Ezekiyeli 40:1-49
40 Mu chaka cha 25 kutuliya po tingutoleke ku ukapolu,+ kukwamba kwa chaka cho, pa zuŵa la 10 la mwezi wo, mu chaka cha 14 kutuliya po tawuni ya Yerusalemu yingubwangandulikiya,+ pa zuŵa lenili, janja laku Yehova lenga paku ini, ndipu wangunditole mutawuni.+
2 Mu viwona vakutuliya kwaku Chiuta, iyu wangunditole mucharu cha Isirayeli ndipu wangundiŵika pachanya pa phiri litali ukongwa.+ Paphiri lo penga chinthu cha nge tawuni ndipu chenga kumwera.
3 Wati wanditole kweniko, ndinguwona munthu yo wawonekanga nge mkuŵa.+ Iyu wenga ndi chingwi cha fulakisi* kweniso deti* lakupimiya mujanja laki,+ ndipu wanguma pageti.
4 Munthu yo wangundikambiya kuti: “Yiwi mwana wa munthu, lereseska, vwisiya mwakuphwere ndipuso ŵika mtima waku pa vinthu vosi vo ndikulongongi, pakuti ndichu chifukwa chaki watoleke kunu. Kambiya nyumba yaku Isirayeli vinthu vosi vo uwonengi.”+
5 Ndinguwona mpanda wo unguzunguliya kubwalu kwa nyumba yakusopiyamu.* Mujanja la munthu yo, mwenga deti lakupimiya lo utali waki wenga mamita pafufupi ngatatu (ku masentimita pafufupi 52 ngengosi angusazgiyaku masentimita pafufupi 7).* Iyu wangwamba kupima mpanda wo. Ukhomi waki wenga deti limoza ndipu wenga so deti limoza kutuwa pasi mpaka pachanya.
6 Pavuli paki, munthu yo wanguza pa kanyumba kapageti ko kalereskanga kuvuma+ ndipu wangukwera masitepusi ngaki. Wati wapima malu ngapafupi ndi khomu la kanyumba ko, usani waki wenga deti limoza ndipu usani wa malu ngapafupi ndi khomu la kuchigaŵa chinyaki cha kanyumba ko, wenga so deti limoza.
7 Chipinda cha alonda chechosi mu utali kweniso mu usani chenga deti limoza, ndipu kutuwa pa chipinda cha alonda chimoza kufika pa chipinda cha alonda chinyaki, penga mamita pafufupi ngaŵi ndi hafu.*+ Malu ngapafupi ndi khomu la kanyumba kapageti, lo lenga pafupi ndi khondi lo lalereskanga mukati, ngenga deti limoza mu usani.
8 Ndipu wangupima khondi la kanyumba kapageti lo lalereskanga mukati, ndipu lenga deti limoza.
9 Pavuli paki, wangupima khondi la kanyumba kapageti ndipu lenga mamita pafufupi nganayi;* wangupima so vipilala vaki vamumphepeti, vo venga pafufupi mita yimoza;* ndipu khondi la kanyumba kapageti lenga kuchigaŵa cho chalereskanga mukati.
10 Kuchigaŵa chechosi cha kanyumba kapageti ka kuvuma kwenga vipinda vitatu va alonda. Vipinda vosi vitatu venga vakuyanana ukulu waki, ndipu vipilala vamumphepeti, venga vakuyanana kumaryi ndi kumazge.
11 Pavuli paki, wangupima malu ngapafupi ndi khomu la kanyumba kapageti, ndipu utali waki wenga mamita pafufupi ngankhondi;* usani wa geti wenga mamita pafufupi 6 ndi hafu.*
12 Kampanda kafupi kunthazi kwa vipinda va alonda kuvigaŵa vosi viŵi, kenga masentimita pafufupi 52.* Vipinda va alonda kuvigaŵa vosi viŵi, venga mamita pafufupi ngatatu.*
13 Pavuli paki, wangupima usani wa kanyumba kapageti kutuwa pachanya pa kachipinda ka alonda kufika pachanya pa kachipinda ka alonda ka kusirya linyaki la kanyumba ko, ndipu usani waki wenga mamita pafufupi 13; khomu la kachipinda ka alonda lalereskananga ndi khomu la kachipinda ka alonda kasirya linyaki.+
14 Pavuli paki, wangupima vipilala vamumphepeti vo venga vitali mamita pafufupi 31. Wangupima so vipilala vamumphepeti va tinyumba tinyaki tosi tapageti kuzunguliya balaza.
