Machitidu nga Akutumika 4:1-37
4 Peturo ndi Yohane achilongoro ndi ŵanthu, kunguza asembi, kapitawu wa nyumba yakusopiyamu ndi Asaduki.+
2 Yiwu angukwiya ukongwa chifukwa chakuti akutumika asambizanga ŵanthu ndipuso apharazganga pakweru va kuyuskika kwaku Yesu.+
3 Mwaviyo anguŵako* ndi kuchiŵaŵika mujeri+ mpaka mawa laki chifukwa ndipu kwafipa kali.
4 Kweni anandi mwa ŵanthu wo anguvwisiya vo akambanga, angugomezga ndipu chiŵerengeru cha anthulumi chingukuwa mpaka kufika pafufupi 5,000.+
5 Mawa laki, alongozgi ŵawu, ŵara ndi alembi anguwungana pamoza ku Yerusalemu.
6 Pa gulu lawu penga so Anasi+ yo wenga mura wa asembi, Kayafa,+ Yohane, Alekizanda kweniso ŵanthu wosi wo ŵenga abali a mura wa asembi.
7 Sonu angumika Peturo ndi Yohane pakati pawu ndipu angwamba kuŵafumba kuti: “Kumbi mwachita venivi mu nthazi zaku yani pamwenga mu zina laku yani?”
8 Pavuli paki, Peturo yo wanguzazika ndi mzimu wakupaturika+ wanguŵakambiya kuti:
“Yimwi alongozgi a ŵanthu kweniso ŵara,
9 asani msanawale mutitifufuza chifukwa chakuti tachitiya vinthu vamampha munthu wakupunduka uyu+ ndipu mukhumba kuziŵa kuti ndiyani yo wamuchizga,
10 yimwi mosi kweniso mwaŵanthu mosi a ku Isirayeli ziŵani kuti munthu uyu yo wama panthazi pinu, wachizgika mu zina laku Yesu Khristu wa ku Nazareti+ yo mungumubayiya pachimiti,+ kweni Chiuta wakumuyuska.+
11 Mwenuyu ndiyu ‘mwa wo yimwi akuzenga munguwuwona kuti ngwambula ntchitu, wenuwu waja mwa wakukhumbika ukongwa wapakona.’*+
12 Ndipuso utaski utuliya ku munthu munyaki weyosi cha, pakuti palivi zina linyaki+ pacharu chapasi lo likuperekeka ku ŵanthu kuti titaskiki nalu.”+
13 Sonu ŵati awona kuti Peturo ndi Yohane alongoro vinthu mwambula kubisa* kweniso ŵati aziŵa kuti ŵenga ambula kusambira* ndipuso ambula kutchuka,+ anguzizwa ukongwa. Ndipu anguŵaziŵa kuti ayendanga ndi Yesu.+
14 Achiwona munthu yo wanguchizgika wama limoza ndi Peturo kweniso Yohane,+ angusoŵa chakumukapu pa nkhani iyi.+
15 Sonu anguŵalamula kuti atuliyi kubwalu kwa holu ya Mphara Yikulu ya Milandu* ndipu yiwu angwamba kufumbana
16 kuti: “Kumbi tichitenji nawu ŵanthu yaŵa?+ Chifukwa kukamba uneneska, yiwu achita chisimikizu chakuwoneke limu cho chapereka ukaboni ku ŵanthu wosi wo aja mu Yerusalemu,+ ndipu isi tingachisuska cha.
17 Kuti nkhani iyi yileki kulutirizga kuwanda, tiŵawofyezi ŵanthu yaŵa ndipuso tiŵakambiyi kuti angakambanga chechosi cha ndi munthu weyosi mu zina lenili.”+
18 Ŵati akambiskana venivi, anguŵadana ndi kuŵalamula kuti angakambanga so chechosi cha pamwenga kusambiza mu zina laku Yesu.
19 Kweni Peturo ndi Yohane anguŵamuka kuti: “Yeruzgani mwija asani ntchakwenere pa masu paku Chiuta, kuvwiya yimwi pamwenga kuvwiya Chiuta.
20 Kweni isi tilekengepu cha kulongoro vinthu vo tikuwona ndi kuvwa.”+
21 Ŵati aŵawofyeza ukongwa anguŵafwatuwa chifukwa chakuti anguŵasaniya ndi mulandu wewosi cha wakuŵalangiya kweniso chifukwa chakuti angopa ŵanthu,+ pakuti ŵanthu wosi akankhuskanga Chiuta chifukwa cha vo vinguchitika.
