu ŵanthu a ku Arabu kweniso alongozgi wosi a ku Kedara,+ wo achitanga malonda nga ŵana a mbereri, mbereri zinthulumi ndipuso mbuzi.+
22 Amalonda a ku Sheba kweniso Rama+ achitanga nawi malonda; yiwu akupaskanga mafuta ngakununkhira ngamampha ukongwa nga mitundu yakupambanapambana kweniso mya yakuzirwa ndipu yiwi waŵapaskanga katundu waku.+
23 Harani,+ Kane, Edeni,+ amalonda a ku Sheba,+ Asisha+ ndipuso Kilimadi achitanga nawi malonda.
24 Mumsika waku, yiwu achitanga malonda nga vakuvwala vakutowa, mikhanju yakupangika ndi wuzu wabuluu, salu zakutowa zakudyoŵa kweniso makapeti nga mitundu yakupambanapambana, vosi avimanganga umamphaumampha ndi vingwi.
25 Sitima za ku Tashishi+ ndizu zanyamuwanga malonda ngaku,Mwakuti unguzazika ndi vinthu vinandi ndipu ungutitimiya* mukati mwa nyanja.
26 Ŵanthu wo akuvuŵanga anguluta nawi mukati mwa nyanja zakofya;Mphepu ya kuvuma yakuswa pakati pa nyanja.
27 Chuma chaku, katundu waku, malonda ngaku, ŵanthu wo agwira ntchitu mwaku yiwi ndipuso wo atikuyendesa,Wo amata mo mathabwa ngaku ngakulumikizana, wo achita nawi malonda+ kweniso ŵanthu wosi ankhondu,+Gulu losi lo le* mwaku yiwi,Wosi azamubira pakati pa nyanja pa zuŵa lo wazamubwangandulikiya.+
28 Pa nyengu yo ŵanthu wo atikuyendesa azamuliya, vigaŵa va mumphepeti mwa nyanja vazamusukunyika.
29 Akuvuŵa wosi, akwendesa sitima ndipuso akugwira ntchitu musitima,Azamutuwa musitima zawu ndi kuma pamtunda.
30 Yiwu azamubongo ndi kuliya ukongwa chifukwa chaku yiwi+Ndipu azakujidiriya fuvu pamitu yawu ndi kukunkhuluka muvyotu.
31 Azakujimeta phala ndi kuvwala vigudulu;Azamuliya mwakupwetekeka mtima ndi kutenje ukongwa chifukwa chaku yiwi.
32 Achiliya azamukumba sumu zakumba pakuliya chifukwa chaku yiwi kuti:
‘Ndiyani yo wayanana ndi Turo, yo sonu we cheti munyanja?+
33 Asani katundu waku waza kutuwa munyanja, wakhorwesanga ŵanthu anandi.+
Chuma chaku chinandi kweniso malonda ngaku vakhupusanga mafumu nga pacharu chapasi.+
34 Sonu wasweke munyanja, mundimba ya maji,+Ndipu malonda ngaku ngosi kweniso ŵanthu ŵaku abiriya nawi limoza.+
35 Ŵanthu wosi wo aja muvirwa azakukulereseska mwakuzizwa,+Ndipu mafumu ngawu ngazamumbwambwanthiya chifukwa cha mantha,+ visku vawu vazamulongo kuti ŵe ndi mantha.
36 Amalonda wo ŵe pakati pa mitundu ya ŵanthu azamukumba khwelu chifukwa cha vo vakuchitikiya.
Umalengi mwamabuchibuchi kweniso umalengi umampha cha,Ndipu uŵengeku so cha mpaka muyaya.’”’”+
Mazu Ngam'mphata
^ Anyaki akamba kuti, “muvilumba.”
^ Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
^ Mazu ngaki chayingu, “Ŵaraŵara.”
^ Zina ili mu Chiheberi, ling’anamuwa mwana yo wabalika asani bulu munthulumi wakwera hachi yinthukazi.
^ Vimiti vifipa mukati.
^ Pamwenga kuti, “kweniso wuzu uyera wachotuchotu.”
^ Chimiti cha mugulu la vimiti va sinamoni.
^ Deti lakununkhira.
^ Yapa pangafwatulikiya so kuti, “ndipu wenga ndi unkhankhu.”
^ Mazu ngaki chayingu, “Mpingu wosi wo we.”
