Machitidu nga Akutumika 15:1-41
15 Sonu ŵanthu anyaki akutuliya ku Yudeya, angwamba kusambiza abali kuti: “Kwambula kuti mwadumulika mwakukoliyana ndi dangu laku Mozesi,+ mungataskika cha.”
2 Kweni Paulo ndi Baranaba angulimbanapu nawu kwa kanyengu ndipuso angususkana nawu ukongwa, mwakuti pangunozgeka kuti Paulo ndi Baranaba kweniso abali anyaki aluti kwa akutumika ndi ŵara ku Yerusalemu+ kuti akakambiskani nkhani* yeniyi.
3 Mpingu wati waŵaperekeza panthowa, yiwu angulutiriya ndipu angupitiya ku Fonike ndi ku Samariya. Yiwu akonkhoskanga mo ŵanthu amitundu yinyaki angung’anamukiya, ndipu venivi vaŵakondwesanga ukongwa abali wosi.
4 Yiwu ŵati afika ku Yerusalemu, mpingu, akutumika kweniso ŵara anguŵalonde umampha ndipu angukonkhoska vinthu vinandi vo Chiuta wanguchita mwakugwiriskiya ntchitu yiwu.
5 Kweni anyaki a mu kagulu kakugaruka ka Afarisi wo sonu anguja akusambira, angusoka mumipandu yawu ndi kukamba kuti: “Atenere kudumulika kweniso kuŵalamula kuti asungengi Dangu* laku Mozesi.”+
6 Sonu akutumika ndi ŵara anguwungana pamoza kuti akambiskani nkhani yeniyi.
7 Ŵati asuskana ukongwa, Peturo wangusoka ndi kuŵakambiya kuti: “Mwaŵanthu, abali, muziŵa umampha kuti mu mazuŵa ngakwamba, Chiuta wangusankha ini pakati pinu kuti kuziya mwaku ini ŵanthu amitundu yinyaki avwi mazu nga uthenga wamampha ndi kugomezga.+
8 Ndipu Chiuta yo waziŵa mtima,+ wangupereka ukaboni mwakuŵapaska mzimu wakupaturika+ nge mo wakuchitiya ndi isi.
9 Ndipuso Chiuta wakupambanisapu cha isi ndi yiwu,+ kweni wakutowesa mitima yawu chifukwa cha chivwanu chawu.+
10 Sonu ntchifukwa wuli mutesa Chiuta mwakunyekezga goli mukhosi mwa akusambira+ lo apapi ŵidu akali pamwenga isi tikufiskapu cha kulipinga?+
11 Kweni te ndi chivwanu chakuti tikutaskika chifukwa cha wezi ukulu wa Ambuya Yesu+ mwakuyanana ndi yiwu.”+
12 Ŵati avwa venivi, wosi anguja cheti ndipu angwamba kuvwisiya Baranaba ndi Paulo achikonkhoska visimikizu ndi vakuziziswa vinandi vo Chiuta wanguchita pakati pa ŵanthu amitundu yinyaki mwakugwiriskiya ntchitu yiwu.
13 Ŵati amaliza kulongoro, Yakobe wangumuka kuti: “Mwaŵanthu, abali, ndivwiyeni.
14 Simiyoni+ wakonkhoska mwakuvwika umampha mo Chiuta wangung’anamukiya kakwamba ku ŵanthu amitundu yinyaki kuti watomu ŵanthu akuti aziŵikengi ndi zina laki.+
15 Ndipu venivi vikoliyana ndi mazu ngo nge mu vo achimi akulemba ngakuti:
16 ‘Pavuli pa vinthu venivi, ndazamuwelere ndi kuzijintha so hema laku Davidi* lo likuwa, ndipu ndazamuzenga so mahami ngaki ndi kuliweziyapu,
17 kuti ŵanthu wo ajaku apenji Yehova* ndi mtima wosi limoza ndi ŵanthu amitundu yosi, ŵanthu wo aziŵika ndi zina langu, venivi ndivu Yehova* yo wachita vinthu ivi wakamba+
18 vo vikuziŵika kwamba kali.’+
19 Mwaviyo, ini ndiyeruzga* kuti tileki kusuzga ŵanthu akutuliya mu mitundu yinyaki wo ang’anamukiya kwaku Chiuta.+
20 Kweni tiŵalembe kuti akani vinthu vakufipiskika ndi angoza,+ ureŵi,*+ nyama zo azinyongoro,* ndipuso ndopa.+
21 Pakuti kwamba kali ŵanthu aja achipharazga mumatawuni ngakupambanapambana vo Mozesi wakulemba, chifukwa viŵerengeka mwakukweza mumasinagogi pa sabata peposi.”+
22 Sonu akutumika ndi ŵara kweniso mpingu wosi, angusankha kuti atumi ŵanthu wo anguŵasankha pakati pawu kuti aluti ku Antiyoke limoza ndi Paulo kweniso Baranaba. Yiwu angutuma Yudasi yo wadanikanga kuti Barasaba ndipuso Sila,+ ŵanthu wo alongozganga pakati pa abali.