22 Munthu yo wanguchizgika kuporote mu chakuziziswa* chenichi wenga ndi vyaka vakujumpha 40.
23 Ŵati afwatulika anguluta kwa anyawu ndipu anguŵakonkhoske vo ŵara ŵa asembi kweniso ŵara anguŵakambiya.
24 Ŵati avwa venivi, wosi pamoza angudaniriza kwaku Chiuta kuti:
“Ambuya Fumu Yikulu, yimwi Ndimwi mukupanga kuchanya, charu chapasi, nyanja ndi vinthu vosi vo ve mwenimo,+
25 ndipuso ndimwi mungukamba mwa mzimu wakupaturika kuporote mwa mpapi widu wakali Davidi,+ mteŵeti winu kuti: ‘Ntchifukwa wuli mitundu ya ŵanthu yingukwiya ndipuso ntchifukwa wuli ŵanthu angulunguruka pa vinthu vambula fundu?
26 Mafumu nga pacharu chapasi nganguma mumalu ngawu ndipuso akulamuliya anguwungana pamoza nge munthu yumoza kuti alimbani ndi Yehova* kweniso kuti alimbani ndi wakusankhika* waki.’+
27 Chifukwa kukamba uneneska, Herodi ndi Pontiyo Pilato+ limoza ndi ŵanthu amitundu yinyaki kweniso Ayisirayeli anguwungana pamoza mutawuni yeniyinu kuti alimbani ndi Yesu, mteŵeti winu wakupaturika yo mukumusankha.+
28 Yiwu anguwungana pamoza kuti achiti vo yimwi mungunozge limu ndi janja linu kweniso khumbu linu kuti vichitiki.+
29 Ndipu sonu Yehova,* vwani mo atitiwofyeze, ndipu zomerezani kuti akapolu ŵinu alutirizgi kukamba mazu nginu mwachiganga,
30 muchitambasuwa janja linu kuti muchizgi ndipuso muchichitiska visimikizu ndi vakuziziswa+ mu zina laku Yesu mteŵeti winu wakupaturika.”+
31 Ŵati apemphera mwakuŵeyere,* malu ngo anguwunganamu ngangusukunyika, weyosi wanguzazika ndi mzimu wakupaturika,+ ndipu alongoronga mazu ngaku Chiuta mwachiganga.+
32 Kweniso anandi mwa ŵanthu wo angugomezga ŵenga ndi mtima umoza kweniso maŵanaŵanu ngamoza ndipu pengavi munthu yo wakambanga kuti chinthu chechosi cho we nachu ntchaki, kweni vinthu vawu vosi venga vaku wosi.+
33 Ndipu akutumika angulutirizga kupereka mwanthazi ukaboni wakukwaskana ndi kuyuskika kwa Ambuya Yesu,+ ndipuso wosi Chiuta wanguŵalongo wezi waki ukulu ukongwa.
34 Kukamba uneneska, pakati pawu pengavi yo wasoŵanga kanthu,+ pakuti wosi wo ŵenga ndi minda pamwenga nyumba, agulisanga ndipu ndalama zaki azanga nazu
35 ndi kuzipereka kwa akutumika.+ Ndipu yiwu azigaŵanga kwaku weyosi mwakukoliyana ndi vo wakhumbikanga.+
36 Sonu Yosefi yo akutumika angumupaska zina lakuti Baranaba+ (lo ling’anamuwa kuti, “Mwana Wakupembuzga”), yo so wenga Mlevi wa ku Kupuro,
37 wenga ndi malu, ndipu wangungagulisa. Ndalama zaki wanguza nazu ndipu wanguzipereka kwa akutumika.+
Mazu Ngam'mphata
^ Pamwenga kuti, “anguŵamanga.”
^ Mazu ngaki chayingu, “waja mutu wapakona.”
^ Pamwenga kuti, “mwachiganga.”
^ Mazu yanga ngang’anamuwa ŵanthu abulu cha, kweni ŵanthu ambula kuluta kusukulu za arabi.
^ Mazu ngaki chayingu, “Sanihedirini.”
^ Pamwenga kuti, “chisimikizu.”
^ Wonani Fundu Zakukumaliya A5.
^ Pamwenga kuti, “Khristu.”
^ Wonani Fundu Zakukumaliya A5.
^ Pamwenga kuti, “ndi mtima wosi.”
