Machitidu nga Akutumika 6:1-15
6 Sonu mu mazuŵa ngeningo, chiŵerengeru cha akusambira chakuwanga ndipu Ayuda wo alongoronga Chigiriki angwamba kudandawula vakukwaskana ndi Ayuda wo alongoronga Chiheberi, chifukwa vyoko vo valongoronga Chigiriki vapaskikanga cha chakurya cho chagaŵikanga zuŵa ndi zuŵa.+
2 Sonu akutumika 12 angudanisa gulu losi la akusambira ndipu angukamba kuti: “Mbumampha* cha kuti isi tileki mazu ngaku Chiuta ndi kwamba kugaŵa chakurya mumathebulu.+
3 Sonu abali, sankhani anthulumi 7 a mbiri yamampha+ pakati pinu, akuzazika ndi mzimu kweniso azeru+ kuti tiŵaŵiki kuti aphweriyengi nkhani yakukhumbika yeniyi.+
4 Kweni isi tijiperekengi pa kupemphera kweniso pa uteŵeti wa mazu.”
5 Vo angukamba vingukondwesa gulu losi la akusambira, ndipu angusankha Stefano yo wenga ndi chivwanu kweniso wakuzazika ndi mzimu wakupaturika, Filipu,+ Purokoro, Nikanori, Timoni, Paramena ndipuso Nikolasi wa ku Antiyoke yo wangung’anamukiya ku Chiyuda.
6 Anguza nawu kwa akutumika ndipu akutumika wo ŵati apemphera, anguŵika manja ngawu paku yiwu.+
7 Ivi vinguchitiska kuti mazu ngaku Chiuta ngalutirizgi kuwanda+ ndipu chiŵerengeru cha akusambira chasazgikiyangaku ukongwa+ mu Yerusalemu, kweniso gulu likulu la asembi lingwamba kuja ndi chivwanu.+
8 Sonu Stefano yo Chiuta wangumulongo wezi kweniso wangumupaska nthazi, wachitanga vakuziziswa vikulu ndi visimikizu pakati pa ŵanthu.
9 Kweni ŵanthu anyaki a mu gulu lo ladanikanga kuti Sinagogi wa Akufwatulika, anguza kuti azisuskani ndi Stefano. Yiwu anguza ndi ŵanthu anyaki a ku Kureni, a ku Alekizandiriya, kweniso anyaki akutuliya ku Kilikiya ndi ku Asia.
10 Kweni angutondeka kususkana ndi zeru kweniso mzimu wo wamuchitiskanga kuti walongorongi.+
11 Pavuli paki, angunyengere ŵanthu mwachisisi kuti akambi kuti: “Tingumuvwa wachikamba vinthu vakunyoza Mozesi kweniso Chiuta.”
12 Yiwu anguchitiska kuti ŵanthu, ŵara kweniso alembi, amuziyi mwamabuchibuchi ndipu angumuko mwakumuchichizga ndi kuluta nayu ku Mphara Yikulu ya Milandu.*
13 Anguza so ndi akaboni aboza wo angukamba kuti: “Munthu uyu waleka cha kukamba vinthu viheni vakukwaskana ndi malu ngakupaturika yanga kweniso vakukwaskana ndi Dangu.*
14 Mwakuyeruzgiyapu, tingumuvwa wachikamba kuti Yesu uyu wa ku Nazareti wawisiyengi pasi malu yanga ndi kusintha midawuku yo Mozesi wakutipaska.”
15 Ndipu ŵanthu wosi wo anguja mu Mphara Yikulu ya Milandu* ŵati amulereska, anguwona kuti chisku chaki chiwoneka nge chisku cha mungelu.
Mazu Ngam'mphata
^ Mazu ngaki chayingu, “Ntchakukondwesa.”
^ Mazu ngaki chayingu, “Sanihedirini.”
^ Wonani Mazu ngo Ngakonkhoskeka.
^ Mazu ngaki chayingu, “Sanihedirini.”
