Nthanthi 27:1-27
27 Ungajitumbwiyanga va mawa cha,Pakuti uziŵa cha kuti zuŵa lamawa lizengi ndi vinthu wuli.*+
2 Munthu munyaki* ndiyu wakuthamiki, mulomu waku cha;Ŵanthu anyaki ndiwu akuthamiki,* milomu yaku cha.+
3 Mwa nguzitu ndipu mchenga nawu uzita,Kweni vinthu vakukwiyisa vo muzereza wakuchitiya, vizita kuluska vosi viŵi.+
4 Ukali uchita vinthu vankhaza ndipu kukwiya kusapaliya,Kweni ndiyani wangakunthiyapu sanji?+
5 Kuchenyeke pakweru nkhwamampha kuluska chanju chakubisa.+
6 Vilonda vo wakupweteka munyaku vakugomezgeka,+Kweni murwani watikufyofyontha kaŵikaŵi.*
7 Munthu yo waguta wakana* uchi wamuchisa,Kweni munthu wanja, chinanga ntchinthu chakuŵaŵa chitimunowe.
8 Munthu yo walanda pa nyumba yaki,We nge kayuni ko kalanda pa* chizimbu chaki.
9 Mafuta kweniso vinthu vakununkhira, vichitiska kuti mtima ukondwi;Ndimu ulili so ubwezi wamampha wakutuliya pa ulongozgi wo waperekeka kutuliya pasi pa mtima.+
10 Ungamujowonga cha mubwezi waku kweniso mubwezi wa awusu,Ndipu ungaserenga munyumba ya mubali waku cha, pa zuŵa la soka laku;Munyaku yo uja nayu pafupi ngwamampha kuluska mubali waku yo we kutali.+
11 Wamwana wangu, uje wazeru ndipu ukondwesi mtima wangu,+Kuti ndimumuki yo watindinyoza.+
12 Munthu wakuchenje wawona soka ndipu wabisama,+Kweni munthu wambula kuziŵa vinandi walutiriya ndipu wakumana ndi masuzgu.*
13 To chakuvwala cha munthu asani wazomera kuti wawezengi ngongoli mumalu mwa mulendu;Londa chikoli kwaku iyu asani wangujaliya ukaboni munthukazi wachilendu.*+
14 Asani munthu watumbika munyaki ndi mazu ngakukweza mlenjilenji,Ŵanthu amuwonengi kuti ngwakutembeka.
15 Munthukazi wapamulomu* we nge nyumba yo yileka cha kusuluwa pa zuŵa la vuwa.+
16 Weyosi yo wangafiska kulekeska munthukazi mwenuyu, wangalekeska so mphepu.Kweniso wangafumbatiya mafuta ndi janja laki lamaryi.
17 Nge mo chisulu chinore chisulu chinyaki,Munthu nayu wanora munyaki.*+
18 Munthu yo waphwere chimiti cha mkuyu, waryengi vipasu vaki,+Ndipu munthu yo waphwere mbuyaki watumbikikengi.+
19 Nge mo maji ngalongore chithuthuzi cha chisku cha munthu,Mtima wa munthu nawu ulongo chithuzi cha mtima wa munyaki.
20 Dindi kweniso malu nga pharanyiku* vikhorwa cha,+Masu nga munthu nangu ngakhorwa cha.
21 Mumphika wakuyengetuliyamu ngwakuyengetuliyamu siliva ndipu ng’anju njakuyengetuliyamu golidi,+Kweni munthu wayeseka asani ŵanthu atimuthamika.
22 Muzereza chinanga ungamupuwa ndi musuNge mbewu zo zapwanthika muduli,Uzereza waki utuwengemu cha mwaku iyu.
23 Uwuziŵengi umampha mskambu waku mo uwoneke.
Uziphweriyengi umampha* mbereri zaku,+
24 Pakuti chuma chijaliriya mpaka muyaya cha,+Chinanga ntchisoti chaufumu nachu chija mpaka ku migonezi yosi cha.
25 Uteka wakubiriŵira umala, uteka ufya ume,Ndipu vakume vamumapiri viwunjikika.
26 Mbereri zinthulumi zimanazimana zitikupaska vakuvwala,Ndipu aphongu atikuwovya kuti uguli munda.
27 Kuŵengi mkaka wa mbuzi unandi wo ujengi chakurya chaku,Chakurya cha ŵanthu a munyumba yaku, kweniso kuti uphwere ateŵeti ŵaku anthukazi.
Mazu Ngam'mphata
^ Mazu ngaki chayingu, “libalengenji.”
^ Mazu ngaki chayingu, “Mulendu.”
^ Mazu ngaki chayingu, “Munthu wamtundu unyaki ndiyu wakuthamiki.”
^ Yapa pangafwatulikiya so kuti, “watikufyofyontha vaboza; mwakuchichizgika.”
^ Mazu ngaki chayingu, “wakanda.”
^ Pamwenga kuti, “kathaŵa.”
^ Pamwenga kuti, “walangika.”
^ Pamwenga kuti, “mulendu.”
^ Pamwenga kuti, “wakusuzga.”
^ Mazu ngaki chayingu, “chisku cha munyaki.”
^ Pamwenga kuti, “Shelo kweniso Abadoni.”
^ Pamwenga kuti, “Uŵikiyengepu mtima pa; Uŵikiyengepu maŵanaŵanu pa.”