15 Kutuliya kunthazi kwa geti mpaka kuchifika kunthazi kwa khondi kuchigaŵa chamukati cha kanyumba kapageti, penga mamita pafufupi 26.
16 Vipinda va alonda venga ndi mawindu ngo ngenga ngasani mukati ngafinyi kubwalu,+ ndipu vipilala vamumphepeti va kanyumba ko navu venga ndi mawindu ngaviyo kuvigaŵa vosi viŵi. Mukati mwa makhondi mwenga so mawindu kuvigaŵa vosi viŵi ndipu pavipilala vamumphepeti pangujobeka vimiti va kantchindi.+
17 Pavuli paki, wangunditole mubalaza lakubwalu, ndipu ndinguwona vipinda vakuryiyamu+ ndipuso kamsewu kuzunguliya balaza lo. Mukamsewu ko, mwenga vipinda vakuryiyamu vakukwana 30.
18 Usani wa kamsewu mumphepeti mwa kanyumba kapageti wayanananga ndi utali wa kanyumba kapageti. Kamsewu yaka kenga mumphata.
19 Pavuli paki, wangupima mtunda* wakutuliya kunthazi kwa kanyumba kapageti kamumphata mpaka kufika pa balaza lamukati. Ndipu mtunda waki wenga mamita pafufupi 52 kuvuma kweniso kunkhondi.*
20 Balaza lakubwalu lenga ndi kanyumba kapageti ko kalereskanga kunkhondi,* ndipu wangupima utali ndi usani waki.
21 Mukanyumba ko, mwenga vipinda vitatu va alonda kuchigaŵa chechosi. Vipilala vaki vamumphepeti kweniso khondi, venga vakuyanana ndi kanyumba kapageti kakwamba. Kanyumba ko kenga mamita pafufupi 26 mu utali ndipu mu usani kenga mamita pafufupi 13.
22 Mawindu ngaki, khondi laki kweniso vimiti vaki va kantchindi vakujoba,+ venga vakuyanana ndi va mukanyumba kapageti ka kuvuma. Ŵanthu akweranga masitepusi 7 kuti afiki pakanyumba ko, ndipu khondi laki lenga kunthazi kwa masitepusi.
23 Mubalaza lamukati mwenga so kanyumba kapageti kanyaki ko kalereskananga ndi kanyumba ka kunkhondi* kweniso kanyumba kanyaki kalereskananga ndi kanyumba ka kuvuma. Iyu wangupima mtunda kutuliya pa kanyumba kapageti kanyaki kufika pa kanyumba kanyaki, ndipu wenga mamita pafufupi 52.
24 Pavuli paki, wangunditole chakumwera, ndipu ndinguwona kanyumba kapageti kuchigaŵa cha kumwera.+ Iyu wangupima vipilala vaki vamumphepeti kweniso khondi laki ndipu venga vakuyanana ndi tinyumba tinyaki tosi tapageti.
25 Kuchigaŵa chechosi cha kanyumba ko, kwenga mawindu nga nge nga tinyumba tinyaki tosi ndipu khondi laki nalu lenga ndi mawindu. Kanyumba ko, kenga mamita pafufupi 26 mu utali ndipu mu usani kenga mamita pafufupi 13.
26 Penga masitepusi 7 kufika pakanyumba ko+ ndipu khondi laki lenga kunthazi kwa masitepusi. Khondi lo, lenga ndi vipilala viŵi, chimoza kumazge, chinyaki kumaryi ndipu pavipilala vo pangujobeka vimiti va kantchindi.
27 Mubalaza lamukati mwenga so kanyumba kanyaki kapageti ko kalereskanga kumwera; wangupima mtunda kutuliya pakanyumba kanyaki kufika pakanyumba kanyaki kulazgiya kumwera ndipu mtunda waki wenga mamita pafufupi 52.