23 Vo angulemba ndi kuvitumiza mwakugwiriskiya ntchitu abali yaŵa venga vakuti:
“Isi abali ŵinu, akutumika pamoza ndi ŵara, titikulembiyani yimwi abali akutuliya mu mitundu yinyaki, yimwi muja ku Antiyoke,+ ku Siriya ndi ku Kilikiya: Timoneni!
24 Tavwa kuti ŵanthu anyaki akutuliya pakati pidu atikusuzgani maŵanaŵanu ndi vo akamba,+ ndipu yiwu akhumba kukutimbanyizgani chinanga kuti isi taŵatuma cha.
25 Sonu tosi pamoza takoliyana kuti tisankhi ŵanthu kuti tiŵatumi limoza ndi akwanjiwa ŵidu, Baranaba ndi Paulo.
26 Baranaba ndi Paulo mbanthu wo apereka maumoyu ngawu chifukwa cha zina la Ambuyafwi Yesu Khristu.+
27 Mwaviyo, takutumiyani Yudasi ndi Sila kuti azikukambiyeni so vinthu venivi ndi mazu nga pa mulomu.+
28 Pakuti mzimu wakupaturika+ kweniso isi, tawona kuti nkhwakwenere cha kukusazgiyanipu mphingu yinyaki kupatuwaku vinthu vakukhumbika ivi:
29 mulutirizgi kukana vinthu vakuperekeka sembi kwa angoza,+ ndopa,+ nyama zo azinyongoro*+ kweniso ureŵi.*+ Asani muyesesengi kukana vinthu venivi, vinthu vikuyendiyeningi umampha. Titikukhumbiyani umoyu wamampha.”*
30 Sonu ŵati aŵakambiya kuti akengi, yiwu angusikiya ku Antiyoke ndipu anguwunganisa pamoza gulu losi la ŵanthu ndipu anguŵapaska kalata yo.
31 Ŵati ayiŵerenga, angukondwa ukongwa chifukwa cha kuvwa mazu ngakuchiska.
32 Pakuti Yudasi ndi Sila ŵenga achimi, anguchiska abali ndi nkhani zinandi ndipuso anguŵawovya kuti aje akukho.+
33 Ŵati ajaku kwa mazuŵa nganandiku, abali angulayirana nawu mwachimangu, ndipu anguwere kwaku wo anguŵatuma.
34 * ——
35 Kweni Paulo ndi Baranaba anguja ku Antiyoke, ndipu yiwu limoza ndi ŵanthu anyaki anandi asambizanga ndi kupharazga uthenga wamampha wa mazu ngaku Yehova.*
36 Pati pajumpha mazuŵa, Paulo wangukambiya Baranaba kuti: “Tiyeni tiweriyeku* kwa abali a mumatawuni ngosi ngo tingupharazgamu mazu ngaku Yehova,* kuti tikawoni mo aliri.”+
37 Baranaba wakhumbisiskanga kuti aluti so ndi Yohane yo wadanikanga kuti Mariko.+
38 Kweni Paulo wanguwona kuti mphakwenere cha kuti alutiyi nayu limoza chifukwa wanguŵasiya ku Pamfuliya ndipu wanguluta nawu cha ku ntchitu yeniyi.+
39 Venivi vinguchitiska kuti akwiyisani ukongwa mwakuti angupatukana. Baranaba+ wanguto Mariko ndipu wangwenda nayu ulendu wapanyanja kuluta ku Kupuro.
40 Paulo wangusankha Sila, ndipu abali ŵati amupemphere kuti Yehova* wamulongo wezi ukulu, angusoka.+
41 Iyu wangupitiya ku Siriya ndi ku Kilikiya ndipu kweniko wanguchiska mipingu.
Mazu Ngam'mphata
^ Pamwenga kuti, “suskanu.”
^ Wonani Mazu ngo Ngakonkhoskeka.
^ Pamwenga kuti, “nyumba yaku Davidi; msasa waku Davidi.”
^ Wonani Fundu Zakukumaliya A5.
^ Wonani Fundu Zakukumaliya A5.
^ Pamwenga kuti, “ndiwona.”
^ Pamwenga kuti, “zo zabayika kwambula kupunguliya ndopa zaki pasi.”
^ Mu Chigiriki, por·nei′a. Wonani Mazu ngo Ngakonkhoskeka.
^ Pamwenga kuti, “zo zabayika kwambula kupunguliya ndopa zaki pasi.”
^ Pamwenga kuti, “Vamampha vosi.”
^ Mu Chigiriki, por·nei′a. Wonani Mazu ngo Ngakonkhoskeka.
^ Wonani Fundu Zakukumaliya A3.
^ Wonani Fundu Zakukumaliya A5.
^ Yapa pangafwatulikiya so kuti, “Tingatondekanga cha kulutaku so.”
^ Wonani Fundu Zakukumaliya A5.
^ Wonani Fundu Zakukumaliya A5.
