Ezekiyeli 41:1-26
41 Pavuli paki, wangunditole mumalu ngakupaturika ngakubwalu,* ndipu wangupima vipilala vamumphepeti, chimoza chenga kumaryi ndipu chinyaki chenga kumazge. Chipilala chechosi chenga mamita pafufupi ngatatu* mu utali.
2 Mu usani chipilala chechosi chenga mamita pafufupi ngaŵi ndi hafu. Ndipu khomu lenga lisani mamita pafufupi ngankhondi. Iyu wangupima malu ngakupaturika ngakubwalu, ngenga mamita pafufupi 21 mu utali ndipu mu usani ngenga mamita pafufupi 10.
3 Pavuli paki, wangusere mukati* ndipu wangupima chipilala chapakhomu, chenga chikhomi pafufupi mita yimoza ndipu khomu lenga lisani mamita pafufupi ngatatu. Vipilala vamumphepeti va pakhomu venga mamita pafufupi ngatatu ndi hafu mu utali.
4 Pavuli paki, wangupima chipinda cho chalereskananga ndi malu ngakupaturika ngakubwalu. Chenga mamita pafufupi 10 mu utali ndi mu usani.+ Ndipu iyu wangundikambiya kuti: “Yanga ndi Malu Ngakupaturika Ukongwa.”+
5 Pavuli paki, wangupima chimati cha nyumba yakusopiyamu ndipu chenga chikhomi pafufupi mamita ngatatu. Vipinda vamumphepeti kuzunguliya nyumba yakusopiyamu venga mamita pafufupi ngaŵi mu usani.+
6 Vipinda vamumphepeti venga va vigaŵa vitatu vakuyerekana, chigaŵa chimoza chenga pachanya pa chinyaki. Chigaŵa chechosi chakuyerekana chenga ndi vipinda 30. Mumphepeti mwa chimati cha nyumba yakusopiyamu kuzunguliya, angusiyamu malu ngakutundumuka mo anguŵikamu vakukholese vipinda vamumphepeti, kuti vakukholese vo vileki kusere muchimati cha nyumba yakusopiyamu.+
7 Kuvigaŵa vosi viŵi va nyumba yakusopiyamu, kwenga masitepusi ngakuzunguliya ngo ngaŵanga ngasani ngachikwere kuvipinda va kuchanya.+ Asani munthu wakwera kutuwa pa chigaŵa chapasi kuluta kuchigaŵa chapachanya, kujumpha pa chigaŵa chapakati, vipinda vapachanya vaŵanga visani kuluska vapasi.
8 Ndinguwona kuti nyumba yakusopiyamu yinguzengeka pa fawundeshoni yitali ndipu mafawundeshoni nga vipinda vamumphepeti ngakwananga deti limoza la mamita pafufupi ngatatu, kutuwa pasi kufika pachanya.
9 Usani wa chimati chakubwalu cha vipinda vamumphepeti wenga mamita pafufupi ngaŵi ndi hafu. Mumphepeti mwa vipinda vamumphepeti va nyumba yakusopiyamu mwenga mpata.*
10 Pakati pa nyumba yakusopiyamu ndi vipinda vakuryiyamu+ penga malu ngambula kanthu, ndipu ngenga ngasani mamita pafufupi 10 kuchigaŵa chechosi.
11 Pakati pa vipinda vamumphepeti ndi mpata penga khomu kuchigaŵa cha kunkhondi* kweniso khomu linyaki kuchigaŵa cha kumwera. Mpata wo, wenga usani pafufupi mamita ngaŵi ndi hafu kuzunguliya.
12 Kuzambwi* kwenga nyumba yo yalereskananga ndi malu ngambula kanthu. Nyumba yo yenga mamita pafufupi 36 mu usani ndipu mu utali yenga mamita pafufupi 47; chimati cha nyumba yo chenga chikhomi pafufupi mamita ngaŵi ndi hafu kuzunguliya.
13 Wangupima nyumba yakusopiyamu ndipu mu utali yenga mamita pafufupi 52. Malu ngambula kanthu, nyumba* kweniso vimati vaki venga mamita pafufupi 52 mu utali.
14 Chigaŵa chakunthazi cha nyumba yakusopiyapu cho chalereskanga kuvuma limoza ndi malu ngambula kanthu, usani waki wenga mamita pafufupi 52.
15 Wangupima nyumba yo yalereskananga ndi malu ngambula kanthu kuseri kwa nyumba yakusopiyamu, limoza ndi timakhondi taki kuvigaŵa vosi viŵi, ndipu utali waki wenga mamita pafufupi 52.