28 Pavuli paki, wangunditole mubalaza lamukati kuziya pakanyumba kamukati ka kumwera; wati wapima kanyumba kapageti ka kumwera, kenga kakuyanana ndi tinyaki tosi.
29 Vipinda va alonda va mukanyumba ko, vipilala vaki vamumphepeti kweniso khondi laki venga vakuyanana ndi va tinyumba tinyaki tosi tapageti. Kenga ndi mawindu kuvigaŵa vosi viŵi ndipu khondi laki nalu lenga ndi mawindu. Kanyumba ko kenga mamita pafufupi 26 mu utali ndipu mu usani kenga mamita pafufupi 13.+
30 Kanyumba kekosi kapageti kenga ndi khondi; ndipu khondi lelosi lenga mamita pafufupi 13 mu utali ndipu mu usani lenga mamita pafufupi ngaŵi.
31 Khondi laki lalereskanga kubalaza lakubwalu, pavipilala vaki vamumphepeti pangujobeka vimiti va kantchindi,+ ndipu penga masitepusi 8 kufika pakhondi lo.+
32 Wati wanditole mubalaza lamukati kutuwa kuvuma, wangupima kanyumba kapageti, ndipu kenga kakuyanana ndi tinyumba tinyaki tosi.
33 Vipinda va alonda va mukanyumba ko, vipilala vaki vamumphepeti kweniso khondi laki, venga vakuyanana ndi va tinyumba tinyaki tosi tapageti, ndipu kenga ndi mawindu vigaŵa vosi viŵi ndipu khondi nalu lenga ndi mawindu. Kanyumba ko kenga mamita pafufupi 26 mu utali ndipu mu usani kenga mamita pafufupi 13.
34 Khondi laki lalereskanga kubalaza lakubwalu, pavipilala vaki vamumphepeti vosi viŵi pangujobeka vimiti va kantchindi, ndipu penga masitepusi 8 kufika pakhondi lo.
35 Pavuli paki, wangunditole mukanyumba kapageti ka kunkhondi,*+ ndipu wangukapima; kanyumba ko kenga kakuyanana ndi tinyumba tinyaki tosi.
36 Vipinda va alonda va mukanyumba ko, vipilala vaki vamumphepeti kweniso khondi laki, venga vakuyanana ndi va tinyumba tinyaki tosi tapageti. Kenga ndi mawindu kuvigaŵa vosi viŵi. Kanyumba ko kenga mamita pafufupi 26 mu utali ndipu mu usani kenga mamita pafufupi 13.
37 Vipilala vaki vamumphepeti valereskanga ku balaza lakubwalu, ndipu pavipilala vaki vosi viŵi pangujobeka vimiti va kantchindi, ndipu penga masitepusi 8 kufika pakanyumba ko.
38 Pafupi ndi vipilala va tinyumba tapageti penga chipinda chakuryiyamu cho chenga ndi khomu laki, penapa ndipu asukiyanga nyama ya sembi zakupiriza zamphumphu.+
39 Kuchigaŵa chechosi cha khondi la kanyumba kapageti kwenga mathebulu ngaŵi ngo abayiyangapu nyama ya sembi zakupiriza zamphumphu,+ sembi za ubudi+ ndipuso sembi za mulandu.+
40 Pabwalu pa kanyumba kapageti ka kunkhondi,* pafupi ndi khomu penga mathebulu ngaŵi. Kuchigaŵa chinyaki cha khondi la kanyumba ko, kwenga so mathebulu ngaŵi.
41 Kuchigaŵa chechosi cha kanyumba ka kunkhondi* kwenga mathebulu nganayi, ngosi pamoza ngengapu 8. Pamathebulu ngenanga abayiyangapu nyama ya sembi.
42 Mathebulu ngosi nganayi nga sembi zakupiriza zamphumphu ngangupangika ndi mya yakusema. Mu utali kweniso mu usani ngenga masentimita pafufupi 78, ndipu kutuwa pasi kufika pachanya ngenga masentimita pafufupi 52. Pamathebulu ngo asungangapu so vidya vakubayiya nyama ya sembi zakupiriza kweniso sembi zinyaki.
