Genezesi 15:1-21
15 Pavuli paki, Yehova wangulongoro ndi Abramu mu chiwona, ndipu wangukamba kuti: “Ungawopanga cha+ Abramu. Ini nde chishangu chaku.+ Mphotu yaku yazamuja yikulu ukongwa.”+
2 Abramu wangumuka kuti: “Yehova, Ambuya Fumu Yikulu, kumbi mundipaskengenji, pakuti ndilivi mwana ndipu yo wazamuhara nyumba yangu ndi Eliyezere,+ munthu wa ku Damasiko?”
3 Abramu wangukamba so kuti: “Mwandipaska mphapu*+ cha, ndipu mteŵeti* wa munyumba yangu ndiyu wajengi wakuhara.”
4 Kweni Yehova wangumumuka kuti: “Munthu uyu ndiyu cha wazamuja wakuhara, kweni mwana waku chayiyu munthulumi* ndiyu wazamuja wakuhara.”+
5 Sonu wangumutuzgiya kubwalu ndipu wangumukambiya kuti: “Lereska kuchanya ndi kuŵerenga nyenyezi, asani ungafiska kuziŵerenga.” Pavuli paki, wangumukambiya kuti: “Ndimu so mphapu* yaku yazamuŵiya.”+
6 Abramu wenga ndi chivwanu mwaku Yehova,+ ndipu Iyu wangumuwona kuti wenga murunji.+
7 Wangukamba so kuti: “Ini ndini Yehova mweniyo wangukutuzga mutawuni ya Uri ya Akadiya kuti ndikupaski charu ichi kuti chije chaku.”+
8 Abramu wangumuka kuti: “Yehova, Ambuya Fumu Yikulu, ndingaziŵa wuli kuti charu ichi ndazakuchito kuti chije changu?”
9 Iyu wangumuka kuti: “Nditole ng’ombi yinthukazi ya vyaka vitatu yo yechendabalepu, mbuzi yinthukazi ya vyaka vitatu, mbereri yinthulumi ya vyaka vitatu, njiŵa ndi chiwunda.”*
10 Mwaviyo, vosi venivi wanguvidumuwa pakati, ndipu chechosi wanguchiŵika mwakulereskana ndi chinyaki,* kweni viyuni wanguvidumuwa cha.
11 Pavuli paki, viyuni vakurya nyama vingwamba kuza pa nyama zakufwa zo, kweni Abramu wavidikisanga.
12 Lumwi le pafupi kusere, Abramu wangugona tulu takufwa natu ndipu mdima ukulu ndipuso wakofya unguza paku iyu.
13 Pavuli paki, Chiuta wangukambiya Abramu kuti: “Ziŵa kuti mphapu* yaku yazamuja alendu mucharu chaŵeni ndipuso kuti ŵanthu a mucharu chenicho azakuyisambusa akapolu kweniso azakuyitombozga kwa vyaka 400.+
14 Kweni ndazamuyeruzga charu chenicho azakuchiteŵete,+ ndipu pavuli paki azamutuwaku ndi katundu munandi.+
15 Kweni yiwi wazamuluta kwa apapi ŵaku mu chimangu; wazamuŵikika mumuwunda we ndi vyaka vinandi.+
16 Kweni mugonezi wachinayi wazamuwere kunu,+ pakuti nyengu yakulangiya Aamori chifukwa cha ubudi wawu yechendakwani.”+
17 Lumwi lati lasere kweniso kwati kwachita mdima ukulu, ng’anju yakusunkha josi ndi limbuni lakukole motu vinguwoneka ndipu vingujumpha pakati pa nyama zakudumuwa.
18 Pa zuŵa lenili, Yehova wanguchita phanganu ndi Abramu+ ndipu wangumukambiya kuti: “Ndazamupereka charu ichi+ ku mphapu* yaku, kwambiya kumsinji wa ku Ijipiti mpaka kumsinji ukulu, msinji wa Yufureti:+
19 charu cha Akeni,+ Akenizi, Akadamoni,
20 Ahiti,+ Aperezi,+ Arefayimu,+
21 Aamori, Akanani, Agirigasi ndi Ayebusi.”+
Mazu Ngam'mphata
^ Mazu ngaki chayingu, “mbewu.”
^ Mazu ngaki chayingu, “mwana munthulumi.”
^ Mazu ngaki chayingu, “yo watuwa muviŵalu vaku va mukati.”
^ Mazu ngaki chayingu, “mbewu.”
^ Chiwunda ndi mwana wa nkhunda.
^ Pamwenga kuti, “chigaŵa chechosi cha nyama yo wanguchiŵika kuti chiyanani ndi chinyaki.”
^ Mazu ngaki chayingu, “mbewu.”
^ Mazu ngaki chayingu, “mbewu.”
