Numeri 23:1-30
23 Pavuli paki, Balamu wangukambiya Balaki kuti: “Uzengi maguŵa nga sembi ngakukwana 7+ pamalu yanga, ndipu undinozge ng’ombi 7 zinthulumi kweniso mbereri 7 zinthulumi.”
2 Nyengu yeniyo, Balaki wanguchita vo Balamu wangukamba. Ndipu Balaki ndi Balamu angupereka ng’ombi yimoza ndi mbereri yimoza paguŵa la sembi lelosi.+
3 Pavuli paki, Balamu wangukambiya Balaki kuti: “Uje penipanu pafupi ndi sembi yaku yakupiriza, ini ndatuwapu dankha. Panyaki Yehova wamukumana nani.* Chechosi cho wakundivumbuliya ndazakukukambiya.” Mwaviyo, Balamu wanguluta pachanya pa phiri.
4 Sonu Chiuta wangukumana ndi* Balamu+ ndipu Balamu wangukambiya Chiuta kuti: “Ndazenga maguŵa nga sembi ngakukwana 7 ndipu nge mumzeri. Ndapereka ng’ombi yimoza ndi mbereri yimoza paguŵa la sembi lelosi.”
5 Yehova wanguŵika mazu mumulomu mwaku Balamu+ ndipu wangumukambiya kuti: “Uwere kwaku Balaki, ndipu ukamukambiyi mazu yanga.”
6 Mwaviyo, Balamu wanguwere kwaku Balaki ndipu wangusaniya kuti iyu ndi alongozgi wosi a ku Mowabu, ama pafupi ndi sembi yaki yakupiriza.
7 Pavuli paki, wangukamba nthanthi yakuti:+
“Balaki fumu ya ku Mowabu yaza nani kunu kutuliya ku Aramu,+Kutuliya kumapiri nga kuvuma* ndipu yingundikambiya kuti:
‘Iza kunu kuti uzinditembe Yakobe.
Zanga kuti uzinyozi Isirayeli.’+
8 Kumbi ndiŵatembiyenji ŵanthu akuti Chiuta waŵatemba cha?
Ndipu ndiŵanyoziyenji ŵanthu akuti Yehova waŵanyoza cha?+
9 Nditiŵawona kutuliya pachanya pa majalawi,Nditiŵawona kutuliya pachanya pa mapiri.
Yiwu mbanthu wo aja pakuŵija;+Yiwu atijiwona kuti mbakupambana ndi ŵanthu amitundu yinyaki.+
10 Kumbi ndiyani yo wangaŵerenga fuvu laku Yakobe+Pamwenga kuŵerenga chinanga ntchigaŵa chimoza mwa vigaŵa vinayi vaku Isirayeli?
Ndifwi nyifwa ya ŵanthu arunji,Ndipu umoyu wangu umali nge mo umoyu wawu umaliya.”
11 Pavuli paki, Balaki wangukambiya Balamu kuti: “Ntchinthu wuli cho wandichitiya? Ndinguza nawi kunu kuti uzinditembe arwani ŵangu, kweni mumalu mwakuŵatemba waŵatumbika.”+
12 Iyu wangumuka kuti: “Asi nditenere kukamba chechosi cho Yehova waŵika mumulomu mwangu?”+
13 Balaki wangumukambiya kuti: “Chondi, tiyeni pamalu nganyaki, po ungachiwona ŵanthu wo. Wamuwona ŵaka ŵanthu amanavi, wamuwona wosi cha. Ukanditembe ŵanthu wo kutuliya pamalu ngeningo.”+
14 Mwaviyo, wanguluta nayu kudondu la Zofimu, pachanya pa Pisiga,+ ndipu wanguzenga maguŵa nga sembi ngakukwana 7 ndi kupereka ng’ombi yimoza kweniso mbereri yimoza paguŵa la sembi lelosi.+
15 Sonu Balamu wangukambiya Balaki kuti: “Uje penipanu pafupi ndi sembi yaku yakupiriza, ndipu ini ndiluta kuwa, kuti nkhakumani ndi Chiuta.”*
16 Yehova wangukumana ndi* Balamu, ndipu wanguŵika mazu mumulomu mwaki.+ Wangumukambiya kuti: “Uwere kwaku Balaki, ndipu ukamukambiyi mazu yanga.”