43 Muvimati vamukati kuzunguliya, munguŵikika mashelufu ngo ngenga masentimita pafufupi 7 mu usani; ndipu nyama ya sembi yo yaperekekanga nge mphasu ayiŵikanga pamathebulu.
44 Kubwalu kwa kanyumba kapageti kamukati kwenga vipinda vakuryiyamu va ŵanthu akumba;+ vipinda vo venga mubalaza lamukati pafupi ndi kanyumba kapageti ka kunkhondi* ndipu makhomu ngaki ngalereskanga kumwera. Chipinda chinyaki chakuryiyamu chenga pafupi ndi kanyumba kapageti ka kuvuma, ndipu khomu laki lalereskanga kunkhondi.*
45 Iyu wangundikambiya kuti: “Chipinda chakuryiyamu ichi cho khomu laki lilereska kumwera, ntcha asembi wo ateŵete munyumba yakusopiyamu.+
46 Chipinda chakuryiyamu cho khomu laki lilereska kunkhondi,* ntcha asembi wo ateŵete paguŵa la sembi.+ Ŵenaŵa mbana anthulumi aku Zadoki+ akutuliya pa Alevi wo akuŵikika kuti anderengi pafupi ndi Yehova kuti amuteŵetiyengi.”+
47 Pavuli paki, wangupima balaza lamukati. Mu utali ndi mu usani lenga mamita pafufupi 52, lenga lakuyanana vigaŵa vosi. Panthazi pa nyumba yakusopiyamu penga guŵa la sembi.
48 Pavuli paki, wangunditole mukhondi la nyumba yakusopiyamu,+ ndipu wangupima vipilala vamumphepeti mwa khondi lo. Vipilala vo, venga mamita pafufupi ngaŵi ndi hafu mu utali ndipu mu usani venga pafufupi mita yimoza ndi hafu. Chipilala chimoza chenga kumazge ndipu chipilala chinyaki chenga kumaryi.
49 Khondi lo, lenga mamita pafufupi 10 mu utali ndipu mu usani lenga mamita pafufupi ngankhondi ndi hafu. Ŵanthu akweranga masitepusi kuti afiki pakhondi. Pafupi ndi vipilala penga ntchindamilu, yinyaki yenga kumaryi ndipu yinyaki yenga kumazge.+
Mazu Ngam'mphata
^ Chakume cho chapandikanga kali, ndipu achigwiriskiyanga ntchitu pakupanga uzu wakupangiya salu.
^ Wonani Fundu Zakukumaliya B14.
^ Mazu ngaki chayingu, “nyumba.” Mazu yanga ngakufwatulika viyo mu chaputala 40 mpaka 48 asani mazu ngakuti “nyumba” ngamiya malu ngosi nga pa nyumba yakusopiyamu pamwenga asani ngamiya nyumba yakusopiyamu chayiyu.
^ Mazu ngaki chayingu, “deti lakupimiya lo utali waki wenga manja 6, janja limoza ndi chikufi chimoza.” Ili ndi janja litali. Wonani Fundu Zakukumaliya B14.
^ Mazu ngaki chayingu, “manja ngankhondi.” Wonani Fundu Zakukumaliya B14.
^ Mazu ngaki chayingu, “manja 8.” Wonani Fundu Zakukumaliya B14.
^ Mazu ngaki chayingu, “manja ngaŵi.” Wonani Fundu Zakukumaliya B14.
^ Mazu ngaki chayingu, “manja 10.” Wonani Fundu Zakukumaliya B14.
^ Mazu ngaki chayingu, “manja 13.” Wonani Fundu Zakukumaliya B14.
^ Mazu ngaki chayingu, “janja limoza.” Wonani Fundu Zakukumaliya B14.
^ Mazu ngaki chayingu, “manja 6.” Wonani Fundu Zakukumaliya B14.
^ Anyaki akamba kuti, “kumpotu.”
^ Mazu ngaki chayingu, “usani.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
