Yeremiya 12:1-17
12 Yimwi Yehova,+ ndimwi murunji, asani nditikudandawuliyani,Kweniso asani ndilongoro namwi vakukwaskana ndi cheruzgu chakunyoloka.
Ntchifukwa wuli ŵanthu aheni vitiŵayende umampha,+Ndipu ntchifukwa wuli ŵanthu ambula kugomezgeka afipa mtima cha?
2 Yimwi mukuŵapanda ndipu ame misisi.
Yiwu akuwa ndi kupasa vipasu.
Atikuzumbuwani kaŵikaŵi, kweni maŵanaŵanu ngawu ngamukati* nge kutali ndi yimwi.+
3 Kweni ini mutindiziŵa umampha, yimwi Yehova,+ mutindiwona;Mwasanda mtima wangu ndipu mwasaniya kuti ukoliyana ndi yimwi.+
Mwaŵapatuwa nge mbereri zo ziluta kuchibayikaKweniso mwaŵapatuwa kuti alindizgi zuŵa lakuti azibayiki.
4 Kumbi charu chifotengi mpaka zuŵanjiKweniso kumbi vakume va mumunda wewosi vimirengi mpaka zuŵanji?+
Chifukwa cha uheni wa ŵanthu wo aja mwenimo,Vinyama kweniso viyuni vatuzgikapu.
Pakuti yiwu akamba kuti: “Wawona cha vo vazakutichitikiya.”
5 Asani uvuka kutchimbiya ndi ŵanthu akwenda pasi,Kumbi ungafiska wuli kupharizana ndi mahachi?+
Chinanga kuti uja mwambula mantha mucharu chachimangu,Kumbi wamuja wuli pakati pa vivwati vakukho, mumphepeti mwa msinji wa Yorodani?
6 Pakuti chinanga mbabali ŵaku, a munyumba ya awusu,Achita nawi vinthu mwambula kugomezgeka.+
Yiwu asuskana nawi mwakudaniriza.
Ungaŵagomezganga cha,Chinanga kuti angalongoro nawi vinthu vamampha.
7 “Ndajowo nyumba yangu;+ ndaleka chihara changu.+
Wakwanjiwa wangu ndamupereka mu manja mwa arwani ŵaki.+
8 Kwaku ini, chihara changu chaja nge nkharamu mulisuwa.
Iyu wandiwulumiya.
Mwaviyo ndamutinkha.
9 Kwaku ini, chihara changu che nge chiyuni chakuŵalaŵata chakurya nyama;Viyuni vinyaki vakurya nyama vachizunguliya kuti vichiyukiyi.+
Zani, wunganani pamoza, yimwi mosi vinyama vamudondu,Zani kuti muziryi.+
10 Aliska anandi ananga munda wangu wa mphereska;+Yiwu akandakanda chigaŵa changu cha charu.+
Asambusa chigaŵa changu chamampha cha charu kuja chipululu.
11 Chasambuka charu chakunangika.
Chafota;*Chabwangandulika pa masu pangu.+
Charu chosi chasambuka mahami,Kweni palivi yo watoliyaku kanthu.+
12 Akubwanganduwa aza kutuliya kunthowa zosi zakukulika zakujumpha muchipululu,Pakuti lipanga laku Yehova limeza ŵanthu kutuliya kuchigoti cha charu kufika kuchigoti chinyaki.+
Palivi yo waja mwachimangu.
13 Yiwu apanda tirigu, kweni avuna minga.+
Ajivukisa, kweni palivi phindu lo asaniyapu.
Azamuchita soni ndi vo avunaChifukwa cha ukali wakukole waku Yehova.”
14 Ivi ndivu Yehova wakamba kususkana ndi ŵanthu wosi aheni wo ndikuzengezana nawu, wo akwaska chihara cho ndikuchitiska kuti chije cha ŵanthu ŵangu Ayisirayeli:+ “Awonani, nditiŵachesuwa mucharu chawu,+ ndipu ndazamuchesuwa nyumba yaku Yuda pakati pawu.
15 Kweni asani ndaziŵachesuwa, ndazakuŵachitiya so lisungu ndipu weyosi waku yiwu ndazakumuweze ku chihara chaki kweniso kumalu ngaki.”
16 “Ndipu asani ayesesengi kusambira nthowa za ŵanthu ŵangu ndi kulapizga mu zina langu kuti, ‘Ndilapizga mu zina laku Yehova Chiuta wamoyu!’ nge mo angusambiziya ŵanthu ŵangu kulapizga mu zina laku Bala, mbwenu azamujalikiskika pakati pa ŵanthu ŵangu.
17 Kweni asani akana kuvwiya, mbwenu ndazamuchesuwa mtundu wo, ndazakuwuchesuwa ndi kuwunanga,” Yehova ndiyu wakamba.+
Mazu Ngam'mphata
^ Pamwenga kuti, “maŵanaŵanu ngawu ngandimba.” Mazu ngaki chayingu, “sana.”
^ Yapa pangafwatulikiya so kuti, “Chiliya.”
