Yeremiya 11:1-23
11 Yehova wangukambiya Yeremiya kuti:
2 “Vwisiyani mazu nga mu phanganu ili, yimwi mwaŵanthu!
“Ungakambi* ku ŵanthu wo aja mu Yuda ndipuso mu Yerusalemu
3 ndipu uŵakambiyi kuti, ‘Yehova, Chiuta waku Isirayeli wakamba kuti: “Ngwakutembeka munthu yo wavwiya cha mazu nga mu phanganu ili,+
4 ngo ndingulamula apapi ŵinu akali pa zuŵa lo ndinguŵatuzgiya mucharu cha Ijipiti,+ mung’anju yakusongonoliyamu visulu,+ kuti, ‘Vwiyani mazu ngangu ndi kuchita vosi vo nditikulamulani; ndipu mwazamuja ŵanthu ŵangu, ndipu ini ndazamuja Chiuta winu,+
5 kuti ndifiski vo ndingulapizga kwa apapi ŵinu akali, kuti ndazakuŵapaska charu chakwenda mkaka ndi uchi,+ nge mo viliri msanawale.’”’”
Ndipu ini ndingumuka kuti: “Ame,* yimwi Yehova.”
6 Pavuli paki, Yehova wangundikambiya kuti: “Pharazga mazu ngosi yanga mumatawuni nga ku Yuda kweniso mumisewu ya mu Yerusalemu, ndipu ukambi kuti: ‘Vwiyani mazu nga mu phanganu ili ndi kungachita.
7 Pakuti ndingutcheŵeska apapi ŵinu akali pa zuŵa lo ndinguŵatuzgiya mucharu cha Ijipiti mpaka msanawale, ndaŵatcheŵeskanga mwakuwerezawereza kuti:* “Vwiyani mazu ngangu.”+
8 Kweni anguvwiya cha pamwenga kukhazaku gutu lawu; mumalu mwaki, weyosi wachitanga mtafu ndi kulondo mtima waki uheni.+ Mwaviyo, ndinguŵalanga mwakukoliyana ndi mazu ngosi nga mu phanganu ili, ngo ndinguŵalamula kuti achiti kweniso ngo angukana kungachita.’”
9 Pavuli paki, Yehova wangundikambiya kuti: “Ŵanthu wo aja mu Yuda kweniso wo aja mu Yerusalemu anozga chiŵembu.
10 Yiwu awere ku maubudi nga apapi ŵawu akali, wo angukana kuvwiya mazu ngangu.+ Yiwu nawu alondo achiuta anyaki ndi kuŵateŵete.+ A munyumba yaku Isirayeli kweniso a munyumba yaku Yuda, aswa phanganu lo ndinguchita ndi apapi ŵawu akali.+
11 Mwaviyo, Yehova wakamba kuti, ‘Ndiŵatumiyengi soka+ lo alithaŵengi cha. Asani atindidana kuti ndiŵawovyi, ndiŵavwisiyengi cha.+
12 Pavuli paki, ŵanthu wo aja mumatawuni nga ku Yuda ndipuso wo aja mu Yerusalemu azamuluta kwa achiuta wo atiŵapaska sembi* ndi kuŵapempha chovyu,+ kweni azakuŵataska cha mu nyengu ya soka lawu.
13 Pakuti achiuta ŵaku mbanandi nge matawuni ngaku, yiwi Yuda, ndipu chinthu chakuchitiska soni,* wachizenge maguŵa nganandi nga sembi nge misewu ya mu Yerusalemu, maguŵa ngakuperekiyapu sembi kwaku Bala.’+
14 “Kweni yiwi,* ungaŵapempheriyanga cha ŵanthu yaŵa. Ungaŵaliriyanga cha pamwenga kuŵapemphere,+ pakuti ndivwisiyengi cha asani atindidana chifukwa cha soka lawu.
15 Kumbi wakwanjiwa wangu we ndi wanangwa wuli wakuti wajaliyi munyumba yanguPo ŵanthu anandi ŵe ndi maŵanaŵanu ngaheni?
Kumbi yiwu angachitiska kuti soka lileki kukuwiya chifukwa cha nyama zawu zakupaturika?*
Kumbi yiwi wazamuzaya pa nyengu yo?
16 Yehova wakudananingi kuti chimiti cha maolivi chakubiriŵira,Chimiti chakutowa cha vipasu vamampha.
Ndi chiwawa chikulu, wamubuska ndi motu,Ndipu afyo mphanda zaki.
17 “Yehova wa mizinda, yo wakukupanda,+ wakamba kuti soka likuwiyengi chifukwa cha vinthu viheni vo a munyumba yaku Isirayeli kweniso a munyumba yaku Yuda achita, yiwu andikwiyisa chifukwa cha kupereka sembi kwaku Bala.”+
18 Yehova wangundikambiya kuti ndiziŵi;Pa nyengu yo, mungundilongo vo achitanga.
19 Ndenga nge mwana wa mbereri wakufwasa yo aluta nayu kuchimubaya.
Ndinguziŵa cha kuti atindinozge chiŵembu, ndipu akambanga kuti:+
“Tiyeni tinangi chimiti ndi vipasu vaki,Ndipuso tiyeni timutuzgemu mucharu cha ŵanthu amoyu,Kuti zina laki lingakumbukikanga so cha.”
20 Kweni Yehova wa mizinda wayeruzga mwaurunji;Iyu wasanda maŵanaŵanu nga mukati* kweniso mtima.+
Ndizomerezeni kuti ndiwoni muchiŵaweze,Pakuti mulandu wangu ndawupereka kwaku yimwi.
21 Mwaviyo, ivi ndivu Yehova wakamba kususkana ndi ŵanthu aku Anatoti+ wo akhumba kukubaya kweniso wo akamba kuti: “Uleki kukamba mauchimi mu zina laku Yehova,+ asani ukambengi, tikubayengi”;
22 mwaviyo Yehova wa mizinda wakamba kuti: “Ndazakuŵamba mulandu. Anyamata azamubayika ndi lipanga,+ ŵana ŵawu anthulumi ndi anthukazi azamukufwa ndi nja.+
23 Palivi chinanga njumoza yo wazamujaku pakati pawu, chifukwa ŵanthu aku Anatoti+ ndazakuŵatumiya soka mu chaka cho ndazakuŵambiya mulandu.”
Mazu Ngam'mphata
^ Viwoneka kuti mazu yanga ngaluta kwaku Yeremiya.
^ Pamwenga kuti, “Vije viyo.”
^ Mazu ngaki chayingu, “ndayukanga mlenjilenji ndi kuŵatcheŵeska kuti.”
^ Pamwenga kuti, “sembi za josi.”
^ Pamwenga kuti, “chiuta wakuchitiska soni.”
^ Kung’anamuwa Yeremiya.
^ Kung’anamuwa sembi zo aperekanga munyumba yakusopiyamu.
^ Pamwenga kuti, “maŵanaŵanu ngandimba.” Mazu ngaki chayingu, “sana.”
