Ezekiyeli 8:1-18
8 Ndipu mu chaka cha 6, mu mwezi wa 6, pa zuŵa lachinkhondi la mwezi wo, pa nyengu yo ndenga munyumba mwangu limoza ndi ŵara a ku Yuda wo ŵenga panthazi pangu, janja laku Yehova, Ambuya Fumu Yikulu lenga paku ini.
2 Ndichilereska, ndinguwona chinthu chinyaki cha nge munthu cho chawonekanga nge motu; pasi pa cho chawonekanga nge chiwunu chaki penga motu,+ ndipu kutuliya muchiwunu chaki kukwera muchanya, chaŵalanga nge siliva wakusazgana ndi golidi.+
3 Pavuli paki, wangutambasuwa cho chawonekanga nge janja, ndipu wanguko sisi la kumutu kwangu ndi kundinyamuliya muchanya. Mu viwona vakutuliya kwaku Chiuta, mzimu ungundinyamuliya mude pakati pa charu chapasi ndi kuchanya ndipu ungunditole ku Yerusalemu, pakhomu la geti lamukati+ lo lilereska kunkhondi,* po panguma chikozgu cha sanji, cho chichitiska sanji.+
4 Ndipu awonani! kwenuku kwenga unkhankhu waku Chiuta waku Isirayeli,+ nge chiwona cho ndinguwona muchidika.+
5 Pavuli paki, wangundikambiya kuti: “Yiwi mwana wa munthu, lereska kunkhondi.”* Mwaviyo, ndingulereska kunkhondi, ndipu kweniko, kunkhondi kwa geti la guŵa la sembi, kwenga chikozgu cha sanji pakhomu.
6 Ndipu wangundikambiya kuti: “Yiwi mwana wa munthu, kumbi uwona vinthu viheni kweniso vakuseruska vo nyumba yaku Isirayeli yichita panu,+ vinthu vo vitindichitiska kuti ndije kutali ndi malu ngangu ngakupaturika?+ Kweni uwonengi vinthu vakuseruska vo viheni ukongwa kuluska venivi.”
7 Ndipu wangunditole pakhomu la balaza la chihema, ndipu ndati ndalereska ndinguwona zenji pachimati.
8 Sonu wangundikambiya kuti: “Yiwi mwana wa munthu, tolo chimati.” Mwaviyo ndingutolo chimati cho, ndipu ndinguwona khomu.
9 Wangundikambiya kuti: “Sere kuti ukawoni vinthu viheni, vinthu vakuseruska vo achita panu.”
10 Mwaviyo ndingusere ndi kulereska, ndipu ndinguwona vikozgu vakupambanapambana va vinyama vakukwaŵa, vinyama vakuseruska+ kweniso angoza wosi akuseruska* a nyumba yaku Isirayeli;+ anguvijoba muvimati vosi.
11 Ndipu ŵara 70 a nyumba yaku Isirayeli anguma panthazi pa vikozgu vo, ndipu ŵenga limoza ndi Yazaniya mwana waku Shafani.+ Weyosi waku yiwu wenga ndi chakuperekiyapu sembi za vakununkhira mujanja laki ndipu josi la vakununkhira lakweranga muchanya.+
12 Wangundikambiya kuti: “Yiwi mwana wa munthu, kumbi uwona vo ŵara a nyumba yaku Isirayeli achita mu mdima, weyosi muvipinda vamukati, mo waŵika vikozgu vaki? Pakuti yiwu akamba kuti, ‘Yehova watitiwona cha. Yehova watuwamu mucharu ichi.’”+
13 Ndipu wangulutirizga kundikambiya kuti: “Uwonengi vinthu vakuseruska vo viheni ukongwa kuluska vo achita.”
14 Mwaviyo wangunditole pakhomu la geti la kunkhondi* la nyumba yaku Yehova, ndipu kwenuku ndinguwona anthukazi wo anguja pasi achiliriya chiuta yo wadanika kuti Tamuzi.
15 Ndipu wangulutirizga kundikambiya kuti: “Yiwi mwana wa munthu, kumbi waviwona vinthu ivi? Uwonengi vinthu vakuseruska vo viheni ukongwa kuluska venivi.”+
16 Mwaviyo, wangunditole mubalaza lamukati la nyumba yaku Yehova.+ Mwenumu, pakhomu la nyumba yakusopiyamu yaku Yehova, pakati pa khondi ndi guŵa la sembi penga anthulumi pafufupi 25 wo angulazga misana yawu ku nyumba yakusopiyamu yaku Yehova ndipu alereskanga kuvuma;* yiwu asindamiyanga lumwi kuvuma.+
17 Iyu wangundikambiya kuti: “Yiwi mwana wa munthu, kumbi waviwona venivi? Kumbi ndi nkhani yimana kuti nyumba yaku Yuda yichitengi vinthu vakuseruska venivi, kuzaza charu ndi chiwawa+ kweniso kulutirizga kundikwiyisa? Awona, yiwu alazgiska mphanda* ku mphunu yangu.
18 Mwaviyo, ndichitengepu kanthu mwaukali. Jisu langu liŵachitiyengi chitima cha; ndipu ndiŵalengiyengi lisungu cha.+ Chinanga kuti angaliya mwakukweza ini ndichivwa, ndazakuŵavwisiya cha.”+
Mazu Ngam'mphata
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.
^ Anyaki akamba kuti, “kumpotu.”
^ Pamwenga kuti, “ko kutuliya lumwi.”
^ Viwoneka kuti iyi ndi mphanda yo agwiriskiyanga ntchitu pakusopa achiuta aboza.