Wangupima so malu ngakupaturika ngakubwalu, malu ngakupaturika ngamukati,+ makhondi ngakulereskana ndi balaza,
16 malu ngapafupi ndi khomu, mawindu ngo ngenga ngasani mukati ngafinyi kubwalu,+ kweniso timakhondi to tenga mumalu ngatatu ngenanga. Pafupi ndi khomu pangukhomeka mathabwa+ kutuwa pasi mpaka mumawindu; ndipu mawindu angungabenekere.
17 Wangupima pachanya pa khomu, mukati mwa nyumba yakusopiyamu, kubwalu kwa nyumba yakusopiyamu kweniso chimati chosi kuzunguliya.
18 Muchimati mungujobeka akerubi+ kweniso vimiti va kantchindi.+ Chimiti cha kantchindi chechosi chenga pakati pa akerubi ŵaŵi, ndipu mukerubi weyosi wenga ndi visku viŵi.
19 Chisku cha munthu chingulazgiya ku chimiti cha kantchindi cha kuchigaŵa chinyaki, ndipu chisku cha nkharamu* chingulazgiya ku chimiti cha kantchindi cha kuchigaŵa chinyaki.+ Vingujobeka viyo munyumba yakusopiyamu yosi.
20 Muchimati cha nyumba yakusopiyamu, kutuwa pasi mpaka pachanya pa khomu, angujobamu akerubi kweniso vimiti va kantchindi.
21 Mafulemu nga makhomu* nga malu ngakupaturika ngenga ngakuyanana mu usani ndi mu utali.+ Kunthazi kwa malu ngakupaturika* kwenga chinthu chinyaki cha nge
22 guŵa la sembi la mathabwa+ lo lenga pafufupi mita yimoza ndi hafu* kutuwa pasi mpaka pachanya ndipuso pafufupi mita yimoza* mu utali. Chenga ndi tintchindamilu mumakona ngaki ndipu chapasi chaki kweniso mumphepeti mwaki chingupangika ndi mathabwa. Iyu wangundikambiya kuti: “Ili ndi thebulu lo le pa masu paku Yehova.”+
23 Khomu lakuselere mumalu ngakupaturika ngakubwalu lenga ndi visasa viŵi, ndipu khomu lakuselere mumalu ngakupaturika nalu lenga ndi visasa viŵi.+
24 Visasa vo vingupangika ndi visasa viŵiviŵi, chisasa chechosi chenga ndi visasa viŵi.
25 Pamakhomu nga malu ngakupaturika pangujobeka akerubi kweniso vimiti va kantchindi nge vo venga muvimati.+ Kunthazi kwa khondi pachanya, angukhomapu mathabwa ngo ngatuliyanga kubwalu.
26 Mumphepeti mwa khondi kumazge ndi kumaryi, mumphepeti mwa vipinda vamumphepeti va nyumba yakusopiyamu, kweniso mumphata mwa mathabwa ngo ngatuliyanga kubwalu, mwenga mawindu ngo ngenga ngasani mukati ngafinyi kubwalu,+ ndipuso mungujobeka vimiti va kantchindi.
Mazu Ngam'mphata
^ Mazu ngaki chayingu, “nyumba yakusopiyamu.” Mu chaputala 41 ndi 42 mazu yanga ngang’anamuwa malu ngakupaturika ngakubwalu (Malu Ngakupaturika) pamwenga ngang’anamuwa malu ngakupaturika ngosi (nyumba yakusopiyamu kusazgapu Malu Ngakupaturika ndipuso Malu Ngakupaturika Ukongwa).
^ Mazu ngaki chayingu, “manja 6.” Yanga ndi manja ngatali. Wonani Fundu Zakukumaliya B14.
^ Kung’anamuwa mumalu ngakupaturika ngamukati, pamwenga mu Malu Ngakupaturika Ukongwa.
^ Viwoneka kuti yaka nkhanthowa kafinyu kuzunguliya nyumba yakusopiyamu.
^ Anyaki akamba kuti, “kumpotu.”
^ Pamwenga kuti, “Ko kutuliya lumwi.”
^ Kung’anamuwa nyumba yo yenga kuzambwi kwa malu ngakupaturika.
^ Pamwenga kuti, “nkharamu yimana yanthazi.”
^ Mazu ngaki chayingu, “Fulemu ya khomu.” Viwoneka kuti ili ndi khomu lakuselere mu Malu Ngakupaturika.
^ Viwoneka kuti akamba Malu Ngakupaturika Ukongwa.
^ Mazu ngaki chayingu, “manja ngatatu.” Wonani Fundu Zakukumaliya B14.
^ Mazu ngaki chayingu, “manja ngaŵi.” Wonani Fundu Zakukumaliya B14.
