Sumu Yaku Solomoni 3:1-11
3 “Nde pabedi langu ndi usiku,Ndapenjanga yo nditimuyanja.+
Ndingumupenja kweni ndingumusaniya cha.+
2 Ndiyukengi ndi kwendakwenda mutawuni;Mumisewu ndi mumabalaza nga tawuni,Kuti ndipenji yo nditimuyanja.
Ndingumupenja kweni ndingumusaniya cha.
3 Alonda angundisaniya achiyendere tawuni.+
‘Kumbi mwamuwonaku yo nditimuyanja?’
4 Ndati ndaŵajumpha ŵaka kamanaviNdingumusaniya yo nditimuyanja.
Ndingumukolesa, ndipu ndingumutaya chaMpaka ndinguza nayu kunyumba kwa ama,+Mpaka muchipinda chamukati chaku yo wakundibala.
5 Yimwi ŵana anthukazi a ku Yerusalemu, nditikuchitiskani kuti mulapizgi,Mwakuzumbuwa mphoyu ndi mbaŵa zamudondu:
Mungayesanga cha kusukunya pamwenga kuyuska chanju mwaku ini, mpaka po chakhumbiya.”+
6 “Kumbi ntchinthu wuli cho chikwera kutuliya kuchipululu cho chiwoneka nge vipilala va josi,Cho chinunkhira mure ndipuso vinthu vinyaki vakununkhira,Kweniso cho che ndi vinthu vosi vaufwaufwa vakununkhira va amalonda?”+
7 “Wonani! Ndi mpandu* waku Solomoni.
Anthulumi anthazi 60 awuzingiliza,Ndipu atuliya pakati pa anthulumi anthazi a ku Isirayeli,+
8 Weyosi wapinga lipanga,Wosi akusambizika mo angachitiya nkhondu,Weyosi wamangiriya lipanga laki muchiwunu mwakiKuti walimbani ndi vinthu vo vitofya ndi usiku.”
9 “Ndi mpandu* waufumu wa Fumu SolomoniWo yingupanga mwakugwiriskiya ntchitu vimiti va ku Lebanoni.+
10 Vipilala va mpandu wenuwu vasiliva,Kweniso vakunyekezapu vaki vagolidi.
Chakujapu chaki ntcha weya wambereri wamtundu wapepo;Ndipu ŵana anthukazi a ku YerusalemuAkutowesamu umampha ukongwa mukati mwaki.”
11 “Tuwani yimwi ŵana anthukazi a ku Ziyoni,Wonani Fumu SolomoniYavwala nkhata yamaluŵa ya pa zowala yo anyina+ anguyipangiyaPa zuŵa la nthengwa yaki,Pa zuŵa lo mtima waki ungukondwa ukongwa.”
Mazu Ngam'mphata
^ Uwu ndi mpandu wo uwoneka nge kanyumba ndipu atiwugwiriskiya ntchitu pakupingapu ŵanthu akuzirwa.
^ Uwu ndi mpandu wo uwoneka nge kanyumba ndipu atiwugwiriskiya ntchitu pakupingapu ŵanthu akuzirwa.