17 Mwaviyo, Balamu wanguwere kwaku Balaki ndipu wangumusaniya kuti walindizga pafupi ndi sembi yaki yakupiriza, ndipu wenga ndi alongozgi a ku Mowabu. Balaki wangufumba Balamu kuti: “Kumbi Yehova wakambanji?”
18 Pavuli paki, Balamu wangukamba nthanthi yakuti:+
“Nyamuka Balaki, ndipu vwisiya.
Ndivwiyi, yiwi mwana munthulumi waku Zipori.
19 Chiuta ndi munthu cha kuti wapusiki,+Pamwenga mwana wa munthu kuti wasinthi maŵanaŵanu ngaki.*+
Asani wakamba chinthu, kumbi watondeka kuchichita?
Asani walongoro, kumbi watondeka kufiska?+
20 Awonani! Ndatoleka kuti nditumbiki;Sonu Chiuta watumbika,+ ndipu ndingavisintha cha.+
21 Iyu wazomereza cha kuti nthazi ya masenga yipweteki Yakobe,Ndipu wazomereza cha kuti suzgu yeyosi yiwiyi Isirayeli.
Yehova Chiuta waki we nawu,+Ndipu iyu wathamikika mwakudaniriza nge fumu pakati pawu.
22 Chiuta watiŵatuzga mucharu cha Ijipiti.+
Iyu we nge masengwi nga ng’ombi yamudondu* kwaku yiwu.+
23 Pakuti palivi yo walowa Yakobe,+Pamwenga yo wawombeze Isirayeli.+
Pa nyengu iyi ŵanthu akambengi vaku Yakobe ndi Isirayeli kuti:
‘Awonani vo Chiuta wachita!’
24 Uwu ndi mtundu wa ŵanthu wo uyukengi nge nkharamu,Ndipu ujiyuskengi nge nkharamu.+
Ugonengi pasi cha mpaka po waryiya nyama yo wakoNdipu umwengi ndopa za nyama zo zabayika.”
25 Pavuli paki, Balaki wangukambiya Balamu kuti: “Asani watondeka kutemba ŵanthu yaŵa, mbwenu ungaŵatumbikanga cha.”
26 Balamu wangumuka Balaki kuti: “Asi ndingukukambiya kuti, ‘Ndichitengi vosi vo Yehova wakamba’?”+
27 Balaki wangukambiya Balamu kuti: “Chondi tiyeni pamalu nganyaki. Panyaki Chiuta wauneneska wangachizomereza* kuti ukanditembe ŵanthu wo pamalu ngeningo.”+
28 Mwaviyo, Balaki wanguluta ndi Balamu pachanya pa Piyori, po palereskana ndi Yeshimoni.*+
29 Pavuli paki, Balamu wangukambiya Balaki kuti: “Uzengi maguŵa nga sembi ngakukwana 7 pamalu yanga, ndipu undinozge ng’ombi 7 zinthulumi kweniso mbereri 7 zinthulumi.”+
30 Mwaviyo, Balaki wanguchita mwakukoliyana ndi vo Balamu wangukamba, ndipu wangupereka ng’ombi yimoza kweniso mbereri yimoza paguŵa la sembi lelosi.
Mazu Ngam'mphata
^ Pamwenga kuti, “wamuwoneke kwaku ini.”
^ Pamwenga kuti, “wanguwoneke kwaku.”
^ Pamwenga kuti, “ko kutuliya lumwi.”
^ Pamwenga kuti, “kuti Chiuta wakawoneke kwaku ini.”
^ Pamwenga kuti, “wanguwoneke kwaku.”
^ Mazu ngaki chayingu, “kuti wajisuski.”
^ Wonani Mazu ngo Ngakonkhoskeka.
^ Mazu ngaki chayingu, “Panyaki vingachija umampha mu masu mwaku Chiuta wauneneska.”
^ Yapa pangafwatulikiya so kuti, “chipalamba; chipululu.”
